楊受成

出自維基百科,自由嘅百科全書
Jump to navigation Jump to search
楊受成
英皇集團董事局主席
性別
出世 (1943-03-03) 1943年3月3號(76歲)
Flag of Japan.svg 日佔香港[1]
國籍 中華人民共和國 中華人民共和國
親屬 楊成(阿爸)
楊政龍(仔)
楊其龍(仔)
楊諾思(女)
楊玳詩(女)

經歷
鐘錶店老闆、好世界集團老闆、英皇集團老闆

楊受成1943年3月3號—)係香港商家企業家中國廣東潮州人,英皇集團主席,阿爸係已故英皇公司創辦人楊成

1994年3月19號,楊受成用1,300萬港元競投得9號車牌,當時係全球最貴,打破世界紀錄[2][3]

生平[編輯]

家族背景[編輯]

早喺1942年,楊受成阿爸楊成開設「成安記錶行」,為日後英皇集團嘅業務發展奠定基石[4]

早年生涯[編輯]

楊受成喺香港出世,籍貫廣東省潮州。1964年,楊受成喺九龍彌敦道開咗自己嘅鐘錶店──「天文台錶行」,兩年後於1966年成功攞到勞力士錶同埋歐米茄嘅代理權。佢努力不懈開拓業務,同年開始經營珠寶生意,之後更擴展至其他行業。[5]

事業發展[編輯]

經過多年努力,楊受成已經成功將一間鐘錶店發展成為多元化嘅綜合企業──英皇集團,業務包括金融、地產、鐘錶珠寶、娛樂、酒店、傳媒、傢俬及室內佈置、電子競技同埋共享工作空間等,亦已經成功將業務由香港擴展到中國、澳門、泰國、印尼、朝鮮、美國同埋歐洲等等嘅地方,附屬公司同分支機構超過500間,僱員有7,000人咁多。[6]

金融業務[編輯]

英皇集團嘅金融業務係集團嘅主營業務,英皇金融證券集團[7]旗下分行數目係同行之冠,並已經喺澳門同東南亞建立業務。旗下包括專營外匯買賣業務嘅英皇金融集團(香港)有限公司[8]同埋從事黃金兼貴金屬買賣服務嘅英皇金業投資(亞洲)有限公司。而集團亦都一早喺1990年將業務擴展到澳門,成立咗英皇金融集團(澳門)有限公司[9]。英皇證券集團[10]就專營證券及期貨經紀業務,旗下英皇證券(香港)有限公司同埋英皇期貨有限公司代客買賣喺香港同埋多個海外金融市場掛牌嘅股票、債券、基金、期權連衍生產品。為提供更全面嘅一站式理財服務,亦設立咗另一附屬公司英皇財富管理有限公司。另外,集團亦向企業提供各類融資安排嘅專業意見,亦有財務貸款服務。英皇證劵集團已經喺2007年4月喺香港聯合交易所主板上市(香港股票編號717)。

地產業務[編輯]

英皇集團(國際)(股份代號:163)負責地產業務,1990年上市,係英皇集團核心業務之一。為咗落實集團多元化發展策略,英皇集團(國際)不斷努力發展、投資同埋管理各類型地產項目。項目咩嘢都有,包括大型綜合發展項目、寫字樓、購物商場、住宅、酒店,同埋共享工作空間等等,分佈喺香港、澳門同埋中國各個主要城市。[11]當中大多位處喺全球著名地段,包括香港羅素街、北京長安街、同埋倫敦牛津街等等。其項目包括淺水灣「the pulse」、「南灣御苑」、舂坎角「御濤灣」、大埔嘅低密度住宅大樓「龍成堡」同「映月灣」、 西營盤「維港峰」、長沙灣「喜遇」同屯門「珀居」等等。公司亦買入倫敦牛津街181-183號全幢商廈做投資,拓展海外市場。旗下嘅北京英皇集團中心更獲得由北京商務中心區管理委員會頒發 「六星超甲級樓宇」同「中國寫字樓金地標」殊榮。

鐘錶珠寶[編輯]

