Talk:青衣市

我知道「青衣市中心」，亦知道青衣墟，就係冇聽過「青衣市」(青衣城商場倒有一座，笑)，有人可以提供官方來源話他們命名咗一個「青衣市」嗎﹖

香港新市鎮只係規劃概念，嗰啲「乜乜新市鎮」只係規劃用名稱，並非地方行政單位，香港新市鎮從來冇「市政府」或者「鎮政府」。(就算以前區域市政局都管晒成個新界啦，唔係話「青衣市」有個市政局、「沙田市」又有個市政局喎。)

更荒謬就係，就算你想拗「新市鎮」就係「市」，青衣自己都唔係一個新市鎮，佢係荃灣新市鎮嘅一部分。「青衣市中心」只不過係荃灣新市鎮其中一個市中心。--方潤 (傾偈) 2020年3月27號 (五) 03:50 (UTC)

按內文所寫，開文人大概指青衣市中心（Tsing Yi Town Centre）。不過有無青衣市，都有得斟酌。政府確有以Tsing Yi Town為名之設施，好似青衣市區診所，Tsing Yi Town Clinic。而如今全青衣地段，都以Tsing Yi Town為名，故此報紙就會報「青衣市」某號地段。如政府公告，青衣市地段第192號[1]。政府向來都唔嚴格，Town 可以為市、市鎮、市區，按文需要而定。

新市鎮，New Town，又另一樣嘢，同Town又有所不同。Town只係人口密集地，New Town為規劃名。之不過，一落入民間口，又會有變。例如，就算馬鞍山係沙田新市鎮，都禁唔到人口叫馬鞍山新市鎮，甚至政府嘅人，自己都咁叫[2]。咁又唔怪得人，因為馬鞍山自成一角。青衣隔條水，分離感就更加，而且荃灣區又分離出葵青區，青衣又有自己鄉事委會員，青衣一般人眼中，都唔睇做荃灣一部份。事實上，政府真係有用過「青衣新市鎮」[3][4][5]。

香港用市為地名，與中國日本用市為地名，意思並唔相同，大家發展唔同。由於香港市字有承襲大清，原本只係街市咁款，有說低過墟一級，故墟市實情同義。有墟有市，交易多就多人定居。Market同Town按原本性質，查實可以互通。香港有嘅市，如太和市、西貢市。香港普遍對市嘅印象，就係市區。故此有人用青衣市，叫青衣市區，亦係人之常情。嗰度實在無好嘅統稱，青衣市中心個名又太長，太過英文，亦易混淆。

政府民間雙語用法，又成日大雜燴。唔係話官方係咁就咁，何況官方都好亂。HenryLi (傾偈) 2020年3月27號 (五) 05:51 (UTC)

呢度個「市」其實都幾得意下，就華文圈度講，其實都係比較新正嘅概念。好似唔係幾多人知，廣東省城度官方嘅搞過天河商業圈（品牌）國際化，就搞過下投票而定咗個Tinho Town出街，不過都唔似幾多用。呢家多數都只識講天河，而唔會乜商圈或者市鎮。省城比較多係市鎮概念嘅，一係就多直接講地方名，一係就講路名，不過如果係一啲大啲概鄉鎮，就似乎都比較易成為潛意識度嘅新市鎮點。

近現代意義嘅市咧，主要依托喺市政建制嘅建立，計返廣州係中華民國陣第一個建市，當其時就成咗民國嘅模範市，同港澳市政嘅發展軌跡都唔係好同，畢竟係華人主導嘅西化，仲係多華文圈嘅影響。而Town嘅概念似乎就冇點喺發展，同當局啲城市建設同規劃都有關係。

計地膽啲嘅市區概念，就停留喺傳統舊城中心區域估計，新移民大概就覺得係有高樓嘅、最早嘅高尚發展區，點都自認得「中心市區」。無論發展得點都覺係外圍地帶（唔係行政權力中心駐地）。呢個都似幾影響住民啲歸屬感，似宜家嘅市橋，計歷史並唔係番禺縣衙長時間嘅駐地，只不過二戰光復後就做咗番禺管治中心，縣同城分離咗相當嘅距離，時間耐咗反為舊禺南啲人就有同「廣州市」好唔一樣嘅歸屬感，堅持番禺人身份同時，就唔會有係廣州嘅市民嘅自我理解，相對就有「市區」理解嘅重大差異。

唔話比較遠嘅所謂京城（大家明嘅），省城、縣城嘅傳統發展中心，比較先會住民當係「正統」嘅「市區」，而對舊省城以外嘅新「市區」住民，可能就當舊省城市區係比較唔一樣嘅「市」（中心政府駐地，兼唔多似係自己友）。依家啲大嘅鄉鎮建設發展幾多都好，市鎮嘅概念都唔太有入意識，本身「市」呢家理解都有差異。

