汀九橋
| 汀九橋相關資料 | |
| |
| 隸屬幹線 | 3號幹線 |
| 路段總長度 | 0.77公里 |
| 所在地區 | 香港新界西 |
| 起點 | 荃灣區汀九麗都灣以東 |
| 終點 | 葵青區青衣西北 |
| 通車日期 | 1998年5月6號 |
| 收費 | 免費 |
汀九橋位於香港新界，係全球最長嘅三塔式斜拉索橋。大橋屬於3號幹線，跨越藍巴勒海峽，將汀九同青衣連埋。橋面係三線雙程分隔快速公路。車速限制每小時80公里。
經過38個月嘅施工，汀九橋於1998年5月6號下晝正式啟用。由於佢同大欖隧道落成通車嘅日子同新起嘅香港國際機場啟用日子接近，而大橋嘅興建，除咗舒緩新界西北嘅交通負荷外，更方便往來機場以及新界西北同深圳，有人稱之為「第11項機場核心工程」。
大橋嘅兩個主跨，分別長448米及475米，連引道全長1875米。支撐住汀九橋嘅三支單柱橋塔，分別座落喺藍巴勒海峽嘅一個人工島、汀九岬同青衣島西北岸，分別高194米、167米及162米。重量方面，結構鋼重8900公噸，混凝土重量29000立方米。大橋嘅設計，可承受每秒達95米（時速342千米）嘅風速。
汀九橋令來自新界西北部嘅車，能夠方便快捷咁到達青嶼幹線嘅青馬大橋同汲水門大橋，通去大嶼山同香港國際機場，同時亦分流新界西北來往荃灣、葵青、九龍及港島中上環商業區嘅車流。
香港嘅的士司機同電台交通情況報告節目大多都叫呢條橋做「新汀九橋」，以免同屯門公路一條同樣稱為汀九橋嘅高架橋混淆。
大橋資料
[編輯]
- 主跨：448米 + 475米
- 總長：1177米
- 最高橋塔高度：195米
- 淨高橋底通航：60米
- 設計及建造期：44個月
橋身
[編輯]- 設計同一般嘅斜拉橋有好大分別
- 橋塔採用單支柱形式，而唔係典型嘅A形或H形
- 因單支柱橋塔穩定性較低，所以設計師响橋塔上加多一對橫樑，再用拉索將橋塔頂部同下面部份連接，以加強佢嘅穩定性
拉索
[編輯]- 橋身由384條拉索承托
- 拉索由鋼束組成，數目由17條至58條不等，每根鋼束直徑為15.7毫米，由7條鍍鋅鋼絲結合而成。基本上，拉索嘅斜度愈大，鋼束嘅數目就愈多。
- 拉索外面有一個白色嘅保護外殼。
出面網頁
[編輯]