英皇鐘錶珠寶[12]係集團嘅基石業務,2008年7月喺香港聯合交易所上市(香港股票編號887)。經過多年發展,而家已經喺國際享負盛名,分店佈滿香港、澳門各購物旺區,專門代理世界一級嘅鐘錶品牌,好似勞力士卡地亞百達翡麗伯爵歐米茄等。而喺珠寶鑽飾方面,英皇鐘錶珠寶獨特用心嘅設計,贏盡國際口碑,奠定咗喺亞洲珠寶界嘅地位。2009年又喺尖沙咀嘅歷史建築物「1881」成立第一間珠寶旗艦店。2013年一度衝出國際,喺新加坡連開四店。2018年,業務更打入馬来西亞。

娛樂[編輯]

英皇娛樂集團[13]喺1999年成立,專搞本地同外國唱片嘅製作重有發行、音樂出版、藝人管理、演唱會、舞台劇製作、電影電視製作同多媒體業務等等。英皇電影[14]就致力發展、製作優質電影,並喺全球發行。同時以品牌「英皇電影城」同埋「英皇UA電影城」喺中國內地拓展電影院業務。2017年成立英皇文化產業集團有限公司(港交所:0491),同時因應電子競技市場發展,喺2017年9月成立附屬公司「英皇電競」。

酒店[編輯]

英皇集團旗下而家有嘅酒店包括位於澳門嘅英皇娛樂酒店、香港灣仔嘅英皇駿景酒店,同埋澳門嘅盛世酒店,另於香港經營兩間服務式住宅MORI MORI同埋The Unit。

傳媒[編輯]

英皇集團旗下嘅新傳媒集團喺1999年成立,從事出版同埋發行,每星期出版唔同刊物,五本刊物分別係《東方新地》、《新假期》、《新Monday》同埋《經濟一週》。隨著免費報章出現,傳統報章近年嘅銷量大幅下降,加上讀者讀報習慣有所改變,《新報》長期處於虧蝕狀態,決定2015年7月12日起停刊,所有受影響員工都獲合理賠償同埋妥善安排。

新傳媒喺本地同埋國際比賽中都拎到機構頒授獎項,如Galaxy Awards、Astrid Awards、「亞洲出版大獎」同埋「傳媒轉型大獎」,又喺Marketing Magazine Spark Awards for Media Excellence卓越傳媒大獎2017中橫掃一共33項大獎 ,包括全場兩個最高榮譽大獎 Media Brand of the Year 「年度最佳媒體品牌大獎」同埋 Media Owner of the Year 「年度最佳媒體」。

傢俬及室內佈置[編輯]

歐化傢俬喺1975年成立,專門代理歐洲嘅高級傢俬,為歐化國際有限公司(股份代號:1711)所管轄。歐化傢俬網羅大量風格時尚、舒適耐用嘅品牌,零售門市遍佈香港咁多區。除咗零售之外,又透過旗下唔同品牌將業務作多元化發展,包括從事床褥、 梳化同埋床品批發同零售嘅歐化寶、主打優質輕巧傢俬同埋丹麥潮流家品嘅 at.home ,以及承接傢俬工程項目嘅Special Project,提供一站式家用同埋商用傢俬配套服務同產品。

電子競技[編輯]

英皇電競喺2017年成立,先後喺2017同埋2018年度盛大舉行「英皇電競菁英盃」,通過賽事發掘香港電競人才。之後喺2019年首次舉辦「網紅盃」,將娛樂、電競、音樂會三位一體,畀觀眾多層次嘅享受。英皇電競旗下英雄聯盟戰隊G-REX喺2018年首度亮相職業聯賽,成立第一年即入圍「英雄聯盟世界大賽」,係首支打入呢個比賽十六強嘅港資戰隊。G-REX目前共有兩個梯隊參與唔同階段的聯賽。

共享工作空間[編輯]

英皇集團嘅第一個共享工作空間項目Mustard Seed位於灣仔英皇集團中心,為年輕創業者提供資源、合作機遇同埋人際網絡,亦以唔多於市值租金一半嘅優惠價租出辦公位。呢個項目參與咗2017年施政報告提出「青年共享空間計劃」,支持初創企業同埋青年人創業。

家庭[編輯]

楊受成大仔楊其龍主要打理Dragon-i及tasmania ballroom,二仔楊政龍而家係英皇集團執行董事,大女楊諾思負責營運英皇鐘錶珠寶,二女楊玳詩就主理英皇證券集團[15]

近況[編輯]

現時主要職位[編輯]

