CMYK色彩模式
(由CMYK跳轉過嚟)
CMYK色彩模式，又嗌印刷四分色模式或印刷色彩模式，簡稱CMYK，係傳統四色印刷嘅數學模型，呢種色彩模式代表嘅係某種色喺實際印刷嗰陣需要溝幾多份量嘅油墨。CMYK 值通常用百分比表示，例如 0C 91M 76Y 6K 代表 ｢唔落青色墨，紅色墨落 91% 網，黃色墨落 76% 網，黑色墨落 6% 網｣。由於佢表示嘅係油墨實際上可以印到嘅色，好多RGB色彩模式表示到嘅色佢都表示唔到。
（所謂四分分色，係指將正稿分成 CMYK 四部分，因為工業印刷嘅時候四隻色係分開印嘅。）
由於用墨量會因紙質同油墨牌子有分別，所以除非要準確控制用墨量或者控制網點（例如保證印出嚟嘅細字係冇網點嘅純色），而今一般都唔會喺 CMYK 模式做正稿，而係喺最後一個工序先將排嗮版嘅嘢一次過轉做 CMYK，呢種做法叫 RGB workflow。
輸出
[編輯]工業用嘅印刷機，印彩色通常都係四色彩印，所以同 CMYK 色彩理論上有直接對應，最多只係按實際需要調校一下用墨份量，印刷用嘅正稿所以亦都可能要求係 CMYK。家下喺街邊賣啲打印機同彩色複印機，如果係鐳射打印，大多數亦都可以直接用 CMYK。
但係市面上嘅噴墨打印機好多因為標榜可以印相⸺即係要處理好多 CMYK 冇可能表達嘅色⸺好早開始已經有用其他色嘅墨（即係印刷上講嘅專色），所以就算接受 CMYK 嘅輸入，輸入嘅 CMYK 同實際嘅用墨量都未必有直接關係。例如，一啲較為平價嘅嘅噴墨打印機款式雖然只係用標準嘅 CMYK 四色墨，但係如果用 CMYK 色彩模式直接輸出，啲色（黑色尤其明顯）會淺咗，理由係部機嘅驅動程式係首先用算法將 CMYK 嘅輸入轉成 RGB，然後再用第隻算法轉返做 CMYK 輸出，結果恁住唔使轉，反而轉咗兩次，結果啲色錯嗮。