中立議員

中立議員(英文：Crossbencher，又譯橫凳議員)係英國上議院、澳洲國會同加拿大國會嘅一個術語，指議會入面又唔代表執政黨、又唔代表反對黨嘅議員。

英文 Crossbencher 直譯「坐橫凳嘅人」，起源英國上議院開會時，執政黨嘅議員坐一邊，反對黨嘅議員坐對面。而中立議員就坐喺長方形議事廳第三面嘅橫凳(Crossbench)，同執政黨、反對黨嘅凳成直角。澳洲同加拿大嘅議會承襲西敏制，亦有將中立議員擺喺橫凳嘅傳統。

喺英國上議院，中立議員嘅出現係因爲上議院唔係民選代表；大部分係過往政府委任嘅終身貴族。佢哋有啲代表主要政黨，但亦有唔少係社會各界領袖，冇政黨背景，喺議會投票嘅時候唔使跟黨鞭投票。

澳洲有兩個主要政治聯盟，通常一個喺執政黨另一個喺反對黨。中立議員指啲唔屬於呢兩個聯盟嘅獨立議員，佢哋有時會支持執政黨，有時支持反對黨，亦有坐喺橫凳嘅傳統。