砂煲罌罉（粵拼：saa1 bou1 aang1 caang1）係啲用嚟煮嘢食同煮湯嘅架生嘅統稱。常見嘅砂煲罌罉包括有鑊、平底鑊、煲等等。而砂煲罌罉入面「砂」即係「瓦」，例如瓦煲、砂煲、砂鑊噉，唔少煮中菜嗰陣都會用到。「煲」同而家嘅煲一樣，有好多種質地同形狀，適應唔同嘅煮嘢食方法，例子有飯煲同水煲。「罌」係指裝嘢嘅架生，例如錢罌，如果用喺廚房嘅話通常係指啲細口大肚嘅樽，「罉」相等於平底鑊，可以用嚟裝嘢同煮嘢食，好似瓦罉、蒸罉、滾水罉、咖啡罉等。
