下白泥碉堡
白泥碉堡，又叫浪濯村39號，係喺香港元朗下白泥嘅浪濯村，大約喺1910年廣州新軍起義之後起嘅，係同清末革命運動相關嘅建築。
孫中山嘅追隨者李紀堂（1874至1943年），1901年喺屯門䃟石灣一帶設置咗青山農場，用嚟儲存軍械，演練射擊，同埋接濟啲因革命運動而走嚟匿埋嘅人士。隨住廣州新軍起義失敗後，鄧蔭南（1846至1923年）就喺下白泥良雀坑口（後稱浪濯村）起咗碉堡做基地，用嚟做青山農場嘅後盾。
下白泥喺元朗稔灣，對正后海灣。二十世紀初嗰時人影都唔多隻嘅地方，加上沿岸嘅長泥灘同埋叢林，有利廣州同青山農場嘅革命黨人喺事敗嗰時，走去嗰度匿埋。
碉堡以方形設計起嘅，用青磚砌成，樓高兩層，一樓同天台之間有個閣樓。碉堡外牆開咗槍窿，用嚟防禦。碉堡附近本來有稻米磨坊同煉糖廠，多年前已經拆咗。