河北

  呢篇文講中國嘅一個省。想搵廣州珠江北面嘅地區嘅話，請睇河北 (搞清楚)。

  「冀」跳轉到呢度。想搵姓氏，請睇「冀氏」。

河北位置圖

河北（粵拼：ho4 bak1）係中華人民共和國一個省，叫河北省。個省響華北一帶，靠近渤海。佢畀多個省包圍住，東北有遼寧，北有內蒙古，西有山西，南有河南，東南有山東。而佢中間包住北京同天津兩個直轄市。河北省簡稱冀（kei3），省城係石家莊。

河北，就係黃河以北嘅意思。佢原本叫直隸（zik6 dai6），係直接隸屬北京咁解。到民國時期1928年，搬首都到南京，就改名做河北，省會響天津。另拆察哈爾、熱河兩省出來。呢兩省響中華人民共和國時期先併返入去河北，而天津就拆出做直轄市。先改省會去保定，後改石家莊。