楊受成係英皇集團嘅創辦人,而家係英皇集團主席。[16]

榮譽[編輯]

楊受成咁多年嚟嘅善行贏咗各方面嘅認同同獎項:

獎項同名銜[17][編輯]

年份 獎項同名銜
2019 獲選「第十六屆(2019)中國慈善榜最具影響力慈善領袖」
入選「美國福布斯香港50富豪榜」
2018 獲選「第十五屆(2018)中國慈善榜年度慈善領袖」
2017 入選「美國福布斯香港50富豪榜」
獲選「第十四屆(2017)中國慈善榜終身成就獎」
2016 入選「美國福布斯香港50富豪榜」
獲選「第十三屆(2016)中國慈善榜年度十大慈善家」
2015 入選「中國慈善排行榜2015年度中國十大慈善家」
2014 入選「美國福布斯香港50富豪榜」
入選「中國慈善排行榜2014年度中國十大慈善家」
2013 入選「2013中國慈善排行榜 - 中華十大慈善家」
入選「美國福布斯全球億萬富豪排行榜」[18]
入選「美國福布斯香港50富豪榜」[19]
2012 入選「2012中國慈善排行榜 - 中華十大慈善家」[20]
入選「最具愛心捐贈個人獎」[21]
入選「美國福布斯香港40富豪榜」 [22]
登入「美國福布斯世界億萬富豪榜」[23]
2011 「中華慈善獎.最具愛心慈善捐贈個人獎」[24]
入選「香港40富豪榜」-美國福布斯
2010 榮登「2010中國慈善排行榜」
獲評選為「全國十大慈善家」
2009 「中華慈善獎.最具愛心慈善捐贈個人獎」
當選為「影響中華公益的60位慈善家」,成為五位香港得獎者其中一位
獲選為「2009十大慈善家」
列入「2009中國慈善排行榜」-中國社會工作協會
2008 「世界華人公益慈善大獎」-世界華人協會
「中華慈善獎-最具愛心慈善捐贈個人獎項」-民政部
獲委任為「名譽教授」-廣東金融學院
2007 「最具影響力慈善項目提名獎」-國家民政部中華慈善獎
「慈善特別貢獻獎」-中國民政部
獲列入「2007中國慈善排行榜」-中國民政部
獲頒發「世界傑出華人獎」重出任埋嗰個會嘅「永遠榮譽會長」-世界華人協會
獲頒授「榮譽商學博士學位」-美國西阿拉巴馬州大學
獲委任為「學院董事」同埋「名譽院長」-復旦大學上海視覺藝術學院英皇表演藝術學院
做咗「無國界社工永遠榮譽會長」
2006 「中華慈善事業突出貢獻獎」-中華慈善總會
獲「中華慈善人物」稱號
出任「亞洲職業籃球總會永遠榮譽會長」
2005 「中華慈善獎」-中國民政部同中華慈善總會聯合頒發
中國「全國十大社會公益之星」
2000 評選為「美國百大權力人士」-美國電影雜誌Hollywood Reporter
1998 獲委任為「名譽校董」-北京大學
1994 榮獲頒授「名譽法學教授」-中國政法大學
「中華全國律師協會名譽顧問」榮銜-中華全國律師協會

社會公職同慈善活動[編輯]

楊受成好相信「今天行有餘力,就得回饋。」楊受成一向積極投入社區服務,身體力行,曾經喺1976年創立咗「南九龍獅子會」。喺楊受成嘅帶領之下,集團抱著「取諸社會,用諸社會」嘅宗旨,積極貢獻社會,前前後後成立咗三個慈善基金,有系統咁搞慈善活動。1997年頭,英皇集團正式成立「英皇慈善基金」,推動香港同國內教育、醫療、文化、社區、環保、扶貧、扶幼重有扶老等等嘅工作,幫助有需要嘅人;2004年初又成立「新報慈善基金」,發揮傳媒嘅影響力去籌募更多善款;到到2008年,楊受成再用個人名義成立「楊受成慈善基金」[25],主力推動發展各種非牟利嘅體育、教育同埋文化活動[26]

中國大陸[編輯]

