粵語文法

粵語係種分析語言，一句之中字詞嘅次序決定成句嘅意思；唔理賓主，主題都放喺一句開頭，所以粵語算做話題優先語言。唔同英文呢啲綜合語，粵語字嘅形態唔會改；要表達時間、性別或者單眾數時，會加啲補充詞：用副詞嚟表達時態；用疑問詞變一句做條問題；用感嘆詞表達語氣。有時亦要靠上文下理嚟推斷。

代名詞

好似第啲漢藏語系嘅語言咁，粵語嘅代名詞一身兼擔主格（英文：I, he, we）同賓格（英文：me, him, us）嘅文法功能。粵語用下面呢啲代名詞:

代名詞	發音(粵拼)	文法分類	相當於英文嘅	相當於普通話嘅
我	ngo5	第一人稱單數	I / me	我
你	nei5	第二人稱單數	you	你
佢	keoi5	第三人稱單數	He / she	他/她
我哋	ngo5 dei6	第一人稱眾數	We / us	我們
你哋	nei5 dei6	第二人稱眾數	You (all)	你們
佢哋	keoi5 dei6	第三人稱眾數	They / Them	他們

連繫詞

• 同英文比較，粵語唔需要用「verb to be」嚟表示狀態同埋性質。當同名詞補語一齊用時，「係」就係名詞補語嘅「verb to be」。同普通話比較，粵語嘅「係」相當於普通話嘅「是」。
  • 例如：「尋日係中秋節。」

• 「係」[hai6]同「喺」[hai2]係兩個唔同嘅字。「喺」同「響」[hoeng2]係用嚟表示時間同地點，相當於普通話嘅「在」。
  • 例如：「我而家喺圖書館。」

否定句

• 「唔」、「冇」同「未」都有否定嘅意思。加個「唔」字喺動詞前面就可以將句子變成否定。
  • 例如：「我食得花生。」

• 加個「唔」字就變成：「我唔食得花生。」／「花生我唔食得。」

• 「有」嘅相反係「冇」，唔係「唔有」。

要用命令嘅口氣阻止人做某啲嘢，就要用「唔好＋動詞」或者「咪＋動詞」咁樣嘅形式。

例如：「唔好睇戲。」／「咪睇戲。」

• 「唔」字除咗可以將肯定句變成否定句之外，重可以將一個字轉成佢嘅反義詞。有時加咗「唔」字意思會有啲唔同。
• 意思變咗嗰啲可以有「咗」字跟喺後面，冇變嗰啲就唔可以。

本字	普通話	英文		加唔之後	普通話	英文
見	看	see		唔見	不見／丟	lose
記得	記得	remember		唔記得	不記得／忘	forget
錯	錯	wrong		唔錯	不錯	pretty good; not bad

   我唔見咗我本書 "I lost my book"　啱
   我唔食咗嘢 "I did not eat"　　　唔啱

問題

是非題

• 是非題嘅公式係：主語＋動詞＋唔＋動詞（＋賓語）
  • 例如：「你識唔識講廣東話？」

• 如果問到關於存在，擁有嘅問題時就要用：（主語＋）有冇＋賓語
  • 例如：「有冇紅綠燈？」

• 係唔係通常都縮成係咪。
  • 例如：「佢係咪加拿大人？」

• 如果個動詞有多過一個字，淨係頭一個字會重復。
  • 例如：「你鍾唔鍾意食年糕？」

疑問詞

粵語嘅疑問詞有：

疑問詞	發音	相當於英文嘅	相當於普通話嘅
邊個	bin1 go3	who	誰
乜（嘢）/ 咩	mat1 (je5) / me1	what	什麼
邊度 / 邊處	bin1 dou6 / bin1 syu3	where	哪裏
幾時	gei2 si4	when	幾時/什麼時候
點解	dim2 gaai2	why	為什麼
點（樣）	dim2 (joeng6*2)	How	怎樣
幾多	gei2 do1	How many/much	多少

單眾數嘅表達方法

單數

• 「呢」同「依」表示講緊嘅嘢接近講說話嘅人。
  • 例如：呢本書／依本書
• 「嗰」表示講緊嘅嘢同講說話嘅人有一段距離。
  • 例如：嗰本書

眾數

• 加個「啲」喺名詞前面就表示眾數
  • 例如：呢啲書／嗰啲書

擁有格

• 如果後面接單數名詞，前面就用「嘅」。
  • 例如：阿爸嘅屋
• 如果後面接眾數名詞，前面就用「啲」。
  • 例如：你啲動物　
• 注意：「啲」喺粵語度有好多功用。除咗表示眾數之外，重可以解做「少少」e.g. 「一啲」　或者「早少少」／「比較早」e.g.「早啲」。
• 擁有格代名詞嘅公式係：代名詞＋嘅/啲
  • 例如：係佢嘅呀！（「呀」係正面助語詞）／係佢嘅！／（係）佢㗎！（㗎＝嘅呀）
• 但係如果冇寫出後面接嘅名詞，就唔會用「啲」。只有寫出後面接嘅名詞，先至可以用「啲」。
  • 反面教材：係佢啲呀！

例如：

呢啲書係邊個嘅呀？

係佢嘅呀![指佢啲書]（「嘅呀」 通常縮做 㗎 [gaa3]）

亦都可以講成：係佢啲書呀！

量詞嘅特別用法

• 粵語量詞可以表示從屬（possession），所以唔係一定要用到嘅同啲。事實上，用量詞表示從屬嘅次數同用嘅嘅次數差唔多。
  • 例如：
    • 佢本書＝佢嘅書／他的書／his book
    • 借支筆嚟用吓吖
• 粵語量詞有埋指示詞（demonstrative）嘅功用，但不分遠近。
  • 例如：
    • 條魚好新鮮喎！
    • 嘩個公園真係大吖！[粵拼ja3,通常ya3]
• 如果量詞前面冇數詞，就表示係一
  • 例如：
    • 畀杯水我得嗎？
    • 整碗麵食下都好喎！

時間補充詞語

進行式

「緊」用嚟講啲嘢係發生當中。

• 炸緊冬甩，咪搞我。

完成式

「咗」用嚟講啲嘢係完咗。

• 啲冬甩凍咗快啲食啦。

「完」用嚟講啲嘢係做咗。

• 食完冬甩，打完機，上吓網先。

過去完成式

「晒」用嚟講啲嘢係完咗一段時間。要主意嘅係「晒」有「全部」、「都」、「完」、「光」、「了」嘅意思；亦作加強語氣嘅作用。

• 啲冬甩食晒啦。
• 攞晒啲衫褲出去曬太陽。
• 唔該晒。

「過」有曾經發生嘅意思

• 去過冬甩鋪，唔見你喎。