北環綫

出自維基百科,自由嘅百科全書
(由洲頭站跳轉過嚟)
 呢篇文講嘅唔係北部循環線北港島綫中環北站

北環綫英文Northern Link)係香港計劃起嘅鐵路綫之一,會連接原有嘅港鐵屯馬綫錦上路站同埋東鐵綫落馬洲支綫,並提供第二條連接落馬洲站福田口岸)嘅路綫[1]

歷史[編輯]

北環綫原本係《鐵路發展策略》中西部走廊鐵路近郊客運綫嘅一部份,後來政府將呢段暫緩興建,並稱佢為西鐵第二期。及後喺香港政府嘅《鐵路發展策略2000》被重點提出,係六個主要新鐵路計劃之一,目標2011年2016年完成,當時計劃更連接羅湖站[2]。近年同廣深港高速鐵路香港段合併為一個項目進行研究,喺廣深港高速鐵路香港段嘅「共用通道方案」下,高速鐵路列車將行經北環綫錦上路至洲頭附近嘅一段路軌[1];然而共用通道方案喺2007年8月香港政府決定用「專用通道方案」嘅同時被否決。另外,擬建嘅港口鐵路線亦可能同北環綫共用路軌[3]東鐵綫落馬洲支綫西鐵綫錦上路站已經預留設施作伸延之用。

呢個狀態維持到而家。雖然九廣鐵路公司嘅鐵路網已經交咗畀香港鐵路有限公司營運50年,而香港鐵路有限公司於2008年年報中有描述「北環綫」嘅路綫,但由於香港特別行政區政府冇表態,北環綫嘅處理亦冇包括喺兩鐵合併嘅內容裏面,所以其實並冇確實嘅結果。

路政署喺2009年向立法會話,北環綫嘅規劃要考慮新界新發展區嘅規劃系數,預計有關土地用途、人口/就業數據嘅初步研究結果會喺2010年初得出,到時會檢討北環綫工程計劃嘅走綫、車站選址同埋實施時間表[4]。而《香港經濟日報》亦喺2009年4月14號引述消息指,港府內部已確定,有需要起北環綫,以配合港深機鐵引發香港同埋深圳地區嘅經濟發展[5]

定綫[編輯]

原計劃嘅北環綫,會由西鐵綫錦上路站出發,喺中途嘅凹頭牛潭尾同埋新田設三個預留車站,取消咗原本喺《鐵路發展策略2000》建議新田同埋古洞之間連接九廣西鐵(西鐵綫)同埋九廣東鐵(東鐵綫)嘅直通路綫,然後喺新起嘅洲頭站接駁東鐵綫落馬洲支線,最後連接支綫既有嘅落馬洲站[1],兩鐵合併後,港鐵仍然沿用呢個方案。

直至2010年9月,港鐵喺中期報告中修改咗走綫,新路綫同當年嘅《鐵路發展策略2000》提出嘅計劃相似,以「丫」型嘅分岔設計,一方面會同樣連接東鐵綫落馬洲支線嘅落馬洲站,並取消興建洲頭站,改為起另一條分岔線到古洞站作為東鐵綫以及北環綫嘅轉車站[6],以梅花間竹嘅方式前往落馬洲站或古洞站。若果落實,北環綫會成為通往落馬洲鐵路口岸嘅第二條鐵路。

車站一覽‧接駁路線[編輯]

車站套色同埋名 喺邊區 車站接駁 啟用日期
北環綫
落馬洲[LMC] 元朗區 東鐵綫 2007年8月15號
坪輋/打鼓嶺[-] 北區 暫時擱置
軍地[-]
粉嶺北[-]
上水北[-]
古洞 東鐵綫 預計2027年
新田[+] 元朗區 預計2034年
牛潭尾[+]
凹頭[+]
錦上路 屯馬綫 2003年12月20號
附註
  • LMC 原本連接新田站同落馬洲站嘅支線將暫緩興建,等到跨境運輸需求有增加嗰陣先起。
  • + 凹頭、牛潭尾、新田三站會同北環綫同時啟用。預計喺2025年動工,2034年通車。
  • - 暫時唔起呢段路,但預留延伸條件等將來發展嗰陣就起。

攷同注釋[編輯]

  1. 1.0 1.1 1.2 立法會參考資料摘要 - 北環綫及廣深港高速鐵路香港段 互聯網檔案館歸檔,歸檔日期2012年6月9號,.,2006年2月,環境運輸及工務局
  2. 鐵路發展策略2000 互聯網檔案館歸檔,歸檔日期2007年3月17號,.》(第8頁同第14頁),2000年5月,運輸局
  3. 鐵路發展策略2000 互聯網檔案館歸檔,歸檔日期2007年3月17號,.》(第10頁),2000年5月,運輸局
  4. 審核2009至10年度答覆編號開支預算THB(T)020 問題編號0051[失咗效嘅鏈],香港立法會財務委員會
  5. 北環綫港府敲定興建,配合港深機鐵助兩地經濟發展 互聯網檔案館歸檔,歸檔日期2009年11月27號,.,經濟通,2009-04-14
  6. 港鐵2010年中期報告,第3頁(營運網絡及未來支綫)

出面網頁[編輯]