青山道

響新九龍嘅青山道同響新界嘅青山公路夾埋係全香港最長嘅路。由深水埗開始，連住新界南西北三個地區。亦都係香港早期嘅遠程道路，方便英國接收新界管治。不過無論邊度，條路嘅英文名都係叫Castle Peak Road。

名[編輯]

路名之所以叫青山，皆因佢最西貼近新界青山，而家下隔籬呢一帶屯門聚居地，英國人叫佢做Castle Peak，所以中文順理成章叫青山。

原本成條路都叫做青山道。後尾除咗新九龍荔枝角、長沙灣同深水埗呢段，全部都改名做青山公路。

青山公路響元朗市區一段正式叫青山公路 - 元朗段，俗稱元朗大馬路。

青山道以深水埗大埔道交界做起點，響九龍一帶山腳向西行，經過長沙灣，去到荔枝角。青山道兩邊多數係舊樓，而近荔枝角嗰邊就係工業區。響荔枝角就向北走，走向蝴蝶谷出新界。

青山道一離開新九龍，就叫做青山公路。佢先北上下葵涌個山谷，走到上葵涌，再去荃灣。

跟住沿住新界大陸東南岸西行，行過油柑頭、汀九、深井、青龍頭、大欖、小欖、掃管芴、三聖就去到屯門，即係舊時青山。

再向北走，就過藍地、洪水橋同屏山，咁就去到元朗。元朗北走凹頭，過米埔、新田、白石拗同古洞，最尾就去到終點上水。