古洞
古洞（Kwu Tung）喺香港新界北面，響麒麟山北，河上鄉西南，雙魚河一帶。原本只係一條細村來，喺青山公路南、麒麟山北同雙魚河西之間，家下歐意花園嘅地方，而家下主要講係雙魚河以西（近青山公路一小段河東），河上鄉以西南，馬草壟以南，西到白石凹嘅平地，同埋麒麟山北同東北一帶。由於香港政府將青山公路，古洞可愛忠實之家到粉錦公路尾，上水彩園邨對角一段，叫做古洞段，搞到連帶雙魚河東到上水都畀人誤以為係古洞，所以有時金錢、燕崗、松柏塱、丙崗都當埋入古洞。
古洞一帶有大量竂屋。
名
[編輯]洞或者洞係可能指古越蠻住嘅地方[1]。後尾呢處變咗係圍頭人、客家人同少數潮州人聚居地。
地理
[編輯]今日古洞有三山環抱，南有麒麟山，東北有鳳崗山，西北有白石凹到馬草壟之間唔知叫乜山。麒麟山東有雙魚河，南向北流去上水，同石上河會合。英國人將古洞到上水、粉嶺呢個大谷地叫Long Valley，意思係好長嘅谷。Long Valley呢個名家下用咗來指塱原。
原古洞
[編輯]原本古洞係一條細村，雙魚河西便，同麒麟山東北角交界之處。原本係大唔過東便附近金錢、燕崗同河上鄉三條村。
條村響上水到新田兩大村路上正中間，條路由上水向西南行到松柏塱，轉西行，過雙魚河到古洞，古洞向西行，過坳再向西行就到新田。英國人將呢條路變成青山道，即後尾嘅青山公路。而古洞有路南行到石崗，出古泂南行過雙魚河到担水坑，向西南經唐公嶺到蓮塘尾，再南行到打石湖，過坳到亞公田，再落係上輋、竹坑、橫台山同石崗。其中蓮塘尾到橫台山呢段，後尾開成粉錦公路。
原古洞村嘅田地主要響麒麟山腳，同向北嘅谷地平原。北便田地後尾都變成家下屋地廠地。
今日古洞村
[編輯]今日古洞村，經已唔係原居民村[2]，面積都幾大，村屋都幾散下，佢北便同馬草壟交接，東北便接河上鄉，東便接燕崗，東南便接金錢。家下分為兩村，一北一南，分界響河上鄉路同青山公路洲頭段。行政上，兩個都歸入上水鄉事委員會之下。雖則話係兩個村，實際上係好多條村夾成。
北村[3]有374公頃，約莫住咗1500人，分五區，即係東方區、塘角區、煙寮區、聯和區同埋鳳崗區。上水展能運動村以南一帶，有約莫50間工廠，多數係木廠、廢物回收場、食品廠同車廠。[4]
發展
[編輯]香港政府計劃將古洞粉嶺公路北面，發展為邊界市鎮。古洞北新市鎮佔地498公頃，設計容量為10萬人。
新市鎮南便有港鐵東鐵綫落馬洲支線穿過，並且喺新市鎮中心預留古洞站。