香港軟體動物

出自維基百科,自由嘅百科全書
Jump to navigation Jump to search
香港一種未鑑定嘅鼻涕蟲
An unidentified semislug from Hong Kong
香港一種未鑑定嘅蝸牛
香港一種未鑑定嘅蝸牛
外來物種非洲大蝸牛
青高海兔

香港,無論喺森林、濕地同深海裏面,都可以見到好多唔同品種,唔同外型嘅軟體動物。我哋日常見到嘅蝸牛、鼻涕蟲;所食嘅田螺、八爪魚等,都係軟體動物嘅例子。軟體動物門可分6個綱:雙神經綱(例子:石鼈);掘足綱(例子:貝殼);腹足綱(例子:蝸牛);雙殼綱(例子:貝蛤);祼鰓綱(例子:海兔);頭足綱(例子:章魚)。

香港濕地嘅軟體動物[編輯]

香港紅樹林海灘裏面生活嘅軟體動物,主要環繞腹足綱雙殼綱兩類。現時香港紅樹林總共記錄到64種軟體動物(Coastal Community Survey,2004年)。品種數目因地方而異,由4種(尖鼻咀南涌沙頭角)到32種(黃宜洲土瓜坪大灘赤徑)不等。一般嚟講,微生境種類多(例如巖岸、石岸、泥岸同沙岸)而有大量淡水流入嘅紅樹林都會有好多唔同嘅軟體動物。

香港陸棲軟體動物[編輯]

喺陸地上,蝸牛同鼻涕蟲亦係香港最常見到嘅軟體動物,大約30-40種。其中10種(或亞種)係從未喺其他地方發現過嘅品種,另外有11種雖然喺中國其他地方有記錄,但都係喺香港首次被發現嘅。除咗原生物種外(例子:樹棲蝸牛,Criptosoma imperiator),亦有一啲係外來物種,例如福壽螺(Pomacea lineata)、沼螺(Limnopema fortunei)、尖膀胱螺(Physella acuta)、大凸旋螺(Biomphalaria straminea)、非洲大蝸牛Achatina fulica)、同型巴蝸牛(Bradybaena similaris)、大錐蝸牛(Allopeas gracilis)等。

香港海棲軟體動物[編輯]

喺香港海域可以揾到大約230種後鰓軟體動物,即係所謂嘅「海兔」,佢哋統稱為祼鰓類,佢哋大多擁有鮮艷奪目嘅體色,話畀敵人知自己有毒或唔好味。每一隻都同時具備雄性同雌性嘅生殖器官,生喺身體嘅右邊,直到交配嗰陣將兩個性器官擠埋一齊,以交換精子。例子有:眼海兔(Apiysia pculifera)、黑枝鰓海兔(Dendrodoris nigra)、青高海兔(Hypseldoris festiva)等。

香港亦可搵到超過300種潮間帶嘅雙殼綱動物。佢哋嘅殼有2個以齒同彈性韌帶接合著嘅鉸。

海洋裏面,當然唔少得八爪魚、烏賊同墨魚呢三類最進化嘅軟體動物。佢哋都有特別發達嘅腦同有趣嘅生活習性,甚至有科學家認為有狗嘅智力。據記錄,香港至少有13種墨魚,10種烏賊,7種章魚(包括鸚鵡螺)。佢哋一般分布喺潮下帶嘅淺海或深海度。例子有:白烏賊(Sepioteuthis lessoniana)、小砂烏賊(又叫做柏氏四盤耳烏賊Euprymna berryi)、有劇毒嘅藍圈八爪魚Hapalochlaena lunulata)等。

生態價值[編輯]

軟體動物係食物網裏面重要嘅一部分。例如蝸牛,佢哋會加速植物體嘅分解過程,同時亦係螢火蟲幼蟲,紅頰獴等動物嘅食物;海洋裏面嘅八爪魚會捕食蟹同其他甲殼動物,同時亦係人類豐富嘅海產資源。

近年因政府建議發展人工泳灘而受爭議嘅龍尾潮間帶,喺民間環保關注團體嘅研究下,發現到至少有180種動物,當中亦包括雙殼綱、腹足綱、頭足綱同祼鰓綱等軟體動物,呢項爭議亦成為咗近年嘅重大環保新聞之一。

資料來源[編輯]

  • 漁農自然護理署網站——「香港物種:香港紅樹林的動物」一文
  • 《香港動物原色圖鑑》 ISBN 962-02-0003-9
  • 《香港生態情報》 ISBN 962-04-2386-0
  • 《小泥灘‧大發現:龍尾潮間生物圖鑑》
  • 《香港海洋生態》 ISBN 962-86562-1-X
  • 《Cephalopods of Hong Kong》

參閱[編輯]

睇埋[編輯]