出雲號護衞艦

出雲號護衞艦（日文：いずも；DDH-183），係日本海上自衞隊第七艘直昇機護衞艦，又係出雲級直升機護衞艦嘅一號艦。

名

出雲號嘅名繼承大日本帝國海軍嘅出雲級裝甲巡洋艦一號艦「出雲」，而呢個名又源自令制國制度時代嘅出雲國（今日嘅島根縣東部）。

海上自衞隊原本打算按照慣例，沿用前海軍名艦將新艦改名做「長門」（ながと），但因為長門係日本首相安倍晉三故鄉山口縣嘅舊地名，為咗費事俾人誤會右傾而刺激到中國，所以最後選擇用島根縣舊地名「出雲」命名。

史

出雲號係根據日本防衞省嘅《2011年中期防衞力整備計劃》預定生產搭載直升機嘅護衞艦，由IHI海洋聯合橫濱工廠負責整，響2012年1月27號動工。

2013年8月6號，出雲號響日本神奈川縣橫濱市舉行下水禮，預計響2015年3月正式服役。

評價

新華網話出雲號係日本嘅「第三艘準航母」，批評日本係規避唔可以擁有航母嘅限制，亦有都有中韓媒體質疑日本揀廣島原爆紀念日搞下水禮可能脫離現咗和平憲法；日本防衞省回應話「雖然艦上甲板可以提供F-35B戰機垂直起降，不過因為有違『專守防衞』嘅政策，我哋無考慮用出雲護衞艦進行戰機升降，所以出雲號並唔係『攻擊型航空母艦』。」對於揀響嗰日搞下水禮，海上自衞隊解釋話係因為嗰日大潮而且係吉日，同廣島原爆紀念日無關。

有評論認為，出雲號只係日本對中國近期發起嘅軍備競賽所作嘅互相牽制，軍備、使用狀況等等嘅資料都有好大透明度，同時出雲號可以加強人員同物資輸送能力，提高大型救災行動嘅效率。