加拿大航空

出自維基百科,自由嘅百科全書
   呢篇文講嘅係英文/法文名叫做Air Canada,中文名曾經叫做『楓葉航空』嘅航空公司。關於2000年被楓葉航空收購嗰間英文名叫做Canadian Airlines嘅航空公司,請睇加拿大航空(1987~2000)
加拿大航空商標

加拿大航空(英文/法文:Air Canada;舊名楓葉航空,簡稱加航)係加拿大嘅國家航空公司,總部設喺魁北克省嘅滿地可。加拿大航空提供客運同貨運嘅定期同包機服務,同時亦都為其他航空公司提供維修、地勤同訓練服務。加拿大航空嘅主要航空樞紐包括滿地可嘅兩個機場——特呂多國際機場(客運)同埋美拉比國際機場(貨運),重有多倫多皮亞遜國際機場同埋溫哥華國際機場。

加拿大航空溫哥華冬奧特別塗裝

歷史[編輯]

Air Canada嘅前身——環加航空(英文:Trans-Canada Air Lines)喺1937年4月10號創立,同年9月1號公司嘅第一架洛歇10A型客機首航,搭住郵件同埋兩位乘客由溫哥華飛去西雅圖。其後環加航空發展成加拿大嘅國家航空公司,可以喺機身上面畫上加拿大國旗。

1964年,當時未做首相嘅克里田法文Jean Chrétien)喺國會動議將航空公司個名改為Air Canada。1965年1月1號,環加航空正式改名做Air Canada。

1970年代尾,Air Canada成為獨立嘅國營企業。

1989年,Air Canada完成私有化。

1990年代初之前,Air Canada都將業務重點放喺國內、歐洲同埋美國航線上面。1994年,Air Canada開通溫哥華往返香港嘅航線,先至準備註冊中文名。但係當時『加拿大航空』呢個名,早就已經喺1950年代被搶先開通香港經東京往溫哥華航線嘅競爭對手Canadian Airlines(開辦航線嘅時候重叫做『加拿大太平洋航空』,英文:CP Air)註冊咗,因此Air Canada祇能夠將中文名定為『楓葉航空』。

1997年5月,楓葉航空聯合另外4間航空公司組建歷史上第一個航空公司聯盟『星空聯盟』(英文:Star Alliance)

1998年9月2號,楓葉航空機師發起首次罷工行動。

2000年1月,加拿大航空由於經營不善而宣告破產,楓葉航空即刻宣佈全面收購加拿大航空,同時接收埋『加拿大航空』呢個中文名。

2003年4月1號,加拿大航空申請破產保護,其間擁有加拿大國籍嘅香港商人李澤鉅曾經就獨家拯救收購進行談判,但係由於無辦法同工會達成協議而放棄。

2004年9月30號,加拿大航空改組後由ACE航空控股(英文:ACE Aviation Holdings)成為加拿大航空嘅母公司,同時撤銷破產保護。

[編輯]