落馬洲支線

出自維基百科,自由嘅百科全書
跳去: 定向搵嘢
港鐵
落馬洲支線
LMC LINE 2.jpg
通車日期 2007年8月15日
車站數目 2 (2007年)
服務區域 元朗區北區

落馬洲支線港鐵東鐵綫嘅支線,亦係香港第二條跨境客運鐵路。支線由而家嘅上水站開始,向西北方向延伸,穿越塱原濕地古洞洲頭幾個地方,最尾連接落馬洲站,全長7.4公里,興建1個車站。支線建成後,東鐵北行一共有2個終點站,分別通到2個同中國大陸連接嘅關卡-羅湖落馬洲。工程喺2002年6月14日開始,到2006年中完工,落馬洲站2007年8月15日下晝4點正式啟用。第一班列車喺下晝3點17分由尖東站開出,而第一班由落馬洲站開出嘅南行列車亦喺下晝4點15分開出。

而家,每個鐘都有5班車(非繁忙時間)或6班車(繁忙時間)來往尖東至落馬洲,乘客只需要喺尖東上水之間各站登上去落馬洲嘅列車即可到達。落馬洲站上水站嘅行車時間大約要6分鐘,尖東站落馬洲站則約需要44分鐘。

計劃同埋工程[編輯]

落馬洲支線原屬九廣西鐵(即係依家嘅西鐵綫)第二期嘅鐵路,將會連接將來嘅北環線,令到西鐵綫新界北區東鐵綫連接,最終令兩條鐵路都可以通往兩個同中國大陸連接嘅關口(羅湖和落馬洲)。不過由於西鐵實際客量比預期為低,作為一間商業機構,九鐵唔可以貿貿然再投資喺一條蝕本嘅鐵路之上。所以九鐵決定改為先以長期有盈餘嘅東鐵連接,等乘客嘅乘車模式定型後,再決定係咪興建北環線。支線工程喺2002年第四季開始,工程主要包括4大項目:隧道段、高架橋段、落馬洲車站以及上水站改善工程。

上水站[編輯]

上水站月台頂部的排隊指示及到站列車的目的地指示。
內文: 上水站

工程包括上水站嘅車站大堂同月台擴闊工程,以應付喺上水站落車,換乘去落馬洲站列車嘅乘客。有關工程喺2006年大致完成,大堂嘅新翼同連接鄰近商場嘅行人天橋已經喺1月尾開放畀公眾使用。此外上水站外嘅路軌亦已重新編排,令路軌成為東鐵嘅其中一個交匯處。

塱原濕地[編輯]

內文: 塱原

列車駛離上水站後,會駛入穿過塱原濕地嘅地底隧道。呢個計劃係經過一番激烈爭論後得到嘅結果。喺計劃初期,九鐵原先建議落馬洲支線塱原段,會好似西鐵穿過八鄉等地嘅高架天橋形式,穿越塱原濕地。但呢個計劃俾各環保團體強烈反對,指興建高架橋時將會嚴重破壞塱原濕地嘅生境同地貌。即使九鐵提議工程完工後會盡量回復原來面貌,但環保署唔同意,重唔發出環境許可證。

最後,環評上訴委員會否決高架橋方案,九鐵只好採納科大教授嘅方案,決定支線以地底隧道形式穿過塱原濕地。雖然呢個方案會令整條支線嘅興建成本增加十億港元、回報率下降同完工日期押後等等,不過此方案獲大多數人所接受,認為係平衡發展同保育嘅可持續發展方案。

古洞站[編輯]

古洞站已預留島式月台結構,減少將來車站建設工程對車務的影響。
內文: 古洞站

雖然支線沿途暫時將不設有車站,不過當列車駛過塱原濕地後,將會經過一個預留嘅地底車站-古洞站。呢個站嘅建設,係因應香港特區政府喺2003年公佈嘅研究,指出古洞北同粉嶺北一共689公頃嘅土地適合做新發展區。由於古洞好有可能成為一個新市鎮,所以九鐵喺計劃同興建落馬洲支線時,就預留位置將來興建古洞站之用。

洲頭站[編輯]

內文: 洲頭站

根據最新建議,北環線會喺同落馬洲支線匯合嘅洲頭一帶,興建洲頭站,而落馬洲支線喺北環線興建時亦會興建車站,方便北環線乘客轉乘東鐵前往新界東。

落馬洲站[編輯]

由落馬洲站到深圳的大橋
內文: 落馬洲站

落馬洲支線嘅總站-落馬洲站係一個4層,佔地約9公頃嘅車站大樓。大堂裡面設有購物區、免稅店等設施方便乘客。由於車站大樓同時係香港入境事務處嘅出入境檢查站,所以大樓內設有海關、出入境及其他重要嘅過境設施。乘客辦妥出境手續後,會經由一條橫跨深圳河,單臂斜拉式天橋行過去深圳福田口岸聯檢大樓。乘客亦可以同時喺呢個聯檢大樓內嘅深圳地鐵皇崗站,轉搭深圳地鐵4號線深圳市其他地方。

圖片集[編輯]

車站[編輯]

車站名稱 英文名稱 所在區域 車站接駁
港鐵支線-落馬洲支線
上水站 Sheung Shui 北區 (接駁東鐵綫
古洞站 Kwu Tung
洲頭站 Chau Tou 元朗區 北環線
落馬洲站 Lok Ma Chau 深圳地鐵4號線北環線

注:斜體係計劃緊嘅車站或轉乘路線,初期只有上水同埋落馬洲兩個車站。

連出去[編輯]

編輯 九廣鐵路路線 香港九廣鐵路公司標誌
九廣東鐵尖沙咀支綫落馬洲支線)| 馬鐵沙田至中環綫)| 九廣西鐵九龍南綫)| 九廣輕鐵 | 巴士