鳳院

鳳院，係廣東從化嘅一條村，行政屬廣州市從化區江埔街道鳳院行政村。南宋開村，世居村民姓歐陽。2000年12月，成咗廣州市內控歷史文化保護區。

史

南宋年間，歐陽氏由江西廬陵搬來從化開村，條村對住鷓鴣山。明隆慶三年（1569年），知縣唐世諄話呢度「惟山秀拔、雙鳳其模」，將鷓鴣山改咗叫「雙鳳山」，寫咗《祭雙鳳山文》，仲刻石棟喺村口。條村因爲咁起名叫「鳳院」。

佈局

鳳院村建築地闊280米，最深有300幾米，村頭有大榕樹。村頭門樓掛「鳳院」木匾，對聯係「鳳立丹山舒錦繡、院開大地建文章」。村前係月牙形風水塘。有12條巷，建築排列有緻。村面有5間祠堂，其中雲簏公祠、月竹公祠同京恩公祠都係歇山頂。巷中間係水渠，花崗岩石砌邊，青磚鋪底。兩邊地面青磚鋪到去牆腳。

建築

鳳院村整體建築規模大，用咗大量嘅花崗岩石、灰塑、木雕，尤其是祠堂建築嘅封簷板上高刻住人物故仔、大戲場景，反映咗古代鳳院村民鍾意大戲。民居結構同規模都差唔多，有啲三間兩廊，亦有五間兩廊。