劉半農

劉半農
出世	1891年5月27號
死	1934年7月14號
國籍	中華民國
職業	語文學者、詩人、文學家、攝影理論家

劉半農（粵拼：lau4 bun3 nung4；1891年5月27號—1934年7月14號），係中國民國時期嘅詩人、語言學者，出身自江蘇省。原名劉壽彰（lau4 sau6 zoeng1），後改名劉復（lau4 fuk6），初字半儂，後改字半農，號曲庵（kuk1 am1），筆名寒星（hon4 sing1）、范奴冬（faan6 nou4 dung1）。

生平

劉半農出生喺江蘇省江陰縣南沙鎮馬橋村殷家埭（現今屬蘇州市張家港市）。15歲時，佢以優秀嘅成績合格通過常州府中學堂而畢業。1911年，母校翰墨林小學校長招佢，做咗教員。

1920年3月去歐洲留學。當初去倫敦大學，遞年去巴黎大學留學，1925年攞得法國國家文學博士嘅學位。歸國後做咗北京大學中文系嘅教授，並且兼任中央研究院歷史語言研究所嘅研究員、北京輔仁大學教務長。

1934年，做方言調查時畀蝨乸咬親，因爲呢個原因罹患回歸熱，急病而死。舊時朋友魯迅爲佢寫追悼文，但劉復留學後就同佢疏遠咗㗎喇。

業績

江陰市嘅劉氏兄弟故居

佢作爲詩人、語言學者而活躍，係中國新文化運動嘅先驅者。著作有《半農雜文》、《半農談影》、《四聲新譜》、《方言字典》、詩集《揚鞭集》，當中論「攝影美學」嘅專門書《半農談影》係中國最早嘅攝影理論書之一。另外佢又將小仲馬嘅名作《茶花女》翻譯成中文，亦係知名嘅譯本。

1925年嘅《四聲實驗錄》整理自佢嘅博士論文，因爲係中國實驗語音學嘅先驅，呢個業績令佢名氣幾高。同年佢喺北京大學爲實驗語音學整咗間研究室，研究各地方言嘅音聲。1930年時佢將保羅·帕斯嘅《Petite phonétique comparée des principales langues européennes》翻譯成中文，書題做《比較語音學概要》。

喺語音學同方言學以外嘅方面，文學革命後嘅1920年出版咗《中國文法通論》。留學法國時，佢調查咗伯希和收集嘅敦煌文獻，喺1925年出版咗《敦煌掇瑣》全三集。之後有佢同人共著嘅《十韻彙編》出版（但出版喺佢死後嘅1936年），呢本書以敦煌爲中心，收集咗各種切韻系韻書。做文字關係嘅著作有《宋元以來俗字譜》（1930年）。佢又參與制定國語羅馬字。

對現代中文嘅貢獻

留學英國時，劉半農因爲思鄉，寫咗首《教我如何不想她》嘅詩，呢首詩畀趙元任譜曲，流行一時。現代中國使用嘅第三人稱代詞「她」就係劉半農喺呢首詩中作嘅詞。表示女人嘅人稱代詞「她」出來之前，指示第三人稱嗰陣，通常使用「他」，個性別不明，劉半農就作咗女性嘅人稱代詞「她」。從呢項功績來講，劉半農喺中國現代語言史上有住非常重要嘅地位。

親人

音樂家劉天華、劉北茂係佢嘅細佬。

出面網頁

• 〈劉半農ー詩人、著名な言語学者〉。《中國國際廣播電臺》 (日文)。2006年7月20號。喺2017年12月23號搵到。