域多利

  呢篇文講加拿大卑詩省首府。想搵第二個意思嘅話，請睇維多利亞。

域多利

域多利（Victoria，當地唐人舊稱大埠，普通話譯維多利亞）位於加拿大太平洋海岸卑詩省溫哥華島南端，係卑詩省嘅省會。域多利市有85,792人，而大域多利都會區就住咗367,770人。雖然大域多利地區入面其他城市並唔屬於域多利市嘅管轄範圍，但係住喺大域多利其他城市嘅居民依然習慣將自己嘅地址寫成域多利。域多利市嘅人口密度係每平方公里4405.8人（每平方英哩11,411人）， 同時係加拿大嘅第7高。域多利係喺加拿大西部入面最南嘅城市，距離卑詩省最大城市溫哥華同埋美國華盛頓州最大城市西雅圖亦都只係大概100公里（60英里）。

作爲其中一個喺太平洋西北地區（Pacific Northwest）入面最古老嘅城市，域多利係喺1843年俾英國人開埠，所以域多利都係以維多利亞女王命名。亦都係因爲噉，域多利保留咗唔少古建築物，當中尤其是以域多利兩大地標：省議會大樓（Parliament Building）同埋皇后酒店（Empress Hotel）爲主。喺1908年建立嘅域多利唐人街亦都係北美第二老，僅次於三藩市唐人街。域多利地區嘅Coast Salish原住民其實一直都住喺附近地區，而佢哋嘅人口喺歐洲探索者嚟到之前一直都唔細。

域多利係一個幾靚嘅城市，所以佢都有個花名叫做「花園城市」（The Garden City）。因此，佢一直以嚟都係一個幾受歡迎嘅旅遊熱點。除此之外，而家科技業亦都成爲域多利最賺到錢嘅私人行業，由此可見佢嘅科技業開始有起色。根據網站Numbeo所講，域多利係全球頭二十生活質素最高嘅城市之一。嚟自加拿大以及全球各地嘅學生亦都會嚟域多利讀書，例如域多利大學（University of Victoria，簡稱UVic）、域多利藝術學院（Victoria College of Art）、域多利演藝學院（Victoria College of Performing Arts）或者大域多利地區三個校區所提供嘅中學。由於佢位處海邊，域多利擁有唔少海灘同埋曲長嘅海岸線，所以呢度都有好多船家。與此同時，好多退休人士都定居喺域多利，目的就係爲咗享受域多利嘅溫暖氣候、少雪嘅冬天同埋漫步生活。

歷史

早期歷史（1770-1871年）

喺歐洲探索家嚟到之前，唔同嘅Coast Salish第一民族原住民社羣已經喺域多利附近住咗好耐，例如Songhee社羣。而西班牙探索家Juan Pérez同英國探索家占士曲船長（James Cook）已經先後喺1774年同埋1778年首次航行到太平洋西北地區。雖然域多利一帶地區同埋Juan de Fuca海峽要去到1790年先至俾歐洲人發現到，但係之後西班牙嘅水手分別喺1790年、1791年同埋1792年就已經多次嚟到Esquimalt港（Esquimalt Harbour）。

之後喺1841年James Douglas俾人委派去溫哥華島嘅南邊建立一個貿易基地。而同時間George Simpson認爲萬一美國攞咗溫哥華堡（Fort Vancouver，喺華盛頓州）嘅話，英國Hudson Bay公司就需要喺一個更加北嘅地方建立一個新基地（睇俄勒岡邊界紛爭）。所以喺George Simpson嘅建議之下，James Douglas決定喺域多利現址創立域多利堡（Fort Victoria），因爲佢都預視到喺1846年簽署嘅俄勒岡條約（Oregon Treaty） 會將英屬北美（大致係而家嘅加拿大）同美國嘅國界沿住北緯49度延長到佐治亞海峽（Strait of Georgia），從而將溫哥華堡割讓畀美國。但係由於域多利一帶喺簽條約之前已經俾James Douglas開咗埠，所以最後決定域多利堡會繼續歸英國所有。

一開始喺1841年開埠嘅時候，域多利其實係叫做「Fort Albert」。去到1843年11月嘅時候，先至畀人改名做域多利堡，目的係爲咗尊敬維多利亞女皇 。而喺海港對面嘅Songhee村莊就喺1911年畀人搬到去Esquimalt嘅北邊。之後喺1849年，域多利正式成爲英國嘅皇家殖民地（Crown Colony）。响1850年至1854年之間，英方同唔同嘅原住民社羣簽咗一連串嘅條約，而呢啲條約亦被稱之爲「Douglas Treaties」，目的就係爲咗透過貨物交易去獲得某啲土地。雖然某一啲協定的確造成咗一啲同倫理或者殖民政府權力有關嘅糾紛，但係無可否認呢啲協定最終係令到呢一個溫哥華島首都嘅建設得以成事。域多利堡嘅總管理人James Douglas亦都獲委任爲溫哥華島殖民地嘅第二任總督（Richard Blanshard爲第一任總督，而Arthur Edward Kennedy爲第三任以及最後一任總督），亦都係因爲噉，佢成爲咗域多利早期發展嘅關鍵人物，直到佢喺1864年退休爲止。

喺1858年，當卑詩省有金礦呢一個消息傳到去三藩市嘅時候，域多利即刻搖身一變，變成掘金者去菲沙峽谷（Fraser Canyon）金礦嘅中轉站。喺幾日之間，呢個堡變成一個港口、供應基地同埋裝備中心，而人口亦都從300人急升至超過5000人。喺1862年，域多利除咗被升格爲城市之外，佢亦都變咗1862年太平洋西北地區天花病瘟疫嘅爆發點，從而殺咗卑詩省三分二嘅原住民人口。去到1865年，英國皇家海軍將佢哋嘅太平洋北部基地設喺Esquimalt，而呢個基地亦都變咗做而家加拿大海軍太平洋海岸嘅基地。响1866年溫哥華島同卑詩大陸（Mainland British Columbia）合併成同一個殖民地之後，域多利依然畀人揀做新殖民地嘅首都而唔係另一個選擇新西敏。最後，因爲卑詩喺1871年決定加入加拿大聯邦，所以域多利由嗰陣時就降級成爲一個省都。