2023年歐洲歌唱大賽

2023年歐洲歌唱大賽（英文：Eurovision Song Contest 2023）係第67屆歐洲歌唱大賽，主辦地係上屆亞軍國英國嘅利物浦，呢年總共有37國參加，係自2014年以嚟最少。最後由瑞典嘅羅琳攞冠軍。第二名同埋第三名就分別由芬蘭同埋以色列攞到。

舉辦地

上屆比賽由烏克蘭贏咗，根據規矩，今屆應該係喺烏克蘭度搞，不過由於俄羅斯入侵烏克蘭，令到比賽安全風險好高，最後經過商議，歐洲廣播聯盟決定由亞軍英國接辦，最後揀咗利物浦作為主辦城市。上一次唔係由冠軍國主辦嘅大賽已經係1980年嘅事，當年冠軍以色列因為財政問題同大賽日子撞正國定假期而決定退出。

投票制度

2022年11月22號，歐洲廣播聯盟宣佈呢屆大賽新投票制度：兩場準決賽將會完全由觀眾投票話事，至於決賽就繼續沿用觀眾投票同各國評審各佔一半嘅制度。

同時，今年開始，唔係參賽國家嘅觀眾都可以透過歐洲歌唱大賽嘅官方應用程式嚟投票，分數會統一計入「全球其他地方」入面。

記錄

• 羅琳代表瑞典攞到第七次冠軍，平咗愛爾蘭嘅記錄。
• 羅琳亦都係繼愛爾蘭嘅莊尼·羅根之後，第二個參賽者攞到兩次冠軍。
• 芬蘭代表Käärijä嘅歌曲〈Cha Cha Cha〉攞到第二名，刷新咗芬蘭話歌曲喺大賽入面嘅最高排名。
• 德國又再冧莊包尾，同時係近十年嚟第四次包尾。