《百家姓》（粵拼：baak3 gaa1 sing3）係北宋記載嘅姓氏書，初頭一共有411個姓，之後加到504個，入面有444個單姓、60個複姓。
舊時中國細路都會讀呢本書，同《三字經》、《千字文》並稱「三百千」。
姓氏排序唔係跟全國姓氏人口去排。據南宋學者王明清考證，「趙錢孫李」之所以做咗《百家姓》前四姓，係因為百家姓喺北宋初年嘅吳越錢塘地區形成，所以就用嗰時嗰度最重要嘅家庭姓氏：
- 趙氏：大宋皇帝嘅姓氏。
- 錢氏：吳越國王嘅姓氏。
- 孫氏：吳越國王錢俶正妃嘅姓氏。
- 李氏：南唐國王嘅姓氏。
而接落嚟嘅四個姓氏「周吳鄭王」都係吳越開國國王錢鏐嗰班老婆嘅姓氏。
