黃獎

黃獎
出生日	1964年2月28號  （60歲）
國籍	香港
母校	陳瑞祺 (喇沙) 書院
職業	小說家
[改維基數據]

黃獎（Anthony Wong；1964年2月28號—）係香港作家、水墨畫家同廣告創作人，任職於廣告及傳媒界超過廿年，同時致力推動青年創作同潮流閱讀，而家喺都市日報撰寫專欄，並擔任新城數碼生活台《潮讀四千年》節目主持，以現代人嘅視角解讀中國歷史文化。

小說創作

2011年開始出版小說，著作有玄俠小說《首誌封神》同《首誌封神２》。用現代人嘅視角改編名著《封神榜》，破除咗正邪對立嘅傳統，用現代市場元素演繹古代神話戰爭，用一班道術少年嘅成長過程去揭視成人世界嘅矛盾。曾經喺《品尊月刊》寫專欄，用《首誌封神》裏面嘅角色概念，解構香港嘅名人眾生相。

2014年出版電子書，第一集「奇緣非註定，道術可速成」喺Google Play圖書免費推出。

推動青年創作

黃獎喺2011年創辦《萌動雙月刊》，喺超過一百一十間中學免費派發，畀學生投稿。同年，成立咗「萌動小說團」，出版《萌動小說集》、《萌動小說集II》及、《萌動小說集III》，第一年收錄咗八個中學生嘅短篇小說創作，並喺聖誕書展舉行新書發佈會。喺2011到2014年間，走訪超過三十間中學，推動學生創作。2012年，獲倪匡先生授權，續寫咗《非人協會》，同香港小說會合作，推出《新‧非人協會II》。

推廣潮流閱讀

黃獎喺《萌動雙月刊》訪問喬靖夫、天航、深雪、文地貓、大泥、路邊攤等創作人。並擔任新城電台節目主持，曾喺電台中介紹九把刀、御我、林詠琛等潮流作家。喺九十年代，黃獎翻譯過美國漫畫「蝙蝠俠與特警判官」Batman vs Judge Dredd，並喺、香港經濟日報、東Touch、新報、Recruit寫專欄，介紹美國漫畫文化。

水墨畫

2006年開始畫水墨畫，繼承咗著名畫家羅冠樵嘅踏實畫風，並融合西洋印象派技法，用「留白」嘅方式演繹光影。2012年，創出「字在畫中」嘅風格，佢嘅作品曾喺香港文化中心六度展出。

專欄寫作

黃獎而家喺都市日報寫緊專欄，介紹潮流文化同電影，並曾經喺《品尊月刊》撰寫封面故事。佢亦為《社會與公益》寫過關於慈善事業人物嘅專訪，訪問過楊受成同趙曾學韞。

廣告創作

黃獎喺廣告及傳媒界任職超過二十年，曾經喺香港經濟日報、成報、東周刊、壹週刊、南華傳媒、新城電台及觸動傳媒任職。

喺2007年加入GROUP M廣告公司，開辦ACTIVATION，提倡「內容式廣告」（Branded Content）。將廣告同內容結合，着重資訊性同娛樂性，同時兼顧品牌價值。