公民與社會發展科
 | 呢篇文記述緊一項時人時事。 內容會隨住件事發展而變動或者更新。 |
公民與社會發展科（Citizenship and Social Development，簡稱公社科；曾經叫重新冠名科目，簡稱新冠科[1]），係香港政府準備取代通識科嘅高中課程必修科目，由教育局旗下嘅「課程發展議會-香港考試及評核局重新冠名科目委員會」制訂課程大綱[2]，2021年3月31號正式定名，喺2021/22學年喺中四開始推行。
公民與社會發展科由諮詢都落實到出現唔少爭議，其中喺諮詢同執行嘅過程都無視師生聲音，內容方面又有違批判思維獨立思考課程宗旨，逆民意刪除唔少政治社會議題，剩低嘅政治議題內容亦出現一定爭議。
公開考試
[編輯]考試只有一份卷，時間長2小時。入面只有資料回應題，一共有3題，題型包括多項選擇題、短答題（2-4分）、長答題（6-8分）。
評核形式
[編輯]評核只設「達標」與「不達標」。相比起以往嘅通識科，新科目唔設「獨立專題探究」，中國考察亦唔涉及評核。
爭議
[編輯]諮詢同執行無視師生聲音
[編輯]教育局喺諮詢同執行嘅過程，除咗無視學生嘅意見亦忽略老師唔夠時間準備。 教育局曾經向學校發問卷「諮詢」學校對於改革科目意向，但由於諮詢以學校為單位，學生唔能夠發表意見。香港教育專業人員協會喺2021年2月4號召開記者會，批評無提供反對選項，且認為以「能有助學生減壓」並唔係恰當考量，認為係「假諮詢」[3][4]。
另外，就教育局建議喺2021年9月落實新課程，去到2021年4月，教協嘅民調亦顯示，超過八成(82.8%)任教四科核心科目嘅教師都表示，唔夠時間準備，涉及嘅工作包括：人手編配、教師培訓、教材準備等，新安排明顯操之過急。當中多達92.6% 通識科教師指準備時間不足夠或完全不足夠，只有3.3%表示時間足夠 [5]。
課程有違批判思維獨立思考課程宗旨 重背誦抄寫難培養高階思維
[編輯]沿襲過往通識科做法，試卷分開「資料冊」同埋「試題答題簿」兩部分。樣本試卷設有三條考題，內容分別關於「疫苗猶豫」、「港區國安法」同埋「粵港澳大灣區發展」，有前通識科教師認為刪去高階能力「延伸回應題」，會令內容停留喺認知層面，流於背誦官方答案同埋抄寫資料，屬於基本知識，令科目難度降低。建議嘅課程框架完全無提及課程指引強調嘅批判思考、獨立思考、研究社會議題，使用問句形式授課，但建議就變咗陳述句，唔能夠培養學生高階思維能力，唔符合課程「慎思明辯」嘅宗旨 [6][7][8]。
逾六成反對刪政治社會議題
[編輯]2021年4月1號，香港民意研究所發表有關修改通識科課程嘅民調結果，顯示六成二受訪者反對通識科刪去部份民生同社會政治參與議題，贊成者嘅只有二成二[9]。
部分獲批教科書內容爭議
[編輯]喺2022年6月科目適用書目入面，共有6套教科書，但有部份內容出現爭議。
雖然《南京條約》同《北京條約》指明當時香港一定部分領土已經永久割讓咗畀英國，但呢啲教科書就話，中國一直擁有香港嘅主權，英國只係喺香港實行殖民統治，因此香港唔係英國殖民地[10]。
另外，喺交代北京未經諮詢或香港人同意嘅《香港國安法》嘅立法背景入面，內容亦將立法背景訴諸於恐怖活動[10]。
睇埋
[編輯]參考
[編輯]- ↑ 〈通識殺科 新科暫稱「重新冠名科目」 建制派怒斥污名化：改名嗰個人係咪鬼？〉。《港語學》。2021-02-04。
- ↑ 課程發展議會-香港考試及評核局重新冠名科目委員會
- ↑ 〈通識科改⾰擬加國家安全觀等內容 田方澤：變相推國教〉。香港電台。2021-02-02。原著喺2021-02-08歸檔。喺2021-02-04搵到。
- ↑ 〈【閹割通識】教局諮詢不設反對選項 教協：假諮詢無誠意 質疑政治干預課程〉。立場新聞。2021-02-04。原著喺2021-03-04歸檔。喺2021-02-04搵到。
- ↑ 〈教協公布「高中核心科目修訂建議」問卷調查結果 逾八成通識教師反對大幅刪改課程內容及課時 教協促局方撤回方案〉。原著喺2021-03-01歸檔。喺2021-04-05搵到。
- ↑ 〈刪延伸題改短答及選擇題 教師指考核流於認知層面〉。明報。2021-02-03。原著喺2021-03-03歸檔。喺2021-02-04搵到。
- ↑ 〈公社科試卷通識教師流於背誦抄寫-難培養高階思維〉。原著喺2021-09-03歸檔。喺2021-12-29搵到。
- ↑ 〈【閹割通識】批判不再 「改革」課程只提國家成就、刪社政參與 通識教師：變愛國教育科〉。立場新聞。2021-02-02。原著喺2021-02-11歸檔。喺2021-02-04搵到。
- ↑ 林劍 (2021-04-01)。〈通識科｜民研：逾六成人反對削政治議題 三成人同意首日已出問題〉。《香港01》。原著喺2021-10-06歸檔。喺2021-10-05搵到。
- ↑ 10.0 10.1 〈BBC中文網：香港公民教科書稱「香港不曾是英國殖民地」〉。tw.sports.yahoo.com (中文)。喺2022-06-15搵到。
 |