麥當雄

麥當雄
導演
羅馬拼音	Mak Tong Hung
英文名	Johnny Mak
國籍	中國（香港）
出世	(1949-12-02) 1949年12月2號  英屬香港
職業	導演、監製
語言	粵語、英語、國語
教育程度	中五
母校	聖若瑟書院
屋企人	弟：麥當傑
出道地	英屬香港
活躍年代	1971年－1997年
獎 香港電影金像獎 最佳編劇 1992 《跛豪》 金馬獎 最佳導演 1984 《省港旗兵》

麥當雄（英文名：Johnny Mak Tong Hung，1949年—），係香港電影導演、編劇同監製，以整警匪片見稱。1970年代麗的電視（亞洲電視前身）監製、麗的電視第一台（後來嘅本港台）台長，多次收視打敗無綫。至1980年代成為電影監製，攞過第十一屆香港電影金像獎最佳編劇。

生平

麥當雄1949年喺英屬香港出世，出身喺亞洲電視嘅前身麗的電視。佢喺1962年考入聖若瑟書院，同劉松仁係同學。1969年喺香港聖若瑟書院畢業後，喺中西英文書院中學部教歷史科。至1970年同劉松仁一同加入麗的電視第五屆藝員訓練班，旋即轉投幕後。同期曾經喺1970年代香港電視黃金時期，麥當雄做麗的電視監製，主政麗的電視劇製作。早喺1974年佢開拍咗《十大奇案》就成功威脅無綫。之後開拍咗《大丈夫》、《大白鯊》、《鱷魚淚》、《天蠶變》等電視劇，都取得唔錯成績。

當其時麥當雄作風素以大膽見稱，如開拍《天蠶變》遇上主角鬧不和，麥當雄乃藉修改劇本乘機易角，引嚟轟動。後來無綫拍《楚留香》力抗《天蠶變》，麥當雄又以有限資源開拍咗八集週末劇《俠盜風流》，以穩住《天蠶變》收視。

當1981年麗的電視宣佈賣盤時，麥當雄適逢港產片崛起，投身電影界，成立咗自己嘅電影公司。佢監製嘅第一部電影《靚妹仔》就攞到佳績。到1984年《省港旗兵》更為麥當雄贏得台灣金馬獎最佳導演。

麥當雄多數以監製身份主導其電影創作，得《省港旗兵》等少數電影係由麥當雄親自導演，而日後較突出嘅作品例如《跛豪》、《三狼奇案》、《玉蒲團之偷情寶鑑》唔係以監製身份掛帥，就係出任編劇。佢啲作品多以警匪片、風塵片為題，有評者以「男盜女娼」來形容，題材上都多非原創，如《三狼奇案》係取材自1974年電影《天網》；《法內情》則續拍自吳思遠嘅《法外情》等等。不過相對於同期電影，麥當雄嘅作品都屬嚴謹、專業之作。當中《省港旗兵》曾為麥當雄獲得金馬獎最佳導演，亦喺2005年被選為百年內最佳一百部華語電影嘅第六名。佢嘅另一製作《跛豪》曾經獲得第十一屆香港電影金像獎最佳電影、最佳編劇，票房更創下3800萬港元佳績。由佢製作嘅三級色情電影《玉蒲團之偷情寶鑑》嘫香港同歐美地區亦受到唔少影迷歡迎。

隨著1990年代中後期港產片市道不景，公司幾乎冇任何出品，1998年麥當雄淡出電影製作，而改喺中國大陸經商。其最後一部電影係1997年上映嘅《黑金》。