舊底嘅市政發展唔係好快，開初省城搞出市政後嘅市界，都要同兩個中心縣嘅界相磨。而未擴大市政管轄前，都仲有舊嘅市墟，好似沙河市、燕塘市、三寶墟呢幾個，依家都成咗同傳統中心市區近郊嘅範圍，用名嘅情況，又都好唔同咗，同官方同傳媒宣傳、仲有民間嘅記憶多少、方向等都有關係。——Longway22 (傾偈) 2020年3月27號 (五) 14:02 (UTC)

再補充下個人意見，Market同Town就華文圈嘅理解，應該有啲唔同，大家應該知大中華啲傳統意義嘅鎮（Town），就鄉野度講唔多係有商業交易常駐，可以話係對一定範圍嘅村做巡防嘅駐官兵建制。而多數鄉民嘅日常交易，就係喺啲市墟（Market）度搞，固定墟期同地點，但絕對唔會係官家駐防嘅地方（官同民嘅關係，大家都明喇～）。香港歸英開埠前，記得係東莞鎮嘅範圍嘛，除咗到1980年代後先清拆嘅九龍城寨，並冇乜大嘅定居點估計。而由英國管治主導嘅西化開發，應該算係市鎮嘅現代化飛躍咗好多，似乎係有意識度嘅偏差影響，香港朋友單獨講「市」、仲有理解「市區」嘅時候，就會幾唔一樣下。——Longway22 (傾偈) 2020年3月27號 (五) 14:41 (UTC)

英文Town唔同王朝下嘅鎮。鎮有鎮兵，只不過係town當中一種講法，有防守，亦可以為城、京、邑、都。現今town只不過介乎city同village之間，有啲地方會近city，有啲地方會近village，所以意思會遊移。例如香港有Kennedy Town，即堅彌地城，Bowrington，寶寧頓，並非講話佢有鎮兵，只不過新開一個住人地方，多人過village，又未至於city咁意思。Town叫市亦無不可。大概坊間死板翻譯，唔理意思，見Town就叫鎮，查實好有問題。一般英文字典，都有五六個意思。HenryLi (傾偈) 2020年3月27號 (五) 15:45 (UTC)

咁講返醒起粵人主力開拓嘅華埠（ChinaTown），多數就叫唐人街，比較返似乎都係幾「市鎮」下，追溯返或者係「埠」，係接近英文嘅「市鎮」嘅概念啩？

華文傳統度講返「城」都好唔同嘅，好似陸賈城呢啲都唔見有幾多「城」，最多圍埋牆嘅就係砲台（舊嘅九龍城應該就係呢種），基本上到清末先開始跟著西方文明嘅城市化前，城嘅定居概念相信都唔係好高下，一路不過係朝廷駐兵官防嘅地頭，唔係「升官發財」（講笑）嘅都唔會入「城」嘅。

再度度，比返最接近Town嘅，華文度個人歸結落，大概會系有街、坊、埠呢幾個啩。——Longway22 (傾偈) 2020年3月28號 (六) 01:19 (UTC)

Town為分離聚居地，同街、坊並唔相同。街、坊反而為城中。埠初頭指海邊通商港，因為以前嘅搭船多，後尾係城都咁叫。唐人街為自己稱呼，好多都係集中一兩條街做生意咁。香港都有啲類似，例如南韓人來香港，都會喺尖沙嘴幾條街開舖。China Town為外國人叫法，用來突顯異族聚居地。故此兩者並非同義。HenryLi (傾偈) 2020年3月30號 (一) 11:24 (UTC)

Henry你提到鬼佬叫，同自己叫就有分別呢個，睇嚟個town真係華文度都幾自由。town真可以演繹成五顏六色都得，聽得到town嘅買樓客都眼花花啦（講笑）。——Longway22 (傾偈) 2020年3月30號 (一) 13:17 (UTC)

town係個古老嘅字，自然有好多演變，就同唐字咁，都唔易概括所有含義。查字典都有五六項解法，自然唔會得一個字。鎮字或者係抄日本當時政制，日本用町，唔啱習慣咪叫鎮。英國古時有個market就叫town，咁香港承襲大清，墟同市亦不謀而合。今下字典總會有一項，大個village，細過city。中日有晒法定，寫得好死，而英美唔一定。town無話幾多人先叫town，百人又得，萬人又得。new town，英國二十世紀先搞出來，實際就係new city。香港跟英國，香港啲new town實際就city級數。上面話青衣咁，青衣幾年前都有十八萬人，世界大多國來講，已經係大城。若果唔搞清楚意思，就會張冠李戴。HenryLi (傾偈) 2020年3月30號 (一) 16:08 (UTC)