楊受成話:「我生就生於香港,但條根就喺大陸,個心連住祖國,同國家民族好醜都一齊受。」2007年香港回歸祖國十周年,楊受成為咗表達興奮同欣慰嘅心情,特別比咗多過港幣400萬贊助官方慶祝活動「香港回歸十周年煙花匯演晚宴」。另一方面,楊受成咁多年嚟推動大陸公益事業都出盡力,好多次都透過唔同嘅慈善基金搞啲資助出嚟,佢自己一個人計計埋埋嘅捐款接近2億港幣咁多。曾經參與過嘅慈善活動數落有1991年「華東水災」、1998年「湖北賑災」同埋捐款興建「東華三院楊成紀念長期護理院」、2004年建「成龍、楊受成公益慈善基金保定兒童福利院」、2006年開設「湖北慈善香港英皇關愛老人護養中心」同「成龍、楊受成公益慈善基金保定老年公寓」、2007年夾埋「無國界社工」喺湖北開創善終服務,重獲得國家民政部中華慈善獎「最具影響力慈善項目提名獎」、2008年捐助中國廣泛地區雪災同四川地震救災工作、2009年同河北省順平縣民政局合作開咗「楊受成慈善基金(順平)老年服務中心」、2010年同河北省雄縣民政局合作開設「楊受成慈善基金(雄州)老年服務中心」、捐助青海地震同甘肅泥石流救災工作等等。而中國運動員喺2008年北京奧運上面有出色表現,為咗Show啲支持同嘉許,又撥捐超過千萬人仔撐咁多個金牌得主嘅鼓勵金[27][28]

香港[編輯]

楊受成近排喺香港搞過嘅慈善活動有2003年嘅「工商界關懷非典受難者基金」、2005年嘅「攜手送暖到南亞慈善演唱會」、2009年嘅「行善精英慈善行」、2010年嘅「愛.回味美食同樂宴」,受惠嘅團體就包括有香港公益金、東華三院、香港世界宣明會、香港紅十字會、善寧會同埋聖雅各福群會等等,令到勁多有需要嘅人都得到幫助。

慈善基金[編輯]

楊受成非常落力搞教育嘅事業,除咗喺香港7間大專院校搞「英皇慈善基金獎學金」之外,重捐助好多個國內教育基金,包括「中國司法部教育基金」、「中國政法大學楊受成法學教育基金」、「北京大學教育基金」同「廈門教育基金」等等,令啲成績好得好出色嘅拎到獎勵、無咩錢又無書讀嘅就可以有番返學嘅機會。另外亦拎出人民幣3,000萬蚊搞咗間「復旦大學上海視覺藝術學院英皇表演藝術學院」,培育國內有演藝潛能嘅新一代。

軼事[編輯]

2011年嘅2月8號,當時嘅中共中央總書記國家主席胡錦濤喺除夕當日,亦即係2月2號去到河北省保定市嘅一個由楊受成慈善基金所設立嘅老年服務中心,同中心嘅老人和孤兒送上溫暖同祝福。

喺2008年5月13號由英皇集團既董事局主席楊受成同埋國際巨星成龍博士所設立嘅「成龍、楊受成公益慈善基金」喺北京嘅中國社會工作協會捐左1,000萬元人民幣俾中國民政部,用嚟撐四川省汶川縣嘅災區抗震行動。楊受成話佢對呢次不幸災難非常之哀傷,希望今次嘅捐款可以帶頭幫到災民嘅困境。

2010年4月15號 中央人民政府駐港聯絡辦嘅副主任周俊明先生代表政府收咗楊受成博士對中國青海玉樹7.1大地震捐出嚟嘅港幣五百萬蚊善款。周俊明先生俾楊受成博士佢好高嘅評價,讚佢好關心災區嘅災民,而且重好極速咁做嘢。

英皇集團嘅董事局主席楊受成喺2009年嘅4月2號用佢私人慈善基金「楊受成慈善基金」捐咗120萬人民幣,同喺嗰度嘅順平縣民政局合作,喺順平縣設立一棟老人服務中心。呢一座中心會叫做「楊受成慈善基金(順平)老年服務中心」[29]

喺2009年度嘅「中華慈善獎」頒獎典禮入面,楊受成博士等等六位有份攞獎嘅人得到中共中央政治局委員兼國務院副總理回良玉喺北京中南海紫光閣入面親身接見,接見嘅規格係歷年嚟最高嘅[30]

