假戰

假戰
	第二次世界大戰西方戰線嘅一部分
日期：	1939年10月—1940年4月
地點：	馬奇諾防線、齊格菲防線
結果：	法國戰役
參戰方
同盟國：; 法蘭西第三共和國; 英國	軸心國：; 納粹德國

假戰（英文：Phoney War），怪戰（法文：Drôle de guerre），又叫靜坐戰（德文：Sitzkrieg），係指1939年9月到1940年4月之間，英法雖然因為納粹德國入侵波蘭所以宣戰，但係實際上雙方得極輕微嘅軍事衝突。

呢段期間雙方有小規模嘅空中同海上嘅衝突，英國開始將遠征軍調去法國，法國就開始進行一啲動員嘅工作。1940年初法國有14個師防守馬奇諾防線，同時有80個師喺後方支援，英國陸續增援到9個師嘅部隊到咗1940年5月英法集結咗超過3,100架戰車同2,000多架戰鬥機。

當時德軍同波蘭交戰緊嘅得少量軍隊守喺同法國交接嘅齊格菲防線，喺另一邊嘅馬奇諾防線，英法聯軍同德軍相對，但只係爆發零星交戰。英國皇家空軍向德國投擲宣傳單，加拿大軍隊都踏上咗英國，但係西歐喺7個月之間並冇任何戰爭，直到兩個陣營終於喺北歐戰役中爆發衝突，結束咗呢一段冇戰爭嘅宣戰期。喺重整軍備期間，英法除咗靠本身嘅生產之外，都向美國買咗大量武器。美國作為非參戰國，向英法租借同畀折扣出售武器。但係喺1930年代，英美嘅私人公司曾經隱瞞政府，向德軍提供咗武器，德軍戰機嘅引擎喺英國整，原材料就喺美國買。德國為咗阻止呢場跨越大西洋嘅交易，觸發咗大西洋戰爭。

薩爾衝突

1939年9月，喺純政治考量下，法軍向國際聯盟轄下嘅薩爾推進咗3英里。法軍動用咗98個師同2,500架坦克，而德軍動用43個師，冇坦克。

冬季戰爭

喺西歐假戰期間，蘇聯喺1939年11月30號入侵芬蘭，東歐爆發咗冬季戰爭。普遍輿論都支持民主國家芬蘭，由於芬蘭嘅抵抗似乎比波蘭對抗德軍更加成功，英法國民甚至要求政府支援芬蘭對抗強大嘅蘇聯。於是，蘇聯俾人踢出國際聯盟，英法兩國曾經計劃遠征斯堪的納維亞。英國開始征召軍隊，但喺冬季戰爭完咗之前都未去到芬蘭，就改喺威悉演習行動中支援挪威。1940年3月，冬季戰爭完咗後，法國總理達拉第因為支援芬蘭失敗而引咎辭職。

德軍入侵丹麥、挪威

同盟國公開討論遠征斯堪的納維亞北部，但係得唔到中立嘅北歐國家同意；2月嘅阿爾特馬克事件影響咗德國嘅鐵礦供應，德國就強烈要求守住挪威海岸。4月9號，德國發起「威悉演習行動」，開始入侵丹麥同挪威，丹麥好快就輸。4月12至15號其間，盟軍登陸挪威，但係德軍喺2個禮拜之內佔領咗整個挪威，將盟軍驅逐出境。

英國變天

英國因為支援芬蘭失敗，而改成支援挪威，帶來嘅災難令英國首相張伯倫喺下議院受到攻擊。雖然下議院以281票同意對200票反對通過咗對張伯倫政府嘅信任動議，但係好多支持者都轉投咗反對票。張伯倫覺得冇嗮支持，好難繼續領導英國政府或另組聯合政府，就喺5月10號辭職。英國國王佐治六世委任反對綏靖嘅邱吉爾出任首相。邱吉爾重組聯合政府，包括保守黨、工黨、自由黨同一啲無政黨人士。

當日，即係英法對德宣戰之後8個月，德軍進攻比利時、荷蘭同盧森堡，假戰完咗。

影響

假戰係二戰時期西方綏靖主義嘅延續。佢令法西斯嘅侵略野心進一步擴大，削弱咗同盟國嘅力量，間接導致法國淪陷。

睇埋