跳去內容

倉頡輸入法

出自維基百科,自由嘅百科全書
中文輸入法
倉頡輸入法
發明人 朱邦復
發明年份 1976年
類別 字型
「倉頡輸入法」嘅繁體字拆碼

 倉頡輸入法粵拼cong1 kit3 syu1 jap6 faat3 係由台灣朱邦復1976年創製嘅中文輸入法,最初只有繁體中文版本,原名係「形意檢字法」,用嚟解決電腦輸入漢字嘅問題。1978年中華民國國防部蔣緯國將軍同佢改名為「倉頡輸入法」。

朱邦復唔收分毫噉公開倉頡輸入法,令到電腦漢化有好大嘅進展。而家大部份嘅作業系統都附埋倉頡輸入法。佢係繁體中文使用地區用得最多嘅形碼輸入法。

另外有一啲民間嘅修改版。發明人後來亦基於呢個輸入法,另外製作咗一個「蒼頡檢字法」,俗稱「六代倉」(嚴格啲嚟講唔係倉頡)用喺「倉頡系統」度。佢有啲部份同倉頡輸入法相似,但都有幾大改變。

版本演進[編輯]

淨係印咗倉頡字根嘅鍵盤,設計同用色都模仿《明日帝國》中出現嘅中文電腦鍵盤
  • 1977年,喺台灣發表第一代倉頡,根據一萬二千字嘅《國語辭典》設計嘅。
  • 1980年,發表第二代倉頡,只係執過第一代倉頡啲啲。
  • 1982年,發表第三代倉頡,係以《康熙字典》做範圍,揀咗其中嘅四萬字,係將第二代改良嘅成果。
  • 1985年,喺美國發表第五代輸入法同字形產生器,收咗大約六萬字,重增加一啲輔助字形同修正咗少少取碼,例如「考」字。喺朱邦復工作室網站上嘅《第五代倉頡輸入法手冊》嗰本書入面有第三代、第五代改碼字嘅字碼對照表。

由於當初微軟為咗方便啲用家,內置嘅一直都仲係第三代倉頡嘅改進版(曾用於Microsoft Windows 95/98/Me/2000/XP 等作業系統之內(修改咗一啲異體字同加入咗部份香港字,但係有錯碼),依家唔清楚)冇變過,令到啲人習慣晒三代倉,所以依家用得最多嘅係舊版第三代倉頡。

因為大量對第三代倉頡嘅需求,好多字典(如五南國語活用辭典),書籍(如小學生速學倉頡手冊$52)同網站(如五色學倉頡)都係教緊第三代倉頡,所以學第三代倉頡可以有多啲資源用。

Microsoft預設三代倉;iPhone連轉都唔使轉,輸入時自能判斷,兩種版本兼備;而Mac OS X 10.4 版就用倉頡第五代[1]倉頡之友搞嘅倉頡第五代通用版、國際版同香港版就係用咗第五代倉頡。Linux 或者 UnixX window 介面上嘅 gcin 輸入法程式,有得揀用倉頡第三代同第五代。

由「面」、「非」呢兩字就可以分得出係第三代定係第五代倉頡:

例字 倉頡第三代 倉頡第五代 蒼頡檢字法
倉頡碼 撳乜掣 倉頡碼 撳乜掣 蒼檢碼 撳乜掣
「面」 一田卜中 MWYL 一田尸中 MWSL 一田尸 MWS
「非」 中一卜卜卜 LMYYY 中一尸卜 LMSY 中尸卜 LSY

其實揀邊個版本都冇所謂,因為去到依家,其實都已經好易轉到。

事實上,以大五碼(Big5)的漢字作比較,五代倉比三代倉有多少少重碼字,大約零點幾 %到。

取碼原則[編輯]

