英國上議院

出自維基百科,自由嘅百科全書
一個樓底好高、長而窄嘅大廳,傢俬係木造,凳背全部紅色。
英國上議院議事廳

英國上議院(House of Lords of the United Kingdom),又叫貴族院(House of Peers),係英國國會嘅上議院,喺倫敦西敏宮開會。英國上議院嘅正式全名叫「大不列顛及北愛爾蘭國會尊敬嘅靈職及世俗貴族集合」(The Right Honourable the Lords Spiritual and Temporal of the United Kingdom of Great Britain and Northern Ireland in Parliament assembled)。

上議院嘅議員全部都唔係民選嘅。議員包括靈職議員同埋世俗議員。靈職議員代表國教英倫聖公會,由時任主教兼任。由於聖公會係英國國教,靈職議員同其他上議員有相同立法權力,但英國聖公會本身嘅憲制修訂亦需要靈職議員喺上議院提出,國會通過,先至算數。

世俗議員就分兩類,一類係世襲貴族,佔92席,每有空缺就由淨返嘅世襲貴族議員選一個貴族嚟填補;另一類係終身貴族,由君主首相提議委任,人數冇上限。上議院議員可以兼任政府官員。

上議院開會時,議員分三邊坐。執政黨同靈職議員坐一邊;反對黨坐對面;中立議員就坐側邊打橫擺嘅凳,所以又叫橫凳議員(Crossbencher)。

英國國會嘅法例草案可以由政府喺英國下議院提出,亦可以由下議院或者上議院主動提出。法案要過晒兩院先至會成為法律。上議院負責審核英國下議院通過嘅法案,而且經常會提出修訂[1]。一般情況下,上議院無權單方面廢除下議院通過嘅法案[2],但可以將具爭議嘅法案發還下議員重審,或者拖延法案生效日期最多一年,為英國嘅民主政制提供選票以外嘅一種權力制衡[3][4]。上議院有自己獨立於下議院嘅支援設施,例如上議院圖書館

每年國會開幕大典,君主都會喺上議院議事廳向全體國會議員致辭,內容一般由現屆政府提供,解釋嚟緊一年嘅立法計劃。終審法庭嘅崗位曾經由上議院轄下嘅上院法官包辦,直至2009年英國終審法院成立,立法司法正式徹底分家。 

References[編輯]

  1. "Guide to the House of Lords". BBC Democracy Live. 31 May 2011. 喺29 January 2012搵到.
  2. UK Parliament.
  3. The Constitutional Reform Process
  4. Second Chambers as Constitutional Guardians and Protectors of Human Rights