動態定價

動態定價（粵音：dung6 taai3 ding6 gaa3；英文：dynamic pricing）係廿一世紀初開始興起嘅一種定價策略：動態定價係指「件產品嘅價錢由而家呢一刻嘅市場需求決定」，而市場需求好多時都會用一啲專化嘅電腦演算法嚟定時定候（例如每個鐘頭一次）估計，令到一間公司可以喺需求提升嗰陣收多啲錢，將利潤最大化。

好似優步（Uber）噉，就係動態定價嘅一個出名例子，優步嘅流動應用程式可以俾人通過網絡嚟約車，方便住喺城市嘅人可以唔使自己揸都可以有車坐，喺廿一世紀初嘅西人國家頗為受歡迎，優步採取咗動態定價嘅做法－

• 優步約車係用流動應用程式做嘅，所以優步公司可以輕易噉知道每一刻時間有幾多客想約車（需求量）；
• 簡單講，優步約車有一個標準約車費（standard rates），而優步嘅流動應用程式會將個標準約車費乘以一個數（multiplier），乘嘅數同嗰一刻時間嘅需求量成正比，再用最後得出嘅數做實際嘅約車費；
• 所以一旦需求量升，例如係朝頭早多人要返工嘅時段、或者落雨好多人想坐車返屋企... 呀噉，約車費就會升，而且成個過程高度自動化。

優步嘅做法俾唔少人批評，例如有用戶投訴話佢哋落雨想約車嗰陣，發現約車費突然升咗成 8 到 10 倍，搞到佢哋好麻煩。不過商界一般都公認，優步嘅做法係廿一世紀初定價策略上嘅一大創新。

睇埋

• 數碼營銷