中文維基百科嘅紛爭
 |
中文維基百科冇辦法以內部機制解決嘅主要紛爭，幾乎統統都關中共事。
中共操蹤讀者及編者
[編輯]中文維基百科自2015年起，俾防火長城整個封鎖，大陸境內用戶如果唔用VPN等工具「翻牆」，瀏覽及編輯唔到維基百科[1][2]。雖有防火長城阻隔，但近年中文維基百科湧現愈嚟愈多嚟自大陸嘅用戶，另有身處外地讀書及做嘢嘅大陸用户。以中文維基百科喺2020年在任嘅七十六個管理員為例，中國大陸佔咗其中半數嘅三十八個，另外有廿個嚟自台灣，十七個嚟自香港，仲有一個嚟自澳門。雖然有啲住喺大陸嘅人，因俾公安機關發現「翻牆」睇維基百科而受到處罰，但係政府允許部分同樣處於此地嘅人長期編輯維基百科，佢哋包括唔少姓名及／或樣貌（都）公開嘅管理員[3]。官方嘅《環球時報》甚至為包括大陸翻牆者嘅親中共管理員之權力，被維基媒體基金會剝奪一事，去聲討對方，並刊登評論員文章，其中一篇嘅內容係對一個可能係吹哨者之居美大陸人嘅起底消息及人身攻擊等[4][5]；另外一篇就話此舉係偏幫邪教分子及極端分子[6]。由於嗰班嚟自中國大陸嘅管理員大部分都明顯偏愛中共，香港同台灣嘅用戶愈嚟愈擔心，同該黨立場衝突嘅聲音會受到更多打壓，令維基百科內容更加偏頗[7][8]。有個中文維基百科管理員曾經被連續幾年禁止離開大陸，中共唔講明點解，而佢本人及其相熟大陸異見人士則相信，作此懲罰之目的為阻止佢參加互聯網類現場會議[9]。
封殺批評中共之觀點
[編輯]2006年11月30號，美國《國際先驅論壇報》嘅一篇報導批評中文維基百科敘述另一種歷史觀[10]。報導內容提及中文維基百科「美化毛澤東」等文章，當時中華民國維基媒體協會籌備聯絡人就回應，話大家誤會咗維基百科，話審查其實係由用戶一齊做[11]，但類似嘅批評仲未完全消失。香港時事評論員黃世澤曾經多次批評中文維基百科，認為佢哋嘅內容同管理層都偏幫中共，其中點名批評過百無一用是書生同No1LoveSu，又批評維基媒體基金會一直以嚟都無處理過中文維基百科嘅五毛問題[12]。中國大陸用戶同管理員亦會群起攻擊同佢哋政見有出入嘅人士，即使喺爭議聲中都堅持將佢哋封殺[13]。最尾有三個嚟自大陸嘅管理員，話佢濫用傀儡並將幾個户口永久封鎖，黃世澤鬧對方老屈佢。
貶中共嘅傳媒被踩低
[編輯]中文維基百科資深管理員AT喺2021年接受香港自由新聞（HKFP）訪問嗰陣講，編輯人士總會搵到唔同政治立場嘅媒體來源嚟支持佢哋嘅觀點。雖然通過引用唔同觀點嚟提出爭議，正係撰寫一篇好文章嘅關鍵，但編輯面對嘅呢啲挑戰並唔係維基百科可以解決嘅問題。另一位受訪嘅香港資深編輯陳德銘係英文同粵文維基百科嘅管理員，佢話喺香港被廣泛接受嘅敘述、資訊同圖像，經常畀中國官方或者親政府嘅媒體質疑[14]。有維基編輯將中國環球電視網等中國官媒當成可靠嘅消息來源，但將香港嘅《蘋果日報》、《立場新聞》等視為唔可信。台灣嘅政治地位喺中文維基百科上面亦經常受到嚟自中國大陸人士嘅挑戰，其中圍繞台灣到底係一個國家，定係中國一個省份嘅問題經常引起兩岸用家發起編輯戰。外界認為維基百科已經淪為中國政府「講好中國故事」嘅「中國大外宣」新工具[15]。
擁護或唾棄反送中之纏鬥
[編輯]自從2019年反送中運動以嚟，香港同大陸編輯之間嘅分歧日益擴大，彼此爭拗不斷，關於香港政治事件嘅文章，經常出現編輯戰。中文維基百科對於一啲事件嘅形容同字眼，亦陷入爭議。有親中派嘅用戶提出，要禁止引用《蘋果日報》撰寫反送中運動內容，又聲稱冇證據指親中背景嘅《HKG報》誤導讀者等。另外，亦有親中派嘅用戶借用版權名義，或者聲稱啲照片係偽造，唔中立，刪除一啲涉及警察針法暴力嘅照片，但佢哋未有提出證據，或者本來拍攝照片嘅人已經表明可以以自由版權分享[16]。有部份香港嘅用戶認為，一直有啲中國大陸用戶眼中嘅「中立」就係以中共所謂嘅「中立」，佢哋參與嘅目的係宣揚中國政府嘅聲音，有啲其他比較開明嘅中國用戶都頂唔順，而情況喺2019年之後變得更加嚴重。
要求或拒絶港版國安法介入嘅是非
[編輯]2020年中共強行實施港版國安法之後，維基媒體基金會發出聲明，表示暫時唔受理嚟自香港執法機關嘅非公開信息請求，同埋希望保護編者並為讀者製造一個安全嘅環境[17]。
