彩蛋 (媒體)

復活節彩蛋

彩蛋（粵拼：coi2 daan2；英文：Easter egg）係指一個媒體嘅製作者貪得意加喺自己作品裏面嘅隱藏內容。

「彩蛋」一詞源自電子遊戲：有陣時，製作組喺整一隻遊戲嗰時會貪得意加啲隱藏信息或者影像落去；例如試過有遊戲製作師喺為一隻冒險遊戲編寫地圖嗰時，靜靜雞喺地圖當中加咗一間好難搵到嘅房仔，房仔入面有封信，而主角讀嗰封信就會睇到嗰位製作師想同玩家講嘅嘢。而自從廿一世紀開始，「彩蛋」呢個詞開始俾人用埋嚟指一套戲或者一本漫畫裏面製作者貪得意加嘅隱藏內容。彩蛋唔係 bug，bug 係一啲製作師唔預期嘅錯誤，而彩蛋唔單衹能夠完全正常噉作出功能，而且係製作師特登加嘅隱藏內容。

「彩蛋」呢個詞源自西人喺復活節嗰時收埋復活節彩蛋，等啲細路去搵嘅習俗－「收埋啲彩蛋，等啲細路去搵」就好似遊戲製作師收埋啲隱藏信息俾啲玩家去搵噉。