世界夢號
世界夢號（英文：World Dream）係一隻星夢郵輪旗下嘅郵輪，由德國嘅邁爾造船廠製造，2017年8月26號落水，同年11月17號喺香港啟德郵輪碼頭啟航同舉行命名儀式，係頭一隻喺香港命名嘅郵輪[1]
世界夢號排水量十五萬一千三百噸，甲板有18層高，有1686間客房，其中超過七成有私家露台，亦有其中有過間房係可以打通嘅3到4人房。成隻郵輪可以容納到3400位旅客。
世界夢號嘅構造同雲頂夢號差唔多，有6條水上滑梯，重有豪華海底觀光器，雖然冇咗保齡球房，但係有個全球最大嘅海上VR虛擬實境體驗室。
世界夢號逢禮拜五都泊喺香港，參與幻彩詠香江表演。
相關事件[編輯]
2020年肺炎疫情[編輯]
内文：武漢肺炎大爆發
2020年肺炎疫情蔓延陣，廣東嘅疾控中心通知星夢郵輪，喺1月19至24號世界夢號由廣州南沙去越南嘅航線度，有3名大陸旅客確診咗有武漢肺炎[2]，接受咗隔離治療[3]。郵輪2月4號畀臺灣高雄拒絕埋岸後，提早返航喺2月5號返到香港，停泊啟德郵輪碼頭[4]，接受咗衛生署檢疫，呢陣船度仲有1,800幾名乘客，大部分係香港居民，仲有其他外藉旅客。所有人未有畀落船，而上期航次嘅武漢肺炎患者確診人數同日增至8人[5]。星夢郵輪喺2月5號宣布咗世界夢號停止營運，同時會全面咁消毒[6]，而啟德郵輪碼頭同日即時關閉埋[7]。
到2月9號，千幾名船員對病毒嘅檢測結果都係呈陰性，船上所有人都獲准落船。
參考[編輯]
- ↑ 首艘在港命名郵輪世界夢號 供最大VR體驗室
- ↑ 〈【武漢肺炎】上下船逾4000客 廣州出發「世界夢號」郵輪3人確診〉. 《香港01》. 2020-02-04. 喺2020-02-05搵到.
- ↑ 〈世界夢號三內地人確診 三名船員發燒需隔離〉. 《香港01》. 2020-02-05. 喺2020-02-05搵到.
- ↑ 〈【武漢肺炎】「世界夢號」曾載確診患者 旅客被拒高雄下船 郵輪今抵港郵輪碼頭〉. 《明報》. 2020-02-05. 喺2020-02-05搵到.
- ↑ 〈上程8客確診 郵輪3600人留船檢疫 「世界夢號」33船員曾現病徵 未知需否全船隔離14天〉. 《明報》. 2020-02-06. 喺2020-02-06搵到.
- ↑ 〈【武漢肺炎】「世界夢號」郵輪被困港人批船公司隱瞞 稱被拒高雄上岸始知患者曾登船〉. 《明報》. 2020-02-05. 喺2020-02-06搵到.
- ↑ 〈封關擠牙膏 香江淪疫港〉. 《東方日報》. 2020-02-06. 喺2020-02-06搵到.