呢版只提供簡介,詳情可以睇 維基書本有關倉頡輸入法嘅內容。

中文字根據「由上而下,由左而右,由外而內」呢啲原則分拆成字型結構,跟住再用倉頡字母拼出嚟。鍵盤上「A」至「Y」鍵各代表一個倉頡字母(「X」鍵用喺特殊字,「Z」鍵通常唔用),例如「A」係「日」、「N」就係「弓」。倉頡字母係主要字根(主根),代表24個重要嘅中文字字型部件。每個倉頡字母都會根據外觀嘅形狀變化,衍生出一啲輔助字形(輔根)。透過主根同輔根呢啲部件,就可以組成無限個漢字。

倉頡輸入法取碼時,要將一個漢字分爲字首同字身,拎字首最多2個碼(頭尾)同字身3個碼(頭12加嗰尾)。如果有三部份就取字首最多2個(頭尾)、次字首2個(頭尾)(必須2個,不足兩個跟返上面)同字身1個(尾)。拆唔到嘅字(連體字)就取頭123碼加最後一碼。見到三個基本字型(木、火、大)嗰陣就先取咗佢。一個漢字最少用一個碼輸入,最長係五個碼。

自創口訣:兩忽就左2右3 三忽就221 、中間得1當兩忽 ,得一忽就123加嗰尾、木火大(山火)要先處理!

好似噉:

例如:

漢字 分割 碼數 取碼 鍵盤上撳嘅掣
整體字,冇得分割 最多取 4 碼 中中 LL
字首:王 . 字身:里 最多取 2 . 3 碼 一土 . 田土 MGWG
字首:艹 . 次字首:女 . 次字身:古 最多取 2 . 3 碼 廿 . 女 . 十口 廿 TVJR
字首:言 . 次字首:五 . 次字身:口 最多取 2 . 2 . 1 碼 卜口 . 一一 . 口 YRMMR
註︰ 上面嘅數字係取碼嘅類型。基本上,只要將字形一分为二,最左、最上、最外嘅字首部份,取首、尾兩碼;其餘嘅字身部份,依規則取三碼,就可以拆解所有漢字。

倉頡字母分類[編輯]

「倉頡字母」(簡稱「主根」)分咗五大類,共26個倉頡字母,括號文字為相對鍵同讀音:

  • 哲理類:日(A)、月(B)、金(C)、木(D)、水(E)、火(F)、土(G)
  • 筆畫類:竹(H,斜)、戈(I,點)、十(J,交)、大(K,叉)、中(L,縱)、一(M,橫)、弓(N,鈎)
  • 人體類:人(O)、心(P)、手(Q)、口(R)
  • 字型類:尸(S,側)、廿(T,並)、山(U,仰)、女(V,紐)、田(W,方)、卜(Y)
  • 複合類:無論喺任何情況下,最多攞首尾兩碼,例如:門(AN,日弓)、鬥(LN,中弓)、目(BU,月山)、阝(NL,弓中)、虍(YP,卜心)、隹(OG,人土)、鬼(只限第三代倉頡)(HI,竹戈)等等
  • 特殊類:難(X),用於特定嘅形塊或部件,例如:臼(HX,竹難),卍(NX,弓難)等等大約十幾種形塊或部件,又或者係用於重碼字(eg.己,已);重(Z)(喺第三代唔再用,一啲自製倉頡當佢係特殊鍵,例如唔記得部分嘅碼嗰陣用嚟當萬能碼)
倉頡字碼嘅鍵盤排列
印咗倉頡字碼大字嘅鍵盤
同時印咗倉頡字碼同英文字母嘅鍵盤,係地區常見嘅鍵盤類型
同時印咗倉頡字碼同英文字母嘅鍵盤,配色同外觀比較優雅

頭24個倉頡字母重可以根據個樣再變化,衍生出「輔助字形」(簡稱「輔根」)嚟辨別所有嘅中文字。例如:「水」衍生出「氵」(三點水);「手」衍生出「扌」(提手旁);「中」衍生出「丨」(主幹係豎筆);「弓」衍生出「亅」(重點係鈎筆);「田」衍生出外圍嘅「囗」(框入面有嘢,唔同『口』)等等。詳情可以睇下 維基書本有關倉頡輸入法輔助字形嘅內容。

