五度相生

五度相生

五度相生（英文：circle of fifths，又叫 circle of fourths），又叫五度連環、五度圈、五度循環，喺西方音樂系統，原本係指由一個音開始，一路咁攞純五度，結果會得出半音音階入面嘅所有十二個音，同返返去本來嗰個音，只係去咗唔同八度。喺現時，講五度相生，好多時係指表示呢種關係嘅一種圓形圖表。

用五度相生可以得出音階入面嘅所有音，方法叫五度相生律，但係咁樣搵出嚟嘅音高同用八度搵出嚟嘅音高，兩者嘅實際頻率其實有出入，兩者之間嘅誤差叫畢氏音差（Pythagorean comma），大約等如八分之一音。將代表音階入面所有音嘅頻率比例調整到冇誤差嘅方法叫十二平均律。

五度相生同畢氏音差

假設由中央 C 開始，一路攞純五度（頻率 1.5 倍），會順序得出 G、D、A、E、B、F♯（G♭）、C♯（D♭）、G♯（A♭）、D♯（E♭）、A♯（B♭）、F 十一個音，然後返到 C。假設中央 C 頻率係 262 赫，最後得出嘅 C 音係

$262\times 1.5^{12}\approxeq 33993.54052734375$（赫），

但係如果由中央 C 開始，一路攞純八度（頻率兩倍），結果發現呢個 C 音嘅頻率其實應該係

$262\times 2^{7}=33536$（赫），

誤差係

$\log _{2}({\frac {33993.54052734375}{33536}})\times 1200\approxeq 23.460010384649014$（音分）。

五度相生圖

現時講五度相生，通常係指一種表示十二音音階入面每個音之間嘅關係嘅圓形圖表，入面有齊十二個音，喺幅圖隔得越遠就越撞音，隔得最遠嘅係增四度。

呢幅圖亦表示埋某個大調嘅關係小調或者某個小調嘅關係大調係乜、某個調要幾多個升號或者降號等等。

幅圖外面係大調，入面係對應嘅自然小調。由最頂係調號冇升號冇降號嘅 C 大調/A 小調，每升一個純五度（七個半音）就係順時針方向行一格同調號加一個升號；相反，每降一個純五度就逆時針方向行一格同加一個降號，直到返返到頂頂嘅 C 大調/A 小調。

另一種睇嘅方法亦係由最頂開始，每升一個純四度（五個半音）就係逆時針方向行一格同調號加一個降號，相反，每降一個純四度就順時針方向行一格同加一個升號，直到返返到頂頂嘅 C 大調/A 小調。

主要用法

同某個調最夾嘅和弦

張表最主要嘅用法係睇兩樣嘢有幾夾。搵任何一個調，喺佢嗰格同佢隔籬嗰兩格嘅和弦會係喺嗰個調最常用嘅六個和弦。

兩個調之間有幾夾

搵任何一個調，喺幅圖越近嘅第個調，就越多相同音，相反，越遠就越少相同音。例如，如果喺作曲或者編曲嗰陣想轉調，C 大調轉隔籬嘅 G 大調會冇乜難度，但係要轉去隔三格嘅 A 大調就會有一定難度。

書目

• 課程發展處藝術教育組 (2023年9月)。〈音樂科學與教常用英漢辭彙〉 (PDF) (英文、香港中文)。教育局。喺2024年7月22號搵到。