座頭鯨
 | ||||||||||||||||
|---|---|---|---|---|---|---|---|---|---|---|---|---|---|---|---|---|
  同人嘅對比
| ||||||||||||||||
| 物種分類 | ||||||||||||||||
| ||||||||||||||||
| Megaptera novaeangliae Borowski, 1781 | ||||||||||||||||
 座頭鯨分佈
|
座頭鯨（學名Megaptera novaeangliae；英humpback whale），又叫大翅鯨（台灣名）、駝背鯨、巨臂鯨，屬鬚鯨亞目嘅哺乳動物。喺日文，「座頭」嘅意思係指樂器「琵琶」，用嚟指鯨背嘅形狀好似琵琶咁樣。呢隻鯨魚算係好大，成熟嘅鯨魚身長有 12 至 17 米，目前最大記錄嘅雌性係 18 米。體重 36,000 kg。座頭鯨唔單止擁有所有鯨魚之中最長嘅前鰭，亦係遷徙路線最長嘅鯨魚（旅程可長達2.5萬公里）。加上獨特嘅跳出水面動作，成為賞鯨人士嘅最愛品種之一。全世界各大海洋都有座頭鯨嘅蹤跡，按地區分為多個族群，包括北太平洋、南半球同埋北大西洋品種。已列入《瀕危野生動植物種國際貿易公約》附錄。
生理描述
[編輯]
座頭鯨可以由佢哋擁有明顯駝峰嘅厚實身軀，以及黝黑嘅上半部而輕易辨認。頭部同下顎佈滿稱為節瘤嘅小瘤，依啲小瘤其實係毛囊，亦係座頭鯨嘅特色。尾部尾鰭具有斑紋同埋波浪狀聳起邊緣，好似人類嘅指紋咁樣，喺潛水過程中會往上舉起。
佢哋部分棲息於太平洋一帶，總數只剩下約4000條，亦有分布於中國黄海、東海、南海(早期仲包括大亞灣在內)。活動時多數係一雙一對活動，有洄游習性，惟游泳速度較慢。主要食物為小型甲殼類同群游性小型魚類。座頭鯨乸每2年生一次仔，懷孕期大約10個月，每次生1胎。座頭鯨可以有成40-50年命。
雄性嘅鯨魚會發出好多種複雜聲音，聽落好似「唱歌」咁，一向都引起動物學家嘅關注。
黑白相間嘅長尾翅，可達身長三分之一。胸翅具有獨特圖樣，亦可用以辨識個別鯨魚，辨別方式同凍土天鵝嘅鳥喙標記好相似。關於座頭鯨會演化出鯨科動物比例上最長嘅胸翅，目前有好多種講法。兩種最流行嘅假設為：長翅帶嚟嘅高度機動性具有可觀進化利益，或者，較大嘅表面積有助於喺寒帶同溫帶遷徙時嘅體溫調節。
群體結構
[編輯]
一般座頭鯨群體結構都較為鬆散，一般都係單獨生活，或者幾隻一齊生活嘅都有。群體生活通常喺夏天持續得較耐，咁係為咗方便互相合作搵食。
當座頭鯨公揾配偶嗰陣，通常會同其他公一齊包圍住一隻乸，通常都係競爭多過合作。競爭會持續幾個鐘，過程中爭輸咗嘅都會自動游走，剩番嗰個就會同隻乸交配。
科學家一直認為鯨語喺座頭鯨之間有重要嘅用途，但未敢肯定。
飼育
[編輯]
座頭鯨只喺夏天捕食，喺冬天佢哋就會依靠體內儲存嘅脂肪過活。座頭鯨係一種非常積極嘅捕獵者，佢哋嘅捕食對象包括磷蝦、小群嘅魚、鯡魚、胡瓜魚同玉筋魚。捕食方法包括直接攻擊或者通過用鰭拍打海水嚟將獵物擊暈。
其中最獨特嘅獵食技巧稱為「水泡網捕獵法」。一群鯨魚喺群魚嘅下面圍成一個大圈好快游動，再利用佢哋嘅噴水孔向上噴氣形成水泡網從而令群魚逼得更加密集。之後佢哋會突然擘大口向上「飇」，一啖就吞得落數以千計嘅群魚。利用呢種捕獵法嘅鯨魚多達十二條，而水泡網嘅直徑可長達30米（100英尺）。呢個或者可被稱為最奇特嘅海洋哺乳動物捕獵方式。
通常殺人鯨會視座頭鯨仔為獵食對象，但呢種威脅對於成年嘅座頭鯨嚟講係相當輕微，頂多都係造成表皮上嘅傷痕。
鯨語
[編輯]
座頭鯨唔單止有類似特技飛行嘅跳出水面動作，佢哋又長又複雜嘅叫聲亦都好出名。喺佢哋嘅低吟叫聲中，振幅同頻率重複嘅模式會喺幾個鐘甚至幾日都保持一致。由於座頭鯨只會喺交配季節呼叫，因此啲人認為佢哋嘅叫聲係用來求愛。另一個有趣嘅事實係，每條鯨魚所獨有嘅叫聲會喺幾年時間中持續進化，甚至過咗十幾年都唔會重複。
數量同埋分佈
[編輯]座頭鯨喺所有主要海洋都有發現，佢哋分佈喺從南極冰緣到北緯65度嘅廣闊海面。呢個係一個有遷移特點嘅物種，佢哋夏天生活喺涼爽嘅高緯度水域，但係喺熱帶或亞熱帶水域交配繁衍。座頭鯨通常每年遷徙路程長達25,000公里（16,000英里），令佢哋成為哺乳動物中最好旅行者之一。但係生活喺阿拉伯海嘅座頭鯨例外，佢哋長年都生活喺嗰啲熱帶海域。座頭鯨喺東地中海、波羅的海同北極海域未被發現。
二十世紀座頭鯨嘅種群數量持續增長，從1966年嘅僅僅2萬條，躍升至今日嘅35,000條。保守估計有11,600條座頭鯨生活喺大西洋、7,000條喺太平洋同大約17,000條喺南半球。
喺1950至60年代，香港鄰近嘅大亞灣曾經有座頭鯨出沒，但係俾啲日本捕鯨船濫捕，卒之絕種。2009年3月，有一條過10米長嘅座頭鯨誤闖南丫島一帶海域，係首次喺香港水域嘅首次發現座頭鯨。[2]。
註
[編輯]- ↑ Cetacean Specialist Group (1996). Megaptera novaeangliae. 2006 IUCN Red List of Threatened Species. IUCN 2006. Retrieved on 11 May 2006. Database entry includes a lengthy justification of why this species is vulnerable
- ↑ [座頭鯨首訪港 游弋南丫 長逾10米料成年 專家籲勿出海觀鯨滋擾]，明報，2009年3月18號
資料來源
[編輯]- 香港海豚保育學會網頁
- 《自然珍藏系列-鯨與海豚圖鑑》ISBN 957-9684-16-2
- 《中國鯨類》ISBN 962-86278-1-3
- 《台灣鯨類圖鑑》ISBN 978-986-7112-37-8
睇埋
[編輯]拎
[編輯]- 綠色和平--座頭鯨資料
- ARKive－座頭鯨影帶
- 70South－座頭鯨資料
- 座頭鯨叫聲分析
 |