企業識別

企業識別（英文：corporate identity），又叫品牌識別（brand identity），喺平面設計，係指一系列特登做到一致嘅嘢，等人哋見到就會聯想起嗰間公司或者機構或者嗰個品牌。企業識別最基本嘅元素係撈稿、嘜頭，但係企業識別仲可以包括特登揀嘅顏色配搭、字款、排版方式或者其他可以達到傳意目的^[1]^:48、可以感知到嘅嘢。

企業識別，企業傳訊同企業嘅行事方式^[暫譯]（corporate behaviour；例如待客態度），構成所謂企業嘅身份認同^[暫譯]（corporate identity），亦即係佢對外投射嘅整體自我形象^[1]^{:48, 51}。企業識別同企業傳訊嘅目的都係傳意，文筆亦影響設計；有啲人會將寫作風格都當係企業識別系統嘅一部分。