上葡京

  想搵第二個意思嘅話，請睇葡京 (搞清楚)。

澳門上葡京綜合度假村（英文：Grand Lisboa Palace Resort Macau），簡稱上葡京（英文：Grand Lisboa Palace）係秏資300億港幣，起喺路氹城嘅綜合型酒店渡假村，為澳娛綜合嘅生意。由於與地盤有關同冇關嘅天災人禍頻仍，開幕日期一再推遲。

上葡京所在地段鄰近澳門東亞運動會體育館，佔地70,468平方米，超過九成地方唔係博彩設施，將設有大約27,000平方米博彩區，設大約700張賭檯同1,200部老虎機。總樓面面積為521,435平方米。另外停車場同園林綠化部分，分別佔地77,158同37,386平方米。

期

上葡京地段喺2013年5月3號由時任澳門特別行政區運輸工務司司長劉仕堯批出，喺2014年2月13號正式動工，最初預計喺2017年啓用，但係工期變化，之後定於2018上半年開業。然後，2017年嘅工業意外以及天鴿風災令工期延長，於是又將預計開幕時間推遲到2019下半年。最終項目喺2019年底竣工，準備喺2020下半年開幕。不過由於武漢肺炎疫情持續肆虐全球同財政問題，最新宣布會响2021年下半年正式揭幕。多次火災同欠薪糾紛，係工程嘅另外兩大阻礙。

禍

2015年11月22號，由於操作出錯，有個25歲外籍內地男僱工，喺上葡京地盤被鑽探機威吔纏住吊起咗，搞到左手臂骨折。

2015年11月28號，上葡京地盤火警，被燒嘅主要係大面積桁架，消防覺得起火原因唔尋常，通知司法人員調查。

2016年6月24號，十多個外地建築工去到上葡京地盤集會討薪。佢哋嘅代表黃雄飛表示，總共有120個工友被拖糧，總金額達八百多萬；關事嘅唔止得澳博，重包括成龍工程有限公司同澳門中河建築有限公司。

2016年9月9號，上葡京地盤有塊200公斤重嘅玻璃幕牆喺吊運中途，跌咗落嚟，砸死咗個48歲林姓外僱內地男工。

2016年9月14號，4個年齡為24至51歲，上葡京地盤嘅內地男工人，喺嗰道一個好高嘅天秤上面掛起寫住「澳博（、）成龍（、）還我血汗錢！！」嘅直幡兼危坐，追討欠薪；消防員嚟到打開救生氣墊戒備；之後其中一個爬返落去天台，同資方代表講數；最終佢哋統統安全噉走返落嚟。

2016年09月19號，報稱喺上葡京地盤做開嘢嘅大約五十多／七十多個本地人，去到勞工局投訴被無理停工同解僱。陪同佢哋嘅李靜儀透露，受影響嘅員工有九十多人，受聘到上址做清潔雜工，點知唔夠一個禮拜就被老細停咗工。李靜儀話，個地盤約略有三千七百個外僱，當中有唔少同呢班人工種相同；噉樣做，即係將本地人當成臨時替工，僱主涉嫌違反「本地人優先就業」嘅法定原則。勞工局其後發布新聞稿，話有做嘢，又幫86個本地僱員登記咗資料，兼會繼續跟進協調，確保本地僱員持續優先就業。兩日之後，總承建商同工人喺勞工局重新簽約，受影響嘅大約九十人，通通以原本嘅薪酬同福利條件復工。

2016年11月27號，喺上葡京地盤，有幅啱啱砌好嘅磚牆塌咗，整傷個49歲內地男外勞；佢右小腿出血，懷疑骨折，送院治理。

2016年12月26號，有個33歲內地男外僱冷氣技術工，喺上葡京地盤搬鋁板時唔小心被其壓傷，右小腿懷疑骨折，經初步包紮後送院。

2017年3月17號，上葡京地盤火燭，522人要疏散，冇傷亡，消防認為起火原因可疑，叫司警跟手調查。

2017年4月17號，上葡京地盤有個27歲外僱男工，開工時被電線轆輾過腳掌而骨折。

2017年6月18號，上葡京地盤一個47歲姓唐嘅內地男性外僱工人，喺高樓頂開工期間，因叉錯腳而跌死咗。至此，嗰處已經有兩次死人意外，勞工局勒令全面停工。司警調查後相信，係由於個57歲嘅關姓澳門男管工，擅自叫人拆走咗啲應有結構，嚟方便材料搬運，先至釀成慘劇，於是响同年9月25號以涉嫌「違反建築規則及擾亂事業」罪名，將佢交去檢察院法辦。

2017年9月23號，上葡京地盤火燭，88個工人要疏散，期間有個外籍勞工被困，由消防救走，一個消防員救火時唔舒服，要去醫院；總共有一個地盤看更同一個消防員受傷。消防局調查發現，火頭有三個，懷疑係縱火案，於是交咗畀司警繼續查。

2018年2月5號，有班上葡京地盤工人喺地盤外面請願，指二十多個本地工人被拖糧加埋過百萬澳門幣，向新裕建設工程有限公司同潘智權追數；後嚟有自稱「澳博」代表現身，同工人代表入咗去地盤道斟，工人最終和平離開。工人代表話，已經準備好寄律師信；若果再收唔到錢，會開始「有限度開工」。

2018年5月12號，有個三十幾歲嘅男性內地泥水工人，為咗追薪約莫一萬三千蚊澳門幣，危站於上葡京地盤一幢大廈高處邊緣，企圖跳樓。勞工局職員同司警談判專家成功勸到佢自行脱險，欠薪公司嘅人亦到場還清咗欠款。

2018年11月12號，大概七十個自稱上葡京地盤外僱工人，一齊去到勞工局投訴收唔足糧，要求介入；代表張先生指班人上個月已經嚟反映過，然而該局冇誠意處理兼一味推搪。

2018年11月27號，有上葡京地盤員工，發現地庫一間擠建材嘅房出煙，於是自己射水同叫嚟消防；無人整親；司警話，嗰處地上面有堆被燒毀嘅紙皮同膠建材，重有煙頭，初步將單嘢列作縱火案。

2019年4月1號，澳亞衛視報道：澳門人林先生向該電視台控訴，上葡京承建商集寶澳門有限公司似乎「假招工」，耍到佢氹氹轉；佢向勞工局投訴咗；之後，起初向佢「招工」嘅中介人，畀2,000蚊澳門幣話補償下，不過要佢簽署份造假文件（寫住來路不明嘅德億建築工程有限公司）；收尾勞工局裁定投訴唔成立。

2019年4月7號，上葡京有間雜物房着咗火，消防員嚟到之後救熄咗，無傷到人；消防認為有可疑，交畀司警查落去；列為懷疑縱火案；現場發現多個煙頭；有膠桶、膠紙同雜物燒爛咗。

拎

• 澳門上葡京綜合度假村｜GRAND LISBOA PALACE
• Grand Lisboa Palace Macau 澳門上葡京 - 主頁 | Facebook