香雪亞洲飲料

香雪亞洲飲料

類型	汽水廠
開檔	1946年
總部地址	中國廣東廣州黃埔區 南崗開創大道362號
產業	汽水生產企業
產品	亞洲沙示 金典沙示 亞洲酷橙 檸萌 亞洲豆奶 營元堂酵素 亞洲雄風

 香雪亞洲飲料（粵拼：hoeng1 syut3 aa3 zau1 jam2 liu6） ，又嗌亞洲汽水（aa3 zau1 hei3 seoi2），係中國廣東廣州一汽水生產商，1946年2月成立，總部位置喺黃埔區南崗開創大道362號（廣州出口加工區路口對面近舊時南崗火車站嗰頭）。間嘢主要出汽水為主，尤其係佢屬下嘅亞洲沙示喺廣州街頭比較出名。

史

1946年2月喺屈臣氏汽水廠做咗好多年嘅李智揚一手創辦咗亞洲汽水廠，初期喺惠福區大德街80號（而家係越秀區大德路嘅廣東省中醫院總院範圍）開搞。工廠喺創辦第三年向東搬到大德路298號（而家係濠畔小苑用地）繼續生產。最早嗰時用嘅係部12支汽水機、一張配方、人手同大鑊，人手負責炒焦糖同熬汀秤仔啲成份出嚟，期間亦出過亞洲牌系列嘅其它飲料用飲用水、礦泉水等一系列產品。

1956年3月，由於中國大陸政府實行公私合營，重先後加埋時安、瓊南、同興、新華、回民糖果工廠等5間細型糖果廠併入亞洲兼改名做公私合營亞洲汽水糖果廠，至1958年，已擁有5部12頭汽水機，職工350人，年產汽水1000萬樽，糖果600幾噸。改名做亞洲汽水糖果廠。1964年第一批出產嘅係亞洲蘋果汽水賣到香港嗰邊而打入咗國際市場。

1966年亞洲改返做生產汽水，同年10月搬到天河路6號（大概喺而家廣州動物園南門東南角）開咗新廠兼喺1967年投入生產。文革期間受到「剷除一切牛鬼蛇神」嘅思想影響而先後改成廣州飲料二廠、廣州飲料總廠一分廠、廣州汽水廠等名直到1984年元旦先至打回頭。期間喺1970年代出亞洲沙示汽水曾經因為「有我咁好氣，冇我咁長氣。有我咁長氣，冇我咁好味！」呢句廣告口號令汽水賣到周街都係。1987年11月成立咗亞洲飲料集團。

1992年因中國大陸搞「借外力促發展」嘅大背景而揀咗百事可樂合資成立咗「百事亞洲飲料」企業之後，令公司跌到落冇得返轉頭嘅地步，重喺1996年搬出天河，去到廣州經濟技術開發區西區一帶搞工廠。工廠喺就快俾人唔記得嗰時，2002年先至收返亞洲汽水廠而重新成立，重將企業改名做亞洲飲料。

2009年5月公司俾香雪製藥收購咗兼改名做香雪亞洲飲料公司，重喺2011年1月用返舊底亞洲汽水用過嘅配方，加咗藥廠啲中藥萃取技術嚟推出返金典沙示。

2016年9月收購咗營元堂100%股份而開辟大健康新型飲料市場，期間先後推出咗豆奶同即飲酵素嘅產品。間嘢宜家係廣東省十大名牌飲料廠商之一。

出品

• 亞洲沙示
• 金典沙示
• 亞洲酷橙
• 檸萌
• 亞洲豆奶
• 營元堂酵素
• 亞洲雄風

出面網頁

• 香雪亚洲 广州老字号