擧個例,「妲」字由主根「女、日、一」組成,輸入時就要撳「女(V)、日(A)、一(M)」呢三個掣;「泗」字由輔根「氵、囗、」組成,由於「氵」隸屬「水」,「囗」隸屬「田」,「」隸屬「金」,輸入時就撳「水(E)、田(W)、金(C)」呢三個掣。

實際應用嗰陣,主根同輔根通常都會混用,例如「烟」字由主根「火」、輔根「囗」(隸屬「田」)同主根「大」組成;「桐」由主根「木」、輔根「冂」(隸屬「月」)同主根「一」、「口」組成;「銀」字由主根「金」、「日」同輔根「」(隸屬「女」)組成。

只要不斷練習拆碼,分辨邊啲係字首字身同埋每個位點拆,兩星期破25WPM唔係夢!

評價[編輯]

優點[編輯]

(1)免費兼且普遍性高:由於偉大嘅朱邦復放棄咗佢嘅倉頡輸入法專利權,倉頡係免費嘅,唔使暗荷包就可以用啦!倉頡歷史悠久,加上公司唔使俾版權費,倉頡變得好普遍,每部電話電腦都有,絕對是學完一定可以用得返,只要你肯去用。

(2)可以快速盲打:由於取碼嚴謹,取五個碼,揀字機率細,只有約8%,倉頡係有快速盲打嘅潛力所在嘅! (就算有重碼,通常都剩係得嗰兩個,只要係碼前面加個X(重)區分就好啦!例如 己(尸山) 同 已(X尸山))

(3)解決提筆忘字:必須知道個字先可以拆到碼,幫助學習寫字,作文錯別字少啲,考試高分啲。例如「釁」字你又唔知識唔識得寫呢!當你搵啲文章嚟練拆碼嘅時候,仲會有可能掀起中文學習風波添!例如賣炭翁嘅「勅」字。

(4)能打偏門字:只要你熟悉倉頡拆碼原則,咩難字(eg.勅)都話咁易啦!

(5)被譽為神人:正正係因為倉頡難,所以逢親啲人用倉頡「bilibala」打字嗰陣人哋就會諗到 「bilibala」小丸子入面嗰個 好叻叻嘅花輪。

(6)發掘人生樂趣:有啲人喺HiNative話倉頡打字好似漢字拼圖遊戲噉,每次完成個拼圖都會有成功感!

缺點[編輯]

(1)學習較艱苦:拆碼複雜(其實全部形碼輸入法都係咁,要快就要有代價)有啲字例如「考」咁唔合理,喺五代倉修復咗。另外有啲字唔啱筆順,例如「申」嘅取碼係 中田中(LWL)。(不過都係因為咁,倉頡嘅拆碼先會比較嚴謹!)

(2)取碼數量多:一個字最多竟然可以取五個碼,所以打字比改進咗嘅倉頡(如大新倉頡輸入法,需付費)慢

(3)識寫先打到:因為你要跟返個字拆碼,所以吾識寫就吾識打(係所有形碼輸入法嘅問題);相反拼音注音語音就吾會有呢個問題,但係就變咗做唔識讀就唔識打。

(4)冇容錯碼:漢字自古到今,因為漢字係表意字,所以出現咗一啲唔同嘅寫法。但係朱邦復淨係揀咗一種字做參考嚟整個碼出嚟,例如「肩」字上方可以寫做「户」或者「戶」,而朱邦復就揀咗「戶」。雖然話咁樣可以令取碼統一啲,不過可能會令到啲人唔習慣同要背多啲嘢。(有啲系統內置嘅倉頡輸入法(用iOS做參考)可以容納晒上述例子嗰兩種,不過「今」、「倉」字等等都係未得)

