攬炒

攬炒（粵拼：laam5 chaau2），就係同人哋玉石俱焚、兩敗俱傷嘅意思，即係若果自己出事，都要攬住加害者一鑊熟（或者墊屍底）。

典故

「攬炒」呢個詞最先出現喺啤牌遊戲鋤大弟。鋤大弟入面，輸咗嘅牌謂之「炒」，通常手頭揸住十到十二隻牌就係「雙炒」（或者「炒雙」，即係輸雙倍）；手頭揸住十三隻牌就係「三炒」（或者「炒三」，即係輸三倍），兩種情況合稱「大炒」。當玩家知道自己會「大炒」，運用啲技術令其他玩家難出牌，企圖令到有人陪自己一齊「大炒」，就叫做「攬炒」。

第啲意思

2019年反修例運動期間，有位網名叫「我要攬炒」嘅LIHKG（連登）會員（又畀網民叫做「攬炒巴」），因為活躍參與對海外嘅文宣工作而出名，曾經同香港大專學界一齊搞英美港盟主權在民集會。

其他

經歷咗持續1年嘅香港修例風波事件之後，立法會議員梁美芬喺2020年6月18號發佈《點解要攬炒》MV，曲長只有1分13秒，由佢領唱，合唱仲有幾名人士。

參考

• 〈SUN奇古怪：Sun潮語：【攬炒】〉 (繁體中文)。太陽報 (香港)。
• 〈何謂攬炒？ @ ACG總合研究捏他怨念惡搞記事萌與燃征服世界blog :: 痞客邦 PIXNET ::〉 (繁體中文)。