馬棚先難友紀念碑

馬棚先難友紀念碑或叫馬場先難友紀念碑（英文：Race Course Fire Memorial）喺香港銅鑼灣掃桿埔香港大球場後山山麓嘅咖啡園墳場「戊午馬棚遇難中西士女公墓」裏面，係東華醫院為紀念1918年跑馬地馬場大火遇難者而起。紀念碑喺2010年1月21號得到確認為一級歷史建築^[1]。2015年10月23號，政府宣佈將紀念碑評為法定古蹟並喺同日刊憲^[2]。

史[編輯]

早年嘅跑馬地馬場，畀唔係英國人嘅馬迷觀賞賽馬嘅看台，係用竹木搭成嘅「馬棚」，1918年2月26號係香港賽馬「週年大賽」嘅第二日，馬棚迫滿咗觀眾，結果不勝負荷喺下晝三點幾倒冧，馬棚下面嘅熟食檔俾冧落嚟嘅棚架打翻，煮食爐火燒着咗木棚，引起火警，風乘火勢一發不可收拾，唔少人因為走避不及而被燒死，造成600幾人死亡，成為香港歷史上死傷最嚴重嘅災難之一。

東華醫院喺火災之後派人去救援同執拾殘骸，主席唐溢川帶領去起公墓作為安葬遇難死者嘅永遠墳場，得到香港政府撥出掃桿埔加路連山山麓嘅土地，喺1922年8月正式動工，所有死者全數安葬喺咖啡園墳場裏面嘅「戊午馬棚遇難中西士女公墓」，並起咗馬棚先難友紀念碑做紀念。1993年墳場進行大型翻新工程，係由香港賽馬會捐出相關工程費用。