焦爾達諾·布魯諾
(由布魯諾跳轉過嚟)
焦爾達諾·布魯諾（意大利文：Giordano Bruno，1548年1月1號—1600年2月17號）係意大利文藝復興時期嘅天文學家、哲學家，撐哥白尼嘅日心說，1600年畀天主教宗教裁判所話佢係「異端」而處死佢。
布魯諾喺那不勒斯出世，原名叫 Filippo Bruno，但係佢後嚟改名叫 Giordano Bruno。佢十五歲就做咗修士，喺修道院讀到好多古代典籍，受到古埃及赫爾墨斯主義（Hermeticism）影響，相信太陽係地球同行星嘅中心。哥白尼發表《天體運行論》之後，佢大力支持爾個學說，被開除教籍，到處流亡，但仍然繼續同當地啲宗教人士、哲學家辯論。
布魯諾寫咗《論宇宙與世界》（On the Infinite Universe and Worlds）幾本書，以佢嘅宇宙論而聞名，佢嘅理論包括宇宙係無限嘅同埋星星都係遠距離嘅太陽，而且每個星星都有自己嘅行星（外行星）。佢亦提出宇宙可能有好多個世界，而且唔同嘅宗教應該和平共處。
布魯諾唔係一個數學家，佢係用哲學思考去推演。佢唔係一個無神論者，相反，佢認為無限嘅宇宙更加顯示上帝無限嘅創造力。佢一開始係一個天主教多明我會修士，但係佢喺日內瓦嘅時候改信加爾文教。之後，因為佢嘅宇宙論太過大膽，否認幾個天主教核心教義，連支持日心說嘅天文學家都接受唔到，結果喺1600年被羅馬嘅宗教裁判所判處火刑，監生燒死喺羅馬嘅鮮花廣場（Campo de' Fiori）。
參考
[編輯]- Giordano Bruno 英文維基百科（英文）
- Giordano Bruno | Biography, Death, & Facts Britannica （英文）
- Giordano Bruno Stanford Encyclopedia of Philosophy （英文）