(5)版本複雜:有三代倉同五代倉,衍生出嚟嘅輸入法仲有10幾種咁多(例如大新倉頡輸入法、新倉頡輸入法,快速倉頡輸入法),所以學習嗰陣就要取捨同小心啲啦!仲有,打字之前務必要睇下係邊個版本。

其他特色[編輯]

以下係字形輸入法嘅比較
輸入法 時間
(年)
輔助字根數 大五碼常用字重碼率[1]
共5401個字
倉頡 1976 140個(含難字根) 三代:
鄭碼 1980 約170個 不明
五筆 1983 約200個
大易 1988 約250個 三碼:
四碼:
嘸蝦米 1989 基本字根約350個
簡速字根約150個
行列 1992 超過300個

標點符號[編輯]

其實倉頡同速成都可以用嗰26個英文字母嚟打標點符號㗎!

  • 倉頡:{Z|難|?|?} (第一個?淨係接受A至C)或者係 {卜|卜|卜|?|?} (第一個?淨係接受A至D)
    • 通常用嘅都係喺 Z難日? 同 卜卜卜日? 到,下面嘅係全部常用標點符號嘅打法:
      • 逗號(,){Z|難|日|月}
      • 鈍號(、){Z|難|日|金}
      • 句號(。){Z|難|日|木}
      • 冒號(:){Z|難|日|竹}
      • 問號(?){Z|難|日|戈}
      • 感嘆號(!){Z|難|日|十}
      • 開引號(「){卜|卜|卜|日|日}
      • 閂引號(」){卜|卜|卜|日|月}
      • 省略號(……){卜|卜|卜|金|竹}
  • 速成:打法同上面一樣,不過淨係拎頭同尾。

依家試吓拎住個倉頡或者係速成鍵盤(其實一樣),試吓跟著撳幾吓,就應該會出到㗎啦!不過其實都可以唔用,因為手機(通常係左下角)同 電腦周圍嘅掣(例如Shift+1–>!)都可以打到標點符號。用呢個方法可以寄少啲嘢同撳少啲掣,但係要用到嘅鍵盤範圍就會大咗少少。

使用狀況[編輯]

  • 臺灣:根據2011年波仕特嘅調查報告指出,臺灣使用倉頡輸入法嘅比例係9.9%。其他嘅有注音輸入法70%、嘸蝦米輸入法10.7%。[2]
  • 港澳:由於普遍市民唔識或者唔習慣注音同普通話拼音,而粵語拼音亦唔夠流行,所以以前好多人用以字形取碼嘅倉頡輸入法。香港雖然無全面統計數據,但係根據輸入法硏究者李祥喺2000年所講,香港使用者最多嘅輸入法係倉頡輸入法。嗰年年初,喺中文大學舉辦嘅研討會上,現場近三百名教師超過九成使用倉頡輸入法。[3]而2001年「香港中學校際中文輸入大賽」度,1288人入面,有761人使用倉頡輸入法,其次爲速成輸入法,有317人人選用。其他輸入法都唔夠4%。(可能係因為倉頡打字快同埋歷史悠久,所以大多數人喺比賽都係用倉頡。)[4]不過依家時勢已經有轉變。後生呢批嫌倉頡速成麻煩,所以更加多人轉咗去用拼音輸入法(普教流行)、九方(需付費)筆畫手寫甚至乎語音,造成將來工作打中文字的不便。
  • 喺香港,速成同倉頡嘅比例大概係二比一,三代倉同五代倉嘅比例又大概係6:4或7:3(僅作參考,未必正確)

倉頡係台灣發源,但係喺香港最常用。

其它[編輯]

打個X(難)或者係Z(重)係唔會出「難」同「重」,其他鍵就冇呢個問題。 (冇用盡哂啲掣)

由倉頡衍生嘅輸入法[編輯]

簡易/速成輸入法[編輯]

