青馬大橋

青馬大橋

隸屬幹線	8號幹線
隸屬鐵路	機場鐵路（東涌綫、機場快綫）
路段總長度	2.16公里
主跨長度	1,377米
橋塔高度	206米
離海面高度	62米
車速限制	80km/h
所在地區	香港新界西
起點	葵青區青衣島
終點	荃灣區馬灣
行車線數量	8條（橋面6條，橋底2條）另有2條鐵路路軌
通車日期	1997年 5月22號

青馬大橋係香港一條大橋，橫跨馬灣海峽，連接青衣島同馬灣。佢係全球最長嘅行車鐵路兩用懸臂式吊橋，亦係世界第六長嘅懸臂橋。條橋長 1,377米，連引道全長2,160米；係香港8號幹線青嶼幹線嘅一部份；連埋汲水門大橋係市區唯一去大嶼山、赤鱲角香港國際機場嘅路。車速限每小時80公里。

簡介

青馬大橋採用雙層設計，橋嘅露天上層係3線雙程分隔快速公路，有蓋嘅下層就係2條港鐵東涌綫同機場快綫嘅共用路軌，同2條喺緊急時（例如打風同嚴重交通意外時）使用嘅單線行車道路。1992年5月25號開工，使咗港幣71.44億。條橋連同青嶼幹線其餘部份，喺1997年4月27號開幕，由前英國首相戴卓爾夫人主持。同年5月22號正式通車。

旅遊景點

青馬大橋係香港一個地標同埋景點，所以吸引咗世界各地遊客參觀。為應付遊客，政府响青衣西北部整咗座青嶼幹線訪客中心及觀景台。訪客中心有大橋建築模型、相同互動遊戲；從螺旋小路圍圓柱形嘅觀景台上，遊人就可以較近距離或高角度，遠眺青馬大橋、汲水門大橋同埋汀九橋，觀景台設有行人天橋連接訪客中心同停車場。訪客中心同觀景台響1997年隨住青嶼幹線通車對外開放，最初由新機場工程統籌署負責管理同運作。該署響1998年解散後，展覽中心交由民政事務總署葵青民政事務處負責管理。

由於青馬大橋冇行人路，遊客冇得響橋上面行。現時政府只響國際馬拉松賽事舉行期間開放橋面，作為比賽路段。另外亦曾經喺2008年5月2日將部分橋面畀火炬手傳聖火。