北區係香港最北面嘅一個地方行政區，位於新界北。成個區大致分為粉嶺、上水、打鼓嶺同埋沙頭角四個部份，另外重包括大鵬灣嘅吉澳、鴨洲等離島。
北區嘅北面係廣東省深圳市，以深圳河、沙頭角河同埋中英街為界，香港同中國大陸嘅其中三條陸路過境通道（文錦渡、羅湖、沙頭角）都喺北區；西面同元朗區相連，南面同大埔區相連。
根據2001年政府統計，北區人口有298,657人；其中接近90%人口集中喺粉嶺同埋上水，而剩低嘅人口（大概40,000人）就住喺區內嘅鄉村。
