亞氏保加症

出自維基百科,自由嘅百科全書
跳去導覽 跳去搵嘢

亞氏保加症(Asperger syndrome),又譯亞斯伯格症,係一種自閉症譜系發展障礙,患者一般智力正常,甚至較高,語言能力發展大致正常,但喺社交溝通同埋人際關係上出現一啲發展障礙。

佢嘅重要特徵係社交同埋非言語交際的困難,同時係興趣狹窄及重複特定行為,但相較於其他泛自閉症障礙,仍相對保有語言及認知發展。通常亞氏保加症患者智力正常,有好多人智商偏高,具有某啲方面嘅天賦,極少數人屬於高智商。但患者經常出現肢體笨拙同埋語言表達方式異常等狀況,間唔中發出怪聲音,但並唔會作為診斷依據。症狀一般喺兩歲前出現,會跟住一世,研究並冇所謂有效嘅治療方法[1],有相當嘅專業研究傾向呢個屬於「人格特質」,只係一種異於常人嘅思考同行為模式,睇在多或少。

美國精神學會(American Psychiatric Association)喺2012年經已取消咗亞氏保加症呢個病名,並將佢歸做自閉症類群障礙(Autism spectrum disorder),有叫高能力自閉症、輕度自閉症或自閉譜系障礙。而2013年更新嘅精神疾病診斷與統計手冊第5版(DSM-5)度,亦經移除咗佢嘅診斷內容。[2]依家亞氏保加呢個詞,已多係指一個人嘅人格特質。

歷史[編輯]

1944年,奧地利兒童精神科醫生漢斯.亞氏保加(Hans Asperger)發表咗一篇論文,佢發現一啲兒童有顯著同人相處同溝通嘅困難,都有類似嘅行為特徵。不過呢篇論文發佈嗰時正值第二次世界大戰,所以論文喺戰勝國未有人理。去到1981年,蘿娜·溫就喺英國介紹咗亞氏保加症嘅發現。九年之後,亞氏保加症就開始被世人知道,而呢個病後嚟亦以佢個姓氏嚟命名[3]

徵狀[編輯]

有亞氏保加症嘅人,必須要有以下三種徵狀[3]

  1. 社交困難:唔理解其他人嘅諗法,因此驚同其他人接觸,所以冇乜朋友,所以容易自我中心、唔合群、較少同其他人作眼神接觸或身體接觸、甚至有時會做出唔恰當嘅社交行為而俾人排斥或整蠱[4]
  2. 溝通困難:唔識睇人眉頭眼額,或者識睇都唔理。只可以理解字面意思,導致冇乜溝通技巧,因此比較沉默寡言,唔識得用說話去表達自己[4]
  3. 固執或狹窄興趣:唔理好定壞,做慣咗嗰樣就唔想轉第樣,因為未做過嘅嘢就唔想做。做新嘢嘅時候有壓力,唔開心,或者發脾氣,尤其係新地方,但係慣咗之後會舒服,除非極之掛住舊地方。對有興趣嘅事物會深入研究同搜集資料,但係唔係樣樣都有興趣。結果係難適應新環境,生活死板同有壓力[4]

鑑於呢種特性冇語言發展慢嘅問題,喺細路時期啲專業檢測都未必發現到,部分個案係甚至到成年後,先至會發現自己有呢啲特質[2]

研究同調理、保障[編輯]

最初嘅科學家研究未曾揾到亞氏保加症嘅成因,淨係研究出佢係一樣牽涉腦功能嘅問題,同父母嘅教養方式無關[3]。研究到後邊醫學上未有所謂「根治」亞氏保加症嘅方法,醫學發展到依家雖有開發咗藥物,仲有啲行為療法,去協助降低呢類嘅特質。對成年人來講,通常發現有亞氏保加特徵時,已處喺社會化過程入邊,對社會事務係有一定嘅協調同適應,唔需要再特登搞其他治理。

喺細路仔陣發現有類似嘅症狀,建議係可以透過有系統嘅教育同訓練,例如行為治療、語言治療物理治療等,加埋適當嘅環境,畀患者有多啲同其他人接觸同溝通嘅機會,就可以幫助佢哋減低症狀所帶嚟嘅障礙[4]

而喺歐洲,有兒童精神科醫生話,騎馬有助改善亞氏保加症嘅障礙,因為咁會令到身體釋放一重降低焦慮感嘅荷爾蒙,叫做催產素。咁嘅話就有助亞氏保加症同埋自閉症兒童學習。

根據返美國疾控中心(CDC)研究,亞、歐、北美洲嘅自閉症譜系障礙平均罹患率高過百分1,呢個比率仲會繼續升。喺日本,對於存有發展障礙嘅個體,除咗幾十年提高整體社會認知,仲有法律度搞一定嘅支援,好似喺2016年開始施行嘅《消除障礙者差別法》就係其中一個。日本各大學對大學生、機關企業對雇員入邊嘅發展障礙人士,都有構築咁一啲援助體制,以求有系統地持續支援呢類群體,當作係共生社會時代前嘅一個準備工作。[5]

[編輯]

  1. "亞氏保加症兒童家長指引 甚麼是亞氏保加症?". 香港教育城. 原著喺2013-05-30歸檔. 喺2013-04-17搵到. Unknown parameter |dead-url= ignored (help)
  2. 2.0 2.1 亞斯伯格被醫學界正名:是人格特質不是病!一次搞懂亞斯伯格與高功能自閉症的差異 風傳媒 2019-11-10
  3. 3.0 3.1 3.2 "蕊展計劃 甚麼是亞氏保加症?". 香港教育學院. 原著喺2013-06-23歸檔. 喺2013-04-17搵到.
  4. 4.0 4.1 4.2 4.3 "及早識別自閉症及亞氏保加症兒童". 協康會. 喺2013-04-17搵到.
  5. IQ正常的“发展障碍”(下):学龄阶段的援助 供稿 欧陽蔚怡 JST中国研究与樱花科技中心 2019-02-19

出面網頁[編輯]