喺2010年嘅青海發生咗一場7.1級嘅地震,英皇娛樂集團老闆楊受成除咗話會捐出500萬蚊賑災之外,重會睇吓佢旗下嘅藝人會捐出幾多錢,再打孖捐贈,希望可以帶到個頭。呢個舉動果然得到好多人嘅支持,除咗容祖兒肯捐10萬蚊之外,嚟緊會搞3場演唱會嘅Twins亦都會將佢哋其中一場做show賺嘅錢全部捐晒出嚟,更加多其他嘅藝人都會陸陸續續加入佢地嘅救援行動[31]

楊受成喺1994年3月19號以1,300萬港元競投得9號車牌,一度係世界最貴,後來俾阿聯酋所打破。去到2008年2月23號運輸署舉行嘅車牌拍賣,冇字頭嘅「18」號車牌以1,650萬港元成交,打破持續近14年嘅香港紀錄。

參考[編輯]

  1. http://www.emperorgroup.com/tc/about-us/chairman-profile.php
  2. http://www.mpinews.com/htm/INews/20080217/ta71315w.htm
  3. http://www.7days.ae/en/2008/02/17/plate-number-%E2%80%981%E2%80%99-breaks-the-world-record.html[失咗效嘅鏈]
  4. "英皇集團主席簡介". (原先內容喺2014年12月2號歸檔). 喺2014年8月19號搵到. 
  5. "英皇集團主席簡介". (原先內容喺2014年12月2號歸檔). 喺2014年8月19號搵到. 
  6. "英皇集團主席簡介". (原先內容喺2014年12月2號歸檔). 喺2014年8月19號搵到. 
  7. 英皇金融證券集團
  8. 英皇金融集團(香港)有限公司
  9. 英皇金融集團(澳門)有限公司
  10. 英皇證券集團
  11. 英皇地產
  12. 英皇鐘錶珠寶
  13. "英皇娛樂集團". (原先內容喺2019年7月6號歸檔). 喺2019年12月28號搵到. 
  14. 英皇電影
  15. [1] 互聯網檔案館歸檔,歸檔日期2014年12月2號,.
  16. "英皇集團主席簡介". (原先內容喺2014年12月2號歸檔). 喺2014年8月19號搵到. 
  17. "英皇集團主席簡介". (原先內容喺2014年12月2號歸檔). 喺2014年8月19號搵到. 
  18. 英皇集團主席楊受成博士入選「2013美國福布斯全球億萬富豪排行榜」[失咗效嘅鏈]
  19. "英皇集團主席楊受成博士入選「2013美國福布斯香港50富豪榜」". (原先內容喺2013年12月31號歸檔). 喺2013年3月18號搵到. 
  20. 2012中國慈善排行榜
  21. 英皇集團主席楊受成博士第五度入選「具愛心捐贈個人」
  22. 英皇集團主席楊受成博士入選「美國福布斯香港40富豪榜」
  23. 英皇集團主席楊受成博士登入「美國福布斯世界億萬富豪榜」
  24. "英皇集團主席楊受成博士四度獲頒「中華慈善獎」". (原先內容喺2012年4月24號歸檔). 喺2011年8月10號搵到. 
  25. "楊受成慈善基金官方網站". (原先內容喺2011年5月21號歸檔). 喺2011年5月16號搵到. 
  26. "英皇集團主席簡介". (原先內容喺2014年12月2號歸檔). 喺2014年8月19號搵到. 
  27. "英皇集團主席簡介". (原先內容喺2014年12月2號歸檔). 喺2014年8月19號搵到. 
  28. 楊受成慈善基金Facebook
  29. "楊受成關愛老人計劃啟動 捐人民幣120萬於河北省助建老人服務中心". (原先內容喺2011年7月30號歸檔). 喺2011年4月21號搵到. 
  30. "中共中央政治局委員、中國國務院副總理回良玉先生 接見英皇集團主席楊受成博士". (原先內容喺2011年12月16號歸檔). 喺2011年4月21號搵到. 
  31. http://www.taijisou.com/k/?dXJsPWh0dHA6Ly95dWxlLnNvaHUuY29tLzIwMTAwNDE2L24yNzE1NTIzOTAuc2h0bWwmd2Q9wfgg1t0g0MLOxQ==[失咗效嘅鏈] ,Twins伸援手赈灾捐个唱酬劳 杨受成捐500万,搜狐娛樂

出面網頁[編輯]