2021年，一個名叫Walter Grassroot嘅維基編輯，喺中國維基QQ群入面提議向國家安全處舉報香港用戶[18]。事件引發極大爭議，甚至令隸屬維基媒體基金會嘅香港用戶組成員召開咗緊急會議商議對策，並提供指引避免人肉搜尋。之後維基媒體基金會介入調查，2021年9月14號，維基媒體基金會宣布禁止七個嚟自中國大陸嘅用户，同埋移除咗十二個中國大陸管理員嘅權限[19]（睇2021年維基媒體基金會針對中文維基百科嘅行動同埋Wikipedia:2021年基金會針對中文維基百科嘅行動）。
考
[編輯]- ↑ 〈中文維基被屏蔽，每日閱讀量減少千餘萬〉。《維基新聞》。2015-06-12。
- ↑ 〈維基媒體基金會全站再遭中國政府封鎖〉。《維基新聞》。2015-12-12。
- ↑ 〈翻墙看维基百科遭训诫 网曝9成vpn中共开发 - 大纪元〉。《大纪元 www.epochtimes.com》 (簡體中文)。2020-10-29。喺2022-09-01搵到。
- ↑ Times, Global. "Wikipedia's neutrality 'hugely impaired' after ban on Chinese mainland users: WMC insider - Global Times". www.globaltimes.cn. 喺2022-09-02搵到.
- ↑ 补刀客。〈又发现一个吃里扒外的"汉奸"！〉。《微信公众平台》。喺2022-09-02搵到。
- ↑ 〈维基百科，开始对中国人"大清洗"了？〉。xw.qq.com (中文)。喺2022-09-03搵到。
- ↑ Pasternack, Alex (2021-12-18). "The war over Chinese Wikipedia is a warning for the open internet". Fast Company (美國英文). 喺2022-09-02搵到.
- ↑ 〈【Back Up 香港．1】維基百科編輯戰〉。《立場新聞》。原著喺2021年7月6號歸檔。喺2021年7月15號搵到。
- ↑ 〈维基百科拒绝配合北京审查 中文管理员被限制出境〉。Radio Free Asia (中國中文)。喺2022-09-02搵到。
- ↑ Chinese-language Wikipedia presents different view of history 互聯網檔案館嘅歸檔，歸檔日期2020年3月15號，.，《國際先驅論壇報》，2006年11月30號
- ↑ 大家都誤解咗維基百科 互聯網檔案館嘅歸檔，歸檔日期2011年4月29號，.，《台灣蘋果日報》，2006年12月7號
- ↑ 黃世澤。〈維基百科中文為何不堪入目 黃世澤幾分鐘 #評論 20201128〉。
{{cite web}}: CS1 maint: url-status (link) - ↑ 維基百科討論 - 中文維基百科
- ↑ SELINA CHENG (2021-07-11). "Wikipedia wars: How Hongkongers and mainland Chinese are battling to set the narrative". Hong Kong Free Press HKFP.
- ↑ 〈維基百科台灣詞條背後的編輯權之爭〉。《BBC News 中文》。2019-10-07。
- ↑ 〈【Back Up 香港．1】維基百科編輯戰：誰在定義香港抗爭？ | 立場新聞〉。《立場新聞 Stand News》。原著喺2021-07-06歸檔。喺2021-07-12搵到。
- ↑ "New Chinese national security law in Hong Kong could limit the privacy of Wikipedia users". Wikimedia Foundation. 2020-07-15.
- ↑ 陳彥 (2021-07-12)。〈【資訊戰】中文維基百科成中港戰場 中國編輯稱向國安舉報香港編輯〉。《自由亞洲電台》。
- ↑ 〈維基百科禁 7 內地用戶 指有滲透起底風險 內地群組：準備鬥爭 | 立場報道 | 立場新聞〉。《立場新聞 Stand News》。原著喺2021-09-15歸檔。喺2021-09-16搵到。