大同酒家
| 大同酒家 | |
|---|---|
| 廣州市歷史建築 | |
 | |
| 喺邊 | 越秀區 |
| 籌 | GZ-01-0052 |
| 登錄 | 2014年1月26號 |
大同酒家（粵拼：daai6 tung1 zau2 gaa1；英文：Dai Tung Restaurant），之前叫過做廣州園酒家（gwong2 zau1 jyun4 zau2 gaa1），係廣東省廣州市西壕口嘅一間老牌酒樓，喺越秀區沿江西路63、65、67、69號。呢間酒樓之前喺1925年嘅香港成立，不過後尾凈係得返廣州一間響度。呢間酒樓係一間既有廣州特色，又有中西合璧嘅豪華裝飾、集飲食娛樂於一身嘅「老字號」酒樓。大同酒家開業以來，深受政要元首巨商青睞，試過做國民黨四大家族飯堂，中共建政後成為咗接待各國貴賓嘅重要場所。酒家創出嘅大同脆皮雞、海南大群翅、金牌燒乳豬，馳名飲食界。
史
[編輯]廣州店
[編輯]大同酒家喺1938年，日本人入侵中國期間，由日本人中澤親禮開嘅，原名廣州園酒家。喺嗰時就係成日畀啲日本軍佬同啲大企、大公司嘅有錢佬嚟搞。不過到咗1942年，因為酒家話𠲜人工，搞到差唔多執笠先至換咗代理，嗰陣香港酒家大王馮儉生夾埋咗廣州飲食鉅子李銘、譚傑南、陳伯綺等人去投資返渠，裝修過之後重新開業，而招牌就改成香港用嘅「大同酒家」呢個名。裝修過之後，門面一共六個鋪位，正門兩堂樓梯上，重有前後樓梯，睇落就卡士高。由於係華人開嘅，又係粵式口味，大同就開始興旺喇。
喺1945年日本投降之後，第三任波士譚傑南就嗌咗省港澳嘅飲食人才嚟出大同脆皮雞、海南大群翅、金牌燒乳豬、紅燒鮑片等呢啲比較出名嘅菜。而嗰時大同酒家同大三元酒家、大公餐廳一齊，合稱「廣州三大酒家」。當時國民黨啲猛人好似孫科、李宗仁、白崇禧、宋子文、陳立夫、陳果夫、吳鐵城、羅卓英等都係大同酒家嘅座上客。大同嘅脆皮雞、金牌燒乳豬等名菜聲名遠播。
中華人民共和國成立咗之後嘅6年（1955年），由於大同酒家向中央話自願公私合營，結果就變咗廣州第一間公私合營嘅食肆。不過合營咗之後，廣州入面其他大部分嘅百年茶居、茶樓都喺1956～1976年期間消失嗮。而文革期間受到破四舊嘅思想影響，門前嘅對聯俾當局拆咗，甚至連舖名都改成「新風飯店」。不過喺20世紀80年代先至寫返喺酒家嘅3樓嗰度。
呢間酒家喺公私合營咗之後，成日都俾中共嚟接喺世界各地嚟嘅貴賓。喺廣州辦嘅第一屆中國出口商品交易會（1957年9月，而家係中國進出口商品交易會）開幕嗰陣，呢間酒樓都參加咗接待服務。嗰時嘅廣州市長朱光就講咗好多次話：「大同酒家要突出『食在廣州，服務一流』。」
呢棟樓喺設計嗰陣，本嚟係起10層嘅，但係因為日軍入侵，所以起到8樓就冇繼續起。一直到1958年先至起埋嗰凈低冇起嗰兩層。
1984年8月，廣州飲食服務公司同香港富茂有限公司一齊合作搞好大同酒家，不過佢重係搞正宗粵菜，佢挖傳統名菜之餘亦加咗啲香港菜，結果大同酒家啲餸就出嗮名。尤其係大同脆皮雞同娥姐粉果等一批名菜都入咗中國商業部飲食服務局出嘅《中國名菜譜》入面，亦受到好多消費者歡迎。
1993年，呢間酒樓俾中華人民共和國貿易部列為「中華老字號」；再喺1998年俾中華人民共和國貿易局列為中國國家特級酒家。
2016年12月1號，酒樓方面聲稱資金不足，宣布遣散員工，暫停經營，唔少街坊非常不捨。
2018年8月13號，大同酒家重新開業，攞到經營權嘅係賞點集團，定位大同做主打點心同宴席嘅連鎖食府，開業喺廣州天河嘅中信廣場[1]。
香港店
[編輯]喺香港嘅大同酒家喺1925年開業，位置就喺而家上環德輔道中同文華里交界。呢間酒樓喺1959年同1970年辦過滿漢全席，而家已經執咗笠。
出品
[編輯]酒家早期有點心大師羅坤、譚鳴；烹飪大師殷耀、龐溢、何明；燒臘師梁冠。渠地落手整過娥姐粉果、薄皮鮮蝦餃、蟹黃幹蒸燒賣呢啲傳統點心，仲有大同脆皮雞、金牌燒乳豬、百花鮮島啲餸菜，喺廣州飲食界好大名氣。喺1950年代，大同脆皮雞同娥姐粉果試過畀中國商業部飲食服務司編嘅《中國名菜譜》收錄。
喺1950年代後，後起嘅名廚王光、麥炳，名點心師徐麗卿等各有建樹。改革開放同香港合作經營陣嘅大同推出過南洋焗蟹煲、生煎琵琶豆腐、 醬爆田雞、香滑麻蓉包等菜品[2]。傳統美點仲有碧玉千層酥、麻香鴛鴦塊、嶺南香荔果、百花牛肉脯、酥皮雞蛋撻、起士拉皮卷等。
酒家嘅化皮燒乳豬（金牌）係最架勢嘅，渠係用10斤嘅豬仔，劏乾淨後配五香鹽、豆醬、汾酒、麻醬呢啲八味醃，等入咗味，再攞炭爐猛火燒，不停搽油上去，同用錘揼，食陣片皮配埋千層餅上筵席，畀讚係廣州同款菜式中嘅極品[3]。
英文名
[編輯]以下係大同酒家歷嚟用過嘅英文名。廣州嗰間變咗好幾次，而香港嗰間由始至終都係用同一個名。
| 年份 | 廣州店 | 香港店 |
|---|---|---|
| 1925—1955 | Tai Tung Restaurant | Tai Tung Restaurant |
| 1955—1978 | Da Tong Restaurant | Tai Tung Restaurant |
| 1978—而家 | Dai Tung Restaurant | —— |