鴛鴦 (嘢飲)

鴛鴦

鴛鴦係１種源自香港大牌檔同西茶檔攤嘅特色嘢飲。呢樣嘢飲其實就係將咖啡溝埋奶茶一齊嘅混合飲品，結合咗咖啡嘅香醇同埋奶茶嘅濃滑，呈現出啡紅嘅色澤而香味濃郁，口感複雜而層次豐富，味道嘅特點係苦中帶啲回甘，而且質地好似絲咁柔滑。

鴛鴦可以熱飲亦可以凍飲，啱啱沖調好嘅版本通常唔落糖，方便飲嘅人可以按住自己鍾意而調味。呢款飲品好受歡迎，而家只要行入是但一間港式茶餐廳都可以嘆到美味又有特色嘅鴛鴦，呢樣嘢成日出現喺香港嘅大牌檔、茶餐廳、港式快餐店同埋港式西餐廳裡面，成為日常生活裡面唔少得嘅一部分。

起源

華人地區原本係冇飲咖啡同奶茶嘅習慣，兩者都係英國人喺19世紀中建立殖民地之後引入去香港，而奶茶喺香港進一步發展出獨特濾網嘅沖調方法而成為絲襪奶茶。不過，鴛鴦嘅起源冇得考證，有個講法係，鴛鴦係由喺碼頭做嘢嘅咕喱發明出嚟，因為以前並唔普及去用起重機，所以需要好多搬運工人喺碼頭去幫啲貨船裝卸貨物呢啲勞力工作，當呢啲搬運工人喺小休嗰陣時為咗解除飢渴同埋補充體力仲有提神，就將有苦味同埋帶刺激性嘅咖啡溝埋茶水嚟一齊飲。鴛鴦後嚟由草根階層開始擴展到唔同嘅社會階層，而且深入民心，成為咗香港嘅經典嘢飲。另外有講法話，鴛鴦嘅起源係嚟自香港嘅大牌檔，成為咗平民化嘅關鍵。

鴛鴦原本係１種水上禽鳥嘅名，佢哋嘅特色係公同乸喺外觀上有好大分別，公嘅顏色艷麗啲，乸嘅毛色就灰暗啲，不過鴛鴦公乸就成日一齊生活，所以喺中國就有一雙一對嘅含意，而鴛鴦飲品係咖啡溝埋奶茶一齊，特顯咗兩種嘢雖然唔同，但係就可以好好咁溝埋一齊。

製作

最正宗鴛鴦嘅份量其實有個口訣：「７茶３啡適量奶」，意思即係７成奶茶同埋３成咖啡（不過呢個並唔係固定唔變，至於紅茶同咖啡各自嘅沖調份量就要因應唔同師傅嘅方法而定），其中奶茶一般會用錫蘭紅茶同埋淡奶。熱飲就要跟客人自己鍾意而落砂糖，而糖尿病嘅人就可以落代糖。凍飲嘅話就會落白糖漿，水吧喺呢方面會做埋，但係如果嗌凍飲又唔飲得太甜嘅話，可以喺落單嗰陣時講明要「少甜」。

鴛鴦後尾仲發展出一種叫做「鴦走」嘅沖調方法，呢樣嘢類似茶走咁樣，即係熱飲嗰陣時將淡奶轉做煉奶，因為煉奶嘅糖分高啲，同埋佢本身已經有甜味，所以鴦走一般唔需要再落糖，只要用支茶匙搞一搞混和一下就飲得。

細路版飲品

内文：兒童鴛鴦

鴛鴦原本係由港式奶茶溝埋咖啡而成，不過咖啡唔啱年紀細嘅細路飲，所以香港就出現咗另一種叫做「兒童鴛鴦」嘅嘢飲，呢種「鴛鴦」因為冇咖啡因，熱飲或凍飲都得，所以啱晒畀啲細路去飲。

文化象徵

• 鴛鴦被睇成係象徵住香港文化，用嚟比喻香港中西文化交融嘅現象。鴛鴦同絲襪奶茶都被收錄喺香港非物質文化遺產。
• 由香港提供嘅颱風名「鴛鴦」嘅來源係嚟自呢款流行嘢飲。

睇吓

• 絲襪奶茶
• 茶走
• 鴛鴦炒飯