CMYK色彩模式
跳去導覽
跳去搵嘢
CMYK色彩模式，又嗌印刷四分色模式或印刷色彩模式，簡稱CMYK，係傳統四色印刷嘅數學模型，爾種色彩模式代表嘅係某種色喺實際印刷嘅時候，需要用幾多份量嘅油墨溝出來。CMYK 值通常用百分比表示，例如 0C 91M 76Y 6K 代表 ｢唔落青色墨，紅色墨落 91% 網，黃色墨落 76% 網，黑色墨落 6% 網｣。由於佢表示嘅係油墨實際上可以印到嘅色，好多RGB色彩模式表示到嘅色佢都表示唔到。
（所謂四分分色，係指將正稿分成 CMYK 四部分，因為工業印刷嘅時候四隻色係分開印嘅。）
由於用墨量會因紙質同油墨牌子有分別，所以除非要準確控制用墨量或者控制網點（例如保證印出來嘅細字係冇網點嘅純色），而今一般都唔會喺 CMYK 模式做正稿，而係喺最後一個工序先將排嗮版嘅嘢一次過轉做 CMYK，爾種做法叫 RGB workflow。
輸出[編輯]
工業用嘅印刷機，印彩色通常都係四色彩印，所以同 CMYK 色彩理論上有直接對應，最多只係按實際需要調校一下用墨份量，印刷用嘅正稿所以亦都可能要求係 CMYK。家下喺街邊賣啲打印機同彩色複印機，如果係鐳射打印，大多數亦都可以直接用 CMYK。
但係市面上嘅噴墨打印機好多因為標榜可以印相⸺即係要處理好多 CMYK 冇可能表達嘅色⸺好早開始已經有用其他色嘅墨（即係印刷上講嘅專色），所以就算接受 CMYK 嘅輸入，輸入嘅 CMYK 同實際嘅用墨量都未必有直接關係。