分裂腦

將一個人腦中間劏開，令左腦同右腦分離，會造成咩影響？

分裂腦（粵拼：fan1 lit6 nou5）係一種綜合症，源於腦樑受損：腦樑呢個腦結構連接住大腦嘅左腦同右腦，呢個結構受損表示左腦同右腦之間嘅通訊會出現問題，往往會搞到兩者難以喺資訊處理上互相協調，彷彿好似「個腦分裂咗」噉。

基本概念

一個人腦嘅 3D 模型；深色嗰笪係腦樑。

内文：腦樑

腦樑係將左腦同右腦駁埋一齊嘅一大紮（成超過 2 億條）軸突，呢個結構令到左腦同右腦能夠通訊，協調兩者處理資訊。

實驗做法

睇埋：發羊吊

分裂腦實驗係腦神經學歷史上好出名嘅一連串實驗。研究者搵咗一拃受試動物個體返嚟，開刀將呢啲受試動物嘅腦樑切除（實驗操作），目的係想睇吓腦樑被破壞會引致啲乜嘢後果，從而剖析腦樑同埋左右腦之間嘅通訊喺個腦嘅運作當中扮演咗咩功能。佢哋嘅結果發現，切除腦樑似乎對啲受試動物嘅行為冇乜影響，有人基於呢點就提出動物嘅腦係左右腦分開噉處理資訊嘅。

由 1940 年代起，腦神經學家就有喺人類身上做過分裂腦實驗。基於道德考量，腦神經學家冇得話搵班人類返嚟，郁手破壞佢哋嘅腦樑，再睇吓噉做會引致咩影響。不過佢哋可以對病人做個案研究：喺廿世紀中嘅醫學上，啲醫護人員成日會用腦樑切除嚟應付發羊吊；簡化講，發羊吊涉及個人腦出現又快又唔受控制噉四圍散播嘅電活動，而事實表明，開刀切除腦樑會阻礙好多神經細胞之間嘅傳訊，能夠明顯減輕發羊吊嘅症狀；因此，醫學界曾經好興用腦樑切除嚟應付嚴重嘅發羊吊。有見及此，有腦神經學家就走咗去搵呢啲腦樑切咗嘅病人返嚟，觀察佢哋嘅行為同常人有咩分別。

症狀描述

睇埋：腦功能側化同讀寫障礙

就噉睇，有分裂腦嘅病人同常人冇乜分別，佢哋依然能夠正常噉生活，但佢哋嘅認知功能出現咗啲怪異嘅變化。左右腦分離咗，理應表示左右腦會分開獨立噉處理各自感知到嘅資訊，彷彿「好似有兩個腦喺同一個身體入面運作噉」，思考以下呢幾點：

• 要留意返，病人之間有明顯嘅個體差異，例如有部份病人嘅腦樑受損程度低啲，表示佢哋左右腦之間嘅經腦樑通訊未至於完全斷絕晒。
• 左眼左手直接連住嘅係右腦，而右眼右手直接連住嘅係左腦；左右腦之間通訊斷咗，表示左視野區嘅影像只會由右腦接收到，而右視野區嘅影像只會由左腦接收到。
• 已知人腦對語言方面嘅處理，係主要由左腦負責嘅。

研究者搵病人返嚟做心理實驗，發現呢啲病人左右腦似乎唔再能夠通訊，變成各自獨立噉處理資訊；如果畀一位分裂腦病人左右視野睇唔同嘅影像，個病人會例如唔能夠用把口講出右眼睇到嘅左邊視野影像係乜，而用左眼睇嗰陣就可以正常噉講出影像係乜；噉似乎反映左邊視野嘅影像，唔再能夠由右腦處理，搞到個人講唔出幅影像係乜。同樣嘅現象，喺視覺以外嘅感知都可以見到，例如有病人用左手掂一件物品，佢個左腦接收唔到相關嘅觸覺資訊，做唔到靠摸嚟判斷件物品係乜再用把口講出呢樣資訊。

亦有個個案係噉嘅：個個案嘅病人叫 VJ（化名）；研究者畀 VJ 嘅左腦（即係畀佢右邊視野睇）睇一啲字詞同埋圖片；VJ 能夠做到用把口講同描述睇到嘅文字同埋圖片，但要佢寫低自己想講嘅內容，佢就寫唔出；研究者認為，噉表示 VJ 嘅左腦能夠處理講嘢同閱讀，但控制唔到寫字。而 VJ 嘅研究亦帶出咗一點，就係寫嘢同講嘢係兩種幾唔同嘅腦功能。可以睇睇讀寫障礙嘅概念。

靠住呢啲噉嘅研究，腦神經科學家發現大腦嘅左右兩半負責處理唔同嘅聲：大腦左半球主要負責分析性質同埋口語嘅表達，而右半球就比較偏向處理音樂方面嘅資訊。

睇吓

• 意識
• 神經可塑
• 亞氏保加
• 平行運算

文獻

• de Haan, E. H., Corballis, P. M., Hillyard, S. A., Marzi, C. A., Seth, A., Lamme, V. A., ... & Pinto, Y. (2020). Split-brain: what we know now and why this is important for understanding consciousness. Neuropsychology review, 30, 224-233.
• Gazzaniga, M. S. (1998). The split brain revisited (PDF). Scientific American, 279(1), 50-55.
• Gazzaniga, M. S. (2005). Forty-five years of split-brain research and still going strong. Nature Reviews Neuroscience, 6(8), 653-659.

拎

• 分裂腦分開寫嘢同講嘢 （英文）
• 【網上講堂Micro module】張恆鏘博士：解剖「心靈」－從裂腦手術窺探意識的秘密 （香港繁體）