豹
 | ||||||||||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|---|
 塞倫蓋蒂嘅非洲豹
| ||||||||||||||||||||||||||||
| 物種分類 | ||||||||||||||||||||||||||||
| ||||||||||||||||||||||||||||
| Panthera pardus Linnaeus, 1758 | ||||||||||||||||||||||||||||
 豹嘅分布地
| ||||||||||||||||||||||||||||
|
|
豹（學名：Panthera pardus），個樣好似老虎但係細啲，係中大型貓科動物。膊頭高大概0.9米，身長約一米，體重 50千克。單係條尾就長 60厘米。豹嘅顏色鮮艷，有好多斑點同金黃色嘅毛皮，所以又叫做金錢豹、花豹。
棲息環境
[編輯]豹嘅棲息環境多種多樣，從海拔100米嘅低地到海拔3000米嘅高山都有。適應力幾強，生境包括森林、草原、濕地沼澤、雪地等。
習性同食性
[編輯]豹可以話係完美嘅「獵人」，矯健身材，靈活，奔跑時速可達120公里，又識游水，又識爬樹，性情機敏，聞嘢聽嘢睇嘢都好好，智力高、醒目，匿埋（隱藏）能力高，呢啲都係老虎獅子做唔到嘅，佢亦係少數可適應唔同生境嘅貓科動物。
豹係機會主義者，佢嘅獵物主要有鹿、羚羊同野豬，但亦會捉靈貓、馬騮、雀、齧齒動物、昆蟲嚟食，有時食埋腐肉，要視乎獵物產地而定。喺唔夠獵物嗰陣，佢亦會捕獵家畜（甚至狗肉），因而發生人豹之間嘅衝突。同一般貓科動物一樣，豹會喺密林嘅掩護下，靜靜接近獵物，然後嚟一個突襲，攻擊獵物條頸或口鼻，令佢窒息。根據《奇妙的動物世界》一書記載，豹捉到鹿後，會先將佢拖入灌木叢再食，主要先食肝臟同心臟，然後再食鹿肉。豹亦會將吃剩部分拖上樹度收埋，以免俾其他食腐動物搶走。
非洲品種通常將獵物拖上樹開餐，以防獅子或鬣狗等食肉動物來搶。喺食物鏈上，豹處於「次等捕獵者」嘅位置，這亦都意味著豹同時係老虎同獅子嘅獵物。
繁殖
[編輯]同其他豹屬一樣，豹嘅交配行為都帶有攻擊性，雄豹生殖器官上有倒剌，雖然可刺激雌豹排卵，但亦可能整痛雌豹。就算係咁，響為期一週嘅發情期內，佢哋會不停咁進行交配，之後先至分開。
3至4月份交配，6至7月份生仔，每胎3至4隻。7歲喥性成熟。
分布
[編輯]豹係貓科動物中第四大嘅，僅次於老虎、獅子同美洲豹，但豹嘅分布範圍比其他貓科大，主要響亞洲、非洲等地，由西非到蘇門答臘，華北至華南也有豹嘅蹤影。史前時期響歐洲都有豹嘅蹤跡。
以前香港亦都有豹出現，係喺1931年嘅事。根據艾思滔所著嘅《山水有情：探遊香港郊野》一書記載，1931年12月20號，當時有隻豹踩倒獵人原本用嚟捉其他獵物嘅捕獸器，最後俾人開槍打死，豹肉豹皮豹骨亦都俾村民分嚟賣。
亞種
[編輯]聽講豹分成30個亞種，只不過到而家都重有人拗緊。
- 亞洲豹（又叫金錢豹）
- 華北豹
- 東北豹（又叫黑龍江豹，係最大隻嘅豹，亦係最罕有嘅亞種）
- 華南豹（香港喺1931年曾經有豹出現過，相信都係呢個亞種）
- 遠東豹
- 非洲豹（又叫做花豹）
- 中非豹
- 南非豹
- 剛果豹
- 山地豹
- 北非豹
- 印度豹
黑豹
[編輯]係豹嘅黑色變種，喺太陽光照射底下，可以見到黑色毛下有斑紋。主要原產非洲同東南亞。香港以前嘅荔園動物園都養過黑豹。
估計現存數量
[編輯]估計全世界大概只剩番 2000 萬隻，但而家冇確實數據。
瀕危因素
[編輯]- 因毛皮顏色鮮艷而俾人大量捕殺；
- 因會襲擊人同家畜而被冠以「害獸」嘅罪名而俾人大量捕殺。
保護措施
[編輯]而家豹已被列為中國一級受保護野生動物，唔可以捕殺。
相
[編輯]
參考
[編輯]- 《中國珍稀動物》ISBN 962-258-056-4
- 《奇妙的動物世界》
- 《國家地理雜誌》（2006年2月號）
- 《山水有情：探遊香港郊野》ISBN 962-85274-4-4
- ↑ Cat Specialist Group (2002). Panthera pardus. 2006 IUCN Red List of Threatened Species. IUCN 2006. Retrieved on 12 May 2006. Database entry includes justification for why this species is of least concern