亞氏保加症

出自維基百科,自由嘅百科全書
Jump to navigation Jump to search

亞氏保加症(Asperger syndrome),又譯亞斯伯格症,係一種自閉症譜系發展障礙,患者一般智力正常,甚至較高,語言能力發展大致正常,但喺社交溝通同埋人際關係上出現一啲發展障礙。

佢嘅重要特徵係社交同埋非言語交際的困難,同時係興趣狹窄及重複特定行為,但相較於其他泛自閉症障礙,仍相對保有語言及認知發展。通常亞氏保加症患者智力正常,有好多人智商偏高,具有某啲方面嘅天賦,極少數人屬於高智商。但患者經常出現肢體笨拙同埋語言表達方式異常等狀況,間唔中發出怪聲音,但並唔會作為診斷依據。症狀一般喺兩歲前出現,會跟住患者一世,目前冇有效治療方法 [1]

根據美國精神學會最新標準,而家已經冇再現用亞氏保加症呢個名,並將佢歸納為高能力自閉症,輕度自閉症或自閉譜系障礙。

歷史[編輯]

1944年,奧地利兒童精神科醫生漢斯.亞氏保加(Hans Asperger)發表咗一篇論文,佢發現一啲兒童有顯著同人相處同溝通嘅困難,都有類似嘅行為特徵。不過呢篇論文發佈嗰時正值第二次世界大戰,所以論文喺戰勝國未有人理。去到1981年,蘿娜·溫就喺英國介紹咗亞氏保加症嘅發現。九年之後,亞氏保加症就開始被世人知道,而呢個病後嚟亦以佢個姓氏嚟命名[2]

徵狀[編輯]

有亞氏保加症嘅人,必須要有以下三種徵狀:[2]

  1. 社交困難:唔理解其他人嘅諗法,因此驚同其他人接觸,所以冇乜朋友,所以容易自我中心、唔合群、較少同其他人作眼神接觸或身體接觸、甚至有時會做出唔恰當嘅社交行為而俾人排斥或整蠱[3]
  2. 溝通困難:唔識睇人眉頭眼額,只可以理解字面意思,導致冇乜溝通技巧,因此比較沉默寡言,唔識得用說話去表達自己[3]
  3. 固執或狹窄興趣:好堅持既定嘅做法,好驚有任何改變,只要有一啲唔同咗就會唔開心,甚至會發脾氣,對有興趣嘅事物會深入研究同搜集資料,結果難於適應環境嘅改變,生活刻板同單調[3]

治療[編輯]

科學家重未揾到亞氏保加症嘅成因,只知道佢係一種腦功能嘅問題,同父母嘅教養方式無關[2]。依家重未有根治亞氏保加症嘅方法,但係可以透過有系統嘅教育同訓練,例如行為治療、語言治療物理治療等,加埋適當嘅環境,畀患者有多啲同其他人接觸同溝通嘅機會,就可以幫助佢哋減低症狀所帶嚟嘅障礙[3]

而喺歐洲,有兒童精神科醫生話,騎馬有助改善亞氏保加症嘅障礙,因為咁會令到身體釋放一重降低焦慮感嘅荷爾蒙,叫做催產素。咁嘅話就有助亞氏保加症同埋自閉症兒童學習。

[編輯]

  1. "亞氏保加症兒童家長指引 甚麼是亞氏保加症?". 香港教育城. 喺2013-04-17搵到. 
  2. 2.0 2.1 2.2 "蕊展計劃 甚麼是亞氏保加症?". 香港教育學院. 喺2013-04-17搵到. 
  3. 3.0 3.1 3.2 3.3 "及早識別自閉症及亞氏保加症兒童". 協康會. 喺2013-04-17搵到. 

出面網頁[編輯]