5D國際象棋
| 5D國際象棋 | |
|---|---|
| 5D Chess With Multiverse Time Travel | |
 | |
| 類型 | 國際象棋變體 |
| 平台 | Windows |
| 制作人 | Thunkspace |
| 模式 | 單人、多人 |
《5D國際象棋》（英文：5D Chess with Multiverse Time Travel）係一款由美國Thunkspace工作室開發，經Steam同Humble Bundle喺Windows平台上面發佈嘅國際象棋變體電子遊戲。
玩法
[編輯]模式
[編輯]目前遊戲有呢幾個模式：
- 離線對弈：玩家可以喺離線模式挑戰AI，AI有4個難度等級：訓練員（簡單）（trainer (weak)）、正常難度（regular）、平衡型（困難模式）（balanced (strong)）、侵略型（困難模式）（aggressive (strong)）。遊戲除咗正常嘅8×8棋盤，仲有4×4、5×5、6×6、7×7等等嘅預設棋盤，亦都有殘局訓練同埋單兵種訓練等等嘅模式。
- 在線對弈：玩家可以同其他玩家線上捉棋，可以揀先後手同埋棋鐘[1]，亦都可以開公共房間同私人房間。
- 解謎模式：遊戲預設咗一啲一步殺、兩步殺同「平行時空」嘅謎題畀玩家玩，等佢哋熟習呢個遊戲特別嘅行棋規則同埋殺王技巧。
棋嘅行法
[編輯]喺唔牽涉到時間嘅情況之下，棋嘅行法同正常嘅象棋行法一樣，啲特別行法例如王車易位、食過路兵、兵仔升變嘅規則亦都一樣。但係啲棋穿越時空嘅行法就係另外設計嘅：雖然個遊戲名叫做「5D國際象棋」，但係玩嗰陣淨係會用到四個維度（因為國際象棋本身就係二維遊戲），分別係t軸（時間/回合）、l軸（時間線/平行時空）、x軸同y軸（棋盤入面嘅横、直）。平時正常嘅車可以喺棋盤入面打直或者打橫行，依家仲可以沿著兩種時間軸（t/l軸）行，亦即係行去其他時間線或者係同一時間線嘅過去嘅棋盤上面嘅同一格。正常嘅主教可以喺棋盤入面斜行，即係沿住x軸同y軸行一樣嘅步數，依家可以沿住任何兩支軸行一樣嘅步數。王后就可以沿著任何數量嘅軸行一樣嘅步數。國王同王后可以行嘅方向一樣，但係只可以行一格。騎士嘅行法就係向其中一個軸行兩格，然後向另一個軸行一格。兵同平時一樣，第一步可以揀向前行一格或者兩格，之後只可以前行一格，不過呢到嘅「前」可以係沿著l軸。兵食棋嗰陣除咗平時嘅斜行一格，亦都可以係沿著t軸嘅左/右去食棋。兵、車、王同后喺行棋嗰陣都唔可以穿過其他嘅棋。
遊戲入面仲額外設計咗6款特別嘅棋：
- 獨角獸（unicorn）：可以沿着「triagonal」行，即係同時喺3條軸上面行相同嘅步數。
- 龍（dragon）：可以沿着「quadragonal」移動，即係同時喺4條軸上面行相同嘅步數。
- 蠻兵（brawn）：可以沿着任意維度嘅對角線「向前」1格吃子，其餘行法同兵相同。
- 公主 （princess）：同時具有主教同車嘅移動方式，即係同時喺2條軸上移動相同嘅步數，或者只喺1條軸上移動。
- 女王 （royal queen）：移動方法同王后一樣，但係被人食咗就即刻輸。
- 普通王（common king）：移動方法同王一樣，但是被人食唔會輸。
當玩家揀咗一隻棋之後，遊戲介面會自動顯示所以符合規則嘅行法。想改變主意行第二隻棋嘅話，要取消選擇第一隻棋先。喺揀撳「提交回合」之前，玩家可以不斷試唔同嘅行法。
平行宇宙規則
[編輯]每當玩家行棋嗰陣，系統都會生成一個新嘅棋盤，而行棋之前嗰個棋盤就會保留喺過去嘅時間（t軸）入面。當一個玩家將棋行去另一個棋盤，而嗰個棋盤已經係行咗棋嘅話，就會生成一條新嘅時間線，亦即係所謂嘅「新嘅平行宇宙」。將棋行去過去嘅棋盤係改變唔到已經發生咗嘅事，只會生成新嘅時間線。一方只可以比對手開多少於兩條時間線，多出嚟嘅就會被「凍結」，雙方都唔使行棋。
當有新嘅時間線嗰陣，雙方玩家都要係激活嘅棋盤上面行棋，直到所有嘅時間線都去返「當下」（the present）呢個時間點。
勝負和
[編輯]勝負判斷標準：
- 任何一隻王被人食，或者被人將死；
- 一方認輸。
因為過去咗嘅棋盤係無法再改變，所以如果有過去嘅王被人將軍嗰陣，一定要食咗將軍嗰隻棋，如果唔係就會被將死。由於王係可以走去其他時間線，所以有啲平時係屬於將死嘅情況王可以行去其他時間線去避，但係同一個時間線入面有多過一個王嘅話被人將死嘅機會亦都大啲。
和棋判斷標準：
- 逼和：要行棋嗰個玩家無任何合法嘅行法，但係又無被人將軍，噉就係逼和；
- 死局：所有嘅時間線下，雙方剩返嘅棋力都唔足以將死對方。
- 三次重複情況：如果一個完全相同嘅情況喺棋盤上出現第三次，而且即將要行棋嘅一方都相同，或者係喺行棋一方行完之後會出現第三次重複情況，噉行棋嘅一方可以要求和局。
- 50步規則：如果喺之前雙方嘅50步棋入面，無兵行，又無食棋，噉雙方都可以要求和局。
- 協定和局：一方提出和棋要求，並得到另一方嘅同意。
發佈
[編輯]評價
[編輯]Kotaku嘅評論家Nathan Grayson話呢隻遊戲非常出色[1]。
參考
[編輯]- ↑ 1.0 1.1 "5D Chess Has Completely Broken Me". Kotaku (美國英文). 27 July 2020. 原先內容歸檔喺2020-09-17. 喺29 July 2020搵到.
- ↑ O'Connor, Alice (2020-07-22). "5D Chess With Multiverse Time Travel sure is 5D chess with multiverse time travel, yep". Rock, Paper, Shotgun. 原先內容歸檔喺2020-07-23. 喺2020-08-06搵到.