填詞

出自維基百科，自由嘅百科全書
(由填詞人跳轉過嚟)
舒伯特名歌《聖母頌》嘅樂譜，連拉丁文歌詞

填詞（粵拼：tin4 ci4）係指啲人跟住音樂或格律，填寫能夠依聲誦唱嘅詞（歌詞）。做填詞工作或職業嘅叫做填詞人或作詞人。由於「詞」喺以前同依家有唔同嘅意思，所以「填詞」亦可以根據所填嘅「詞」係以前抑或依家去分類。但唔理係邊種詞，填詞都係依聲填寫字句嘅文學創作。

音樂概念[編輯]

睇埋：音樂理論、音高同作曲

要學填詞，有必要理解一啲基本嘅音樂概念，包括：

  • 音高[1]：一種基本嘅音樂元素，係每個音符都會具有嘅一個特性；一個音符嘅音高簡單講就係指個音符聽落有幾「高」，而精確啲噉講嘅話，音高喺物理上查實反映咗一下聲嘅頻率有幾高，頻率愈高嗰吓聲聽落就會愈高音，喺五線譜當中，音高會以音符嘅高度表達，位置愈高表示個音符愈高音；例如以下係基本 C 大調嗰啲音高用五線譜表達嘅樣：
呢段聲係用鋼琴將 C 大調嘅音符由低至高彈出嚟，彈到最高再由高至低彈多次；圖中嗰兩個 C 之間相距一個八度。
一段節拍；呢段音樂係 4/4，即係話段節拍入面有 4 吓拍子，每吓拍子都係一個四分音符咁長。
呢段聲入面嘅鼓跟 3/4 嘅華爾茲節奏；每段節拍第一吓拍子重音。
以 96 bpm 打緊拍子嘅拍子機嘅聲；每吓聲算係一吓拍子。
  • 節奏[2][3]：指一段音樂嗰啲聲喺時間當中嘅擺位，會令到一段音樂有週期「時強時弱」嘅變化[4]：節奏嘅基本組成部份係拍子，拍子係計時單位，一吓拍子（以秒計）嘅長度可變但喺同一段音樂裏面恆定，而一段音樂每分鐘有幾多吓拍子（bpm）就反映咗段音樂嘅速度－ bpm 高就係速度快，bpm 低就係速度慢。
  • 旋律：指一系列嘅聲，呢柞聲喺音階上相同或者唔同都得，呢系列聲由一段特定嘅高低關係同節奏組合埋一齊形成一個整體；當一個人聽到一首旋律嗰陣，會將首旋律視為一段能夠單獨噉存在嘅物體，唔會覺得段聲係「由某段音樂嗰度切出嚟、唔完整嘅」[5]。

詳情可以睇睇樂理方面嘅概念。

語言概念[編輯]

睇埋：語音學、音系學、語言韻律同孤立語

填詞要求語言嘅字句配合一首樂曲，所以亦會掂到一啲語言學上嘅概念。

  • 音節：簡化講可以理解做「一個元音，前面有若干個輔音，後面亦可以有若干個輔音」，例如
    • 粵語嘅音節（粵拼：jam1 zit3）一詞有兩橛gyut6音節
    • 粵語嘅中意（粵拼：zung1 ji3）一詞有兩橛音節
    • 英文嘅 television（電視）一字有四橛音節；tel-e-vi-sion
    • 喺多數主流語言入便，填詞嗰陣一個音符正路會對應嗰隻語言入面嘅一段音節，而廿一世紀初嘅粵語書寫絕大多數情況下係一隻漢字對應一段音節。
  • 聲調：聲調係指一隻語言會靠一段音節嘅音高變化規律，辨別唔同嘅字詞或者（用語言學嘅術語講）形態素[6]；例如粵語就係一隻聲調語言，同冇聲調但係有語調嘅英文對比：
    粵語聲調：詩（粵拼：si1）、試（粵拼：si3）同埋是（粵拼：si6）噉—呢幾款音節喺元音同輔音上相同，但音高嘅變化規律有異，就變咗做意思唔同嘅字詞；
    英文語調：喺英文入便，啲句子如果最尾嗰段音高上升，就係變咗做問句，例如 He wrote the lyrics 就噉係「佢寫咗啲歌詞」嘅意思，但係如果句嘢最尾嗰橛音高上升，就會變成係問緊「啲歌詞佢寫嘅？」噉嘅意思。
    • 由上述嘅例子睇得出，英文並唔會因為音高變咗，令到讀出嚟嘅音變咗第隻字詞，音高變化表達嘅嘢，完全獨立於字詞本身嘅意思；好似粵語、客家話、閩南話、越南話同泰國話等嘅聲調語言，會將唔同嘅聲調當成唔同嘅音素，聲調唔同會令到一段語音變咗唔同字詞。
    • 聲調呢樣嘢，對於叶音（下面會講）嚟講好重要。
粵語詩史試時市事 6 個聲調嘅輪廓；粵語啲聲調輪廓相對簡單，一個聲調（大致上）一係平、一係升、一係跌，相比之下例如普通話嘅第三聲調就有「喺隻字途中，音高開頭嗰陣跌，跟住升」嘅情況。
  • 押韻：文學成日講嘅一個概念，指一篇最少有兩句嘅文學作品入面，每句最尾嗰隻字（或者音節）嘅韻母，全部或者大部份都一樣或者差唔多，令到件作品讀起上嚟抑揚頓挫。
  • 平仄：漢語文學上嘅一個概念，簡單講係話一首詩歌要好聽，一定要跟從某啲聲調上嘅平仄變化規律先至得。

詳情可以睇吓專門研究語音嘅語音學，以及係研究唔同語言分別點樣「組織」語音嘅音系學。

叶音[編輯]

内文：叶音

叶音係有啲聲調語言塡詞時嘅技巧，塡詞人要令歌詞嘅聲調走向同旋律嘅音高起伏一致。如果一種語言，聲調變化有較多，例如粵語，噉唔叶音（即係拗音，亦稱倒字）嘅歌詞容易令聽嘅人冇辦法正確辨識詞義。

睇埋[編輯]

引咗[編輯]

  1. ↑ Large, John (February 1981). "Theory in Practice: Building a Firm Foundation". Music Educators Journal. 32: 30-35.
  2. ↑ Epstein, David (1995). Shaping Time: Music, the Brain, and Performance. New York: Schirmer Books.
  3. ↑ Cooper, Grosvenor, and Leonard B. Meyer (1960). The Rhythmic Structure of Music. Chicago: University of Chicago Press.
  4. ↑ Anon. (1971). The Compact Edition of the Oxford English Dictionary II. Oxford and New York: Oxford University Press.
  5. ↑ Kliewer, V. (1975). "Melody: Linear Aspects of Twentieth-Century Music", Aspects of Twentieth-Century Music, pp. 270–301. Wittlich, Gary (ed.). Englewood Cliffs, New Jersey: Prentice-Hall.
  6. ↑ 3.7 Suprasegmentals. Essentials of Linguistics. Open Library.

外拎[編輯]

維基同享有多媒體嘅嘢：
填詞人
由「https://zh-yue.wikipedia.org/w/index.php?title=填詞&oldid=2129674」收