簡易輸入法,又叫做速成輸入法(簡稱簡易或者速成),係倉頡輸入法嘅簡化版。佢嘅拆字法同倉頡一樣,只係攞頭尾兩碼,所以一個中文字最長只有兩碼。呢個取碼法比較簡單,所以幾受初學者歡迎,但係用家要喺大量同碼字裏面揀要嘅字,令到輸入速度相對變慢晒。雖然微軟推出「新速成輸入法」,以大量詞庫以及智慧選字為基礎,自動幫使用者揀字,減輕使用者背候選字嘅負擔(Windows XP/Vista/7都已經裝定新速成輸入法),而且一啲人已經將數字碼嘅部份都死記落嚟,令到個輸入速度好似提升返咗咁。不過一有非常用字就要摷(摷食物摷垃圾嗰個摷)選字表,好難打到啦!而且可惜嘅係如果轉系統就有功虧一簣嘅可能性,因為唔同系統可能有唔同嘅揀字表。當然如果淨係日常需要嘅話,其實速成都係一個簡單易學嘅輸入法,唔會比倉頡遜色嘅!(睇上面個使用比例就知)

此輸入法好早期已經裝定喺視窗作業系統裏面,唔使再裝,係電腦裏面最常用嘅預設輸入法之一。

快速倉頡輸入法[編輯]

快速倉頡輸入法,簡稱快倉,係麥志洪喺1987年改良倉頡輸入法而成嘅。

佢嘅特點係,可以當傳統倉頡輸入法使用,亦可以隨意隨時輸入快倉編碼嚟增加速度。

「快速倉頡輸入法」第六代係用GPLv3授權發放。

新倉頡輸入法[編輯]

新倉頡輸入法大約同Windows 2000一齊推出。佢無咩選字嘅麻煩,對一個熟手嘅打字員嚟講,可以完全唔使睇螢幕盲打,交畀系統自動分詞揀字。不過因為唔少人都唔慣新倉頡嘅盲打模式同冇關連嘅揀字,佢哋都唔多鍾意新倉頡輸入法,甚至無論點都要搵番以前嗰隻倉頡輸入法重新裝過。正因為咁,微軟喺後嚟嘅Windows XP裏面重保留咗舊版嘅倉頡輸入法。

大新倉頡輸入法[編輯]

大新倉頡輸入法打破咗TQC全球華人中文輸入法嘅新記錄──220字嘅輸入法,重快過嘸蝦米輸入法嘅最高記錄。特色係整體少咗取碼數、多咗六段簡碼、有幾種容錯碼、重覆字最佳化編排。係商業軟件

參考[編輯]

  1. 計算準則參見:老話一句:咪學嘸蝦米,學倉頡! @ 泰瑞的世界
  2. Pollster波仕特線上市調:七成以上民眾使用注音輸入法
  3. 李祥:〈兩岸三地使用者最多的中文輸入法〉 互聯網檔案館歸檔,歸檔日期2007-02-05.,登喺香港CNET「IT透視鏡」專欄,2000年11月27日。
  4. 文輸入法世界:2001年港中學校際中文輸入大賽計資料及系列報導. 原著喺2020年5月26號歸檔. 喺2019年10月13號搵到.

出面網頁[編輯]

(評價—優點—花輪)https://www.google.com/imgres?imgurl=https%3A%2F%2Flookaside.fbsbx.com%2Flookaside%2Fcrawler%2Fmedia%2F%3Fmedia_id%3D1964608933778845&tbnid=5cmfRQ9sbl0avM&vet=1&imgrefurl=https%3A%2F%2Fm.facebook.com%2FOpenerHK%2Fposts%2F1964609023778836%2F&docid=2Cbzb9VrIEXfZM&w=1200&h=1200&itg=1&hl=zh-TW&source=sh%2Fx%2Fim%2Fm1%2F3&shem=uvafe2

(評價—優點—發掘人生樂趣)https://hinative.com/questions/869838

睇埋[編輯]