黃玉瑜

黃玉瑜（1902年—1942年），廣東開平人，畫則師同原勷勤大學教授，舊底做工嘅記名縮寫係「Y.Y.W」。對美國、南京、廣州等地嘅城市建設同建築教育，作出過重要貢獻。

簡介

渠出世早年就去咗美國，1925年喺麻省理工學院（MIT）建築系畢業。1929年應時任南京市工務局局長林逸民嘅邀請，放棄咗喺美國穩定嘅工作同生活，同屋企返咗中國大陸，先後喺南京中山陵陵園管理委員會、南京國都設計技術專員辦事處、廣東信託公司、嶺南大學、勷勤大學、中山大學等機構做過。

中日戰爭陣，黃玉瑜加入咗中央雷允飛機製造廠，為中美空軍提供維修服務及後勤支援。黃負責過雲南瑞麗廠區嘅建築設計，廠房被毀後，仲帶隊技術人員前往雲南保山勘測選址。1942年5月4號，日本空軍轟炸保山，黃玉瑜中彈，傷重不治。

作品

喺美國畢業後參與過包括華盛頓大廈、哈佛大學哈佛醫學院萬德比特宿舍，仲有費邊大廈，及紐約康奈爾醫院等重要地標性、公共建築嘅設計。

返咗中國後參與咗南京中山陵、南京首都規劃等一系列嘅建設。此後喺廣州，設計過孫逸仙紀念醫院、泰康路嘅華安樓、嶺南大學嘅廣寒宮。

故居

而家喺廣州嘅農林上路七橫路7號有留低黃自建嘅住宅小洋樓，表現咗實用同藝術之間嘅平衡，喺東山洋樓中非常獨特，融合東西方乃至伊斯蘭風格，畀列入咗第一批